Lɛrɛvɔ Sɛbɛ 2 - Kazambale lé Sebe Sauunu 1979

Minwiinzan blɛn lé Bale a si a va

¹ Mɛmalé wele wooo ke bɛnnu mélénaa? Mɛmalé migɔnɔnu ke wo ’wuogibɔrɔna é plaa?

² Mɛmalé tɛrɛ la minwiinzan blɛnnu éé nwaan ’Té mi blɛnnu woo péli vɔa wo va do Gakelebale valé élé nyɔnɔzénnwiinzan maa?

³ ’Té wa fé léé: Kaa wolé miyerebalenu kini kaa ma, Kaa si wolé gɔgɔbale gi ma.

⁴ Mian é ke é nyanale la gi, éé yéri sié, Mizan éé wo ma we nanaan.

⁵ ’Té éé we fé wo lɛ élé bliflile gi. Éé wo gi nyɛ kinié élé bliflile blɛn nya

⁶ ’Té éé a fé léé: Maa ɛ nyɔnɔ zén anlé minwiinzan blɛn nwiin, Siɔn, gɔblɛn sauun nwiin.

⁷ Maa dan i dére zana dɔɔ lɛ; Gakelebale lé maa lɛ léé: I a an be nya, Maa i yaa kyɔ.

⁸ Bé laa an lee yé maa dan bɛnnu nɔ lɛ i lɛ ilé tɔnɔfɛ nya, Maa dan tɛrɛ nɔ lɛ i lɛ izé nya, fɔɔ yé é bɔ a glɛ sina.

⁹ I dan wo ’wii lɛ ilé plaminwiin foliɛwɔlɛ nya. I dan wo ’wii lɛ bélé bɔdɔzan lé bɔ ’wiile zo.

¹⁰ Yé sin, minwiinzan blɛnnu, ’ka tawo wedɔɔle nya. ’Kaa tɛrɛla weblezannu, ’ka we ’ma ma.

¹¹ ’Ka Gakelebale bɔ kanale nya, Ka gi ’é nana manyɔɔnle nya ma.

¹² ’Ka a be tuu gyɛ ma, dé a bli é da nwa Yé ka zamagawo kalé zi ta, Naa, a bli éé flian é kele bélé kyɛblele zo. Munu faa lé woo paan a ta, wozé a néné.