Lɛrɛvɔ Sɛbɛ 21 - Kazambale lé Sebe Sauunu 1979

Wo Bale tɔ bɔ gullwuo lé we ma

¹ Lɛrɛ lé David a vɔle gɔɔn lɛrɛvɔmunu ’lɛzan lɛ.

² Gakelebale, minwiinzan blɛn gi a nanana ilé a takuunle plɛplɛ we ma. I bɔle a va a fan gi nanale blɛn nya. Bé ye do.

³ I a blibɔmafɛ nɔ a lɛ, Yé fɛan é a ma laa i lee é lɔlu nya, i ’ka a nyané kɛlɛ lɛ a lɛ lo. Ka ye do.

⁴ Naa, i da ilé zin drɔɔvolenu nya a lɛ, I kyan tegele wo a ’wuo ma tɔkoro nya.

⁵ É vole é yuɛma ma laa i lee, yé bé nɔ a lɛ, Vole é yuɛma grɔgrɔ lé é ke ana lɛɛfaama a glɛ ’ka lo, yee lé.

⁶ I bɔle a va lé we ma lé alé fua kɛlɛ blɛn; Bé tɔ bié yé i tɔ blɛn pla a nwiin.

⁷ Bé drɔɔ voo yifaama, Bé faan ginanale nya i yara,

⁸ Minwiinzan blɛn é ébo bɛ paan Gakelebale lee, Yé Loruzan lé zin lé we ma lé, é ’ka diaan lo.

⁹ I bɛ é dan bɔ lɛ i nyanézannu faa lɛ, I bɛyi é dan bɔ lɛ munu lé i za ke wo gi, wo lɛ.

¹⁰ Yian nya lé ibo gɔɔn wo lɛ, I dan wo kɛlɛ lɛ bélé ’furu lé kyɛ a tana, a zo; Gakelebale lé bliflile nya lé é dan wo sɛrɛ lɛ tata, Yé kyɛ é dan wo ble lɛ.

¹¹ I dan wo kulu ga lɛ tɛrɛ la, I dan wo bɛn tɔ ga lɛ blaminu méléna,

¹² Wo ’wo gi naané bɔrɔ i ma, Yé i ma wenyané dɔ wo gi, naa, wo lɛ ’ka lo.

¹³ Yé i wo nwunzi dɔ i ta, Yé i dan sa vɔ lɛ wo ma.

¹⁴ Gakelebale, ’i nwa ilé plɛplɛ nya. É sɔ ko lɛ léé, ko ilé plɛplɛ bié lɛrɛvɔle nya.