Lɛrɛvɔ Sɛbɛ 19 - Kazambale lé Sebe Sauunu 1979

Bale kɛlɛfɛnu woo Bale tɔ bɔa

¹ David lɛrɛ ’ko vɔle gɔɔn lɛrɛvɔmunu ’lɛzannu lɛ.

² Lanu éé Bale lé fuasan zuo fé, Yé fɛna pla a bɛnu panyanama nagɔɔn‐an.

³ Yi do éé we ’ko paan yi bɛ gi, Gunu dɔrale do éé wedɔɔle ’ko paan gunu dɔrale bɛ gi.

⁴ Wo ’ka we fé lo, yé wo dérenu ’ka lo, Wo ’ka wo dére maan lo,

⁵ Naa, duowo, wo vunwelenu éé bɔa tɛrɛ faa la, Wo fewenu éé bɔa tɛrɛ glɛ sina. ’Bɛna lé é yiri lé sɔkɔn dɔ

⁶ Yé yiri a bélé lesizan lé, éé bɔraan élé kɔn gi, a zo, Yé éé ’wiié vlan za kɛlɛle ta nyanazan lé ginanale nya;

⁷ Éé nwaan la glɛ do sina, Yé élé vlanburule ’wuo plaan a glɛ koɛzan ta; Yé fɛan a bile plɛplɛ ’ka ’naan ’bɛ ma lo, ’bɛ fɛ ’ka lo.

⁸ Gun ’ka Gakelebale lé bélidɔwe ma lo, éé fuu dɔa miboen ta, Gakelebale lé wenayedére a webo?-?zin nya, éé wedɔɔle no wedɔɔalozan lɛ.

⁹ Gakelebale déretawenu a tegele, éé mi gi nanaan; Gakelebale sɔnnénu gi a é bɔle, woo mi yuɛnu va kinié.

¹⁰ Kanale Gakelebale lee a gibɔwe nya, éé voo ana yifaama; Gakelebale lé weblelenu a webozen nya, wo faa a tegele.

¹¹ Wo wea é mini kyan lɛ, é mini kyan tegele kiɛre ta; Wo néné mini zɔrɔnyɔnɔ ta, é mini zɔrɔnyɔnɔ lé éé sié zɔrɔyoduo gi, ’té éé yoroan, a ta.

¹² Woo we paan i wuozan gi é ziin; Munu lé woo tawoo wo ta, woo tɔnɔ blɛn yé.

¹³ Dé ɛ élé saanlenu gi dɔɔ? Wenyanénu lé maa wo kɛlɛ, ’té maa ’ka wo gi dɔɔa lo, ’I an ma we vo wolé we ma.

¹⁴ ’I i wuozan tabin boblɛnzannu lee, Té wo pla an nwiin lo ma. A zo lé an dan kɛlɛ lɛ tata, yé an pagi ’ka dan kɛlɛ lɛ wenyané blɛn nya lo.

¹⁵ Gakelebale oo Bale, anlé gɔlɛgɔ, an vo anbomazan, Dérenu lé woo bɔraan an ’léé koo, wenu lé maa bɔrɔma an bli gi koo, ’Wo kɛlɛ i yuɛ gi é zima ma.