Lɛrɛvɔ Sɛbɛ 20 - Kazambale lé Sebe Sauunu 1979

Guliwuo vole mi lɛ ma bazorole

¹ Lɛrɛ lé David a vɔle gɔɔn lɛrɛvɔmunu ’lɛzan lɛ.

² Gakelebale ilé bazorodére nyi si ilé klebleyi nya ma, Jakɔb lé Bale tɔ ’é i takuun ma.

³ Bale lé é ke kɔn sauun gi, ’é bɔ i va ma; Bale lé é ke Siɔn, ’é kun i ma ma.

⁴ Blɛnu faa lé bé kɛlɛ a lɛ, a sele ’é dɔ a gi ma; Balebanwi lé bé kyɛ blé a lɛ, ’é a nyian wo ma. Ka ye do.

⁵ ’É i blibɔmafɛnu nɔ i lɛ ma, Yé we faa lé i gi daan a ma, Bale ’é wo lɛ sɔɔ ma.

⁶ Ilé ko sile we gi ma lé, ko gi é dan nana lɛ; Ko dan kolé drapo nwa lɛ kolé Bale tɔ nya; Gakelebale é dan ilé balekundére faa nyi si lɛ.

⁷ Maa a gi dɔɔ é kwakwa léé, Gakelebale éé nyɔnɔzénnwiinzan sié we gi; É dan alé bazorodére nyi si lɛ é nyanana sauunna la gi, É dan bɔ lɛ a va é bɛyi plɛplɛ nya.

⁸ Munu ’ko, wa é pale wolé goronu ta, yé a koɛnu a é pale wolé wisoonu ta; Naa, ko ’ko, ko Gakelebale kolé Bale tɔ laan.

⁹ Woo, woo plin‐an, yé woo diaan. Ko ’ko, ko a é dɔle gligli, yé ko a é dɔle loru.

¹⁰ Gakelebale, ’i bɔ minwiinzan blɛn va ma; Dé ko a laa, ’é ko dére ’ma ma.