Lɛrɛvɔ Sɛbɛ 18 - Kazambale lé Sebe Sauunu 1979

David guliwuo vo mi lɛ lɛrɛ vɔ

¹ Gakelebale wuozan David lɛrɛ ’ko vɔle gɔɔn lɛrɛvɔmunu ’lɛzan lɛ. É lɛrɛ ’ko vɔ Gakelebale lɛ bléyian va lé Gakelebale a si a nyanézannu faa valé Saul lee. É léé:

² Oo Gakelebale, anlé plɛplɛ, i sɔ an lɛ.

³ Gakelebale, anlé gɔlɛgɔ, anlé guliyɔɔkɔn, an vo anbomazan. Anlé Bale, anlé gɔlɛgɔ, i gi lé an yɔɔna yé, An takuunzan, plɛplɛ lé éé an bélié, an yɔɔna.

⁴ Maa siaan léé: ’Wo Gakelebale tɔ zin fe ma, Yé é an si an nyanézannu lee.

⁵ Wo an yere gabalenu nya, Zamaga lé é ke bélé ’yi ’lɛ plɛplɛ zo, é di kini an gi.

⁶ Mipana balenu an yere, Gaséli vɔ an zi an tanyila.

⁷ Anlé kleblele gi an Gakelebale laa, Maa siaa anlé Bale lɛ; É a élé fuakɔn gi, ’té éé an dére maan, Yé an siaale bɔ a tɔné gi.

⁸ Wo tɛrɛ puo, ’té a ma éé nyɔɔn‐an, Tun dɔ gɔblɛnnu gane vɔnanu gi, A bliflile we ma lé wo manu nyɔɔn.

⁹ Kyɛgoi éé bɔraan a nyé gi, ’Té kyɛ lé éé fɛnu blé bɛ, éé bɔraan a ’léé; ’Té kyɛnyɛ éé bélian.

¹⁰ É lanu tua, yé é zun. Lati borozan a a gane wuo.

¹¹ É vɔ sérubɛn punu, yé ’bɛ si a nya, ’Té fu éé po plaan a nya,

¹² É gunutinu kɛlɛ é yɔɔna nya, sɔkɔn lé ke é dirile a zi, a nya, Yé ’yi lé ke é ti, é valé latinu, wa ta diri.

¹³ Fuasan lé é ke a ’lɛ, latinu bɔra a gi, ’Té goowɔlɛlɛɛ valé kyɛ nyɛnu éé sié wo gi, ’té woo zanaan.

¹⁴ Gakelebale we lagi bélé zagele banle zo, Lagiloruzan dére zuoi éé goo wele nya, Goowɔlɛlɛɛ valé kyɛnyɛnu nya.

¹⁵ É élé sawɔlɛnu vuli yé é an nyanézannu fwila, É zagele we kiɛre yé é wo bin.

¹⁶ Wɛyi wɔlɛ ma bɔra Yé tɛrɛ gane vɔnanu ma bɔra, Oo Gakelebale, ilé we vɔle wo lɛ we ma lé we ’konu bɔ. Ilé flinlenu lé é bɔra i nyé ’léé, wo vun wele we ma lé é bɔ.

¹⁷ É a loru yé é bɛ soi yé é an salo, É an si ’yi blɛnnu va;

¹⁸ É an si an mazan plɛplɛ lee, An nyanézannu lé wo plɛplɛ mini an ta, wo lee.

¹⁹ Anlé klebleyi la wo bɔra an ma fiaa, Naa, Gakelebale kɛlɛ an vɔzizan nya.

²⁰ É an vo anboma é zima An sɔ a lɛ, amalé é an si we gi.

²¹ Gakelebale anzé kɛlɛ anlé wedrɔle yɛrama, É zin kɛlɛ an lɛ an bɛ gibɔle yɛrama.

²² Naa, an tawo Gakelebale lé zinu ta, Yé we do kpen ’ka an nwiin anlé Bale vazia lo.

²³ A déretawenu faa a an ’lɛ Yé an ’ka saan lɛ alé bélidɔwenu gi pelo.

²⁴ Gun ’ka an ma a vazia lo, Yé maa anbo kun, léé, ’té an weple kɛlɛ lo.

²⁵ É ziin, Gakelebale anzé kɛlɛ anlé wedrɔle yɛrama, An bɛnu gibɔle a yuɛ gi yɛrama.

²⁶ Ibo gɔɔn‐an mi zin nya mi zin lɛ, I we drɔle kɛla mi drɔle lɛ.

²⁷ Ibo nagɔɔn‐an mi gibɔle nya mi gibɔle lɛ, Yé i we kɛla mi vɔnle lɛ alé we vɔnle yɛrama.

²⁸ Munu lé wo ’wobo kɛla kiéné, i wo sié we gi, Yé munu lé woo mi naginian ’wo yuɛ zuo boblɛn nya, i wo zunwo.

²⁹ Iin, bii ɛ anlé kyɛbɔ bié; Gakelebale, anlé Bale, éé an va gunu kinié,

³⁰ I bɛ nya lé an ’wiié gulidanzannu ta, Anlé Bale bɛ nya lé an flazigɔrɔ taboo.

³¹ Gun ’ka Bale lé zinu ma lo, Gakelebale éé dére tawe kɛla, Munu faa lé wo ’wobo bɛ paan Bale lee, é a wo takuunzan nya.

³² ’Té dé é ’ka Gakelebale nya lo ’naan, de ɛ ke Bale nyaa? ’Té dé é ’ka kolé Bale nya lo ’naan, de ɛ ke gɔlɛgɔ nyaa?

³³ Bale plɛplɛ dɔ an gyɛn kyɛsidi nya, ’Té éé goo an nya zi drɔle ta.

³⁴ Éé an ganenu kɛla bélé ’kla zé zo, Yé éé an dɔa gligli gɔnu nwiin.

³⁵ Éé gulidanle gɔɔn‐an an bɛ lɛ, Yé an bɛnu éé zénésa ganaan.

³⁶ I ilé silewegi no an lɛ an takuunfɛ nya, I bɛyi éé an kunwo, Yé ilé zin ma lé an kɛla mi blɛn nya.

³⁷ I zi laala gya an ganenu wuo, Yé an sɔné ’ka saan lo.

³⁸ Maa an nyanézannu zuo bin‐é, yé an dɔa wo ma, Dé an ’ka tan wo si lɛ tɛrɛ la tata lo, an ’ka diéraan an pa gi lo.

³⁹ Maa wo ’wiié, yé wo ’ka bɔa nwale lɛ é dɛrɛ lo; Woo diaan an ganenu wuo.

⁴⁰ I plɛplɛ dɔa an gyɛn, gulidanle we ma, I an mazannu plin‐an an wuo.

⁴¹ I an nyanézannu nwun zi dɔa an ta, Yé munu lé an za ke wo gi, maa wo kulu gaan.

⁴² Woo siaan yé mi do ’ka wo lɛ yé ’bɛ é wo si we gi lo, Woo siaan Gakelebale lɛ, yé ’bɛ ’ka a zi paan wo lɛ lo.

⁴³ An wo pun dɔa bélé vungoi lé fu éé goo a nya, a zo. An wo zɔn‐o bélé fla zinu ta voli zo.

⁴⁴ I an sié munu lé zakɛlɛle wuo, I an dɔ bɛnnu nwiinzan nya, Yé migɔnɔ lé maa ’ka wo dɔɔa lo, woo plaan an wuo.

⁴⁵ Dé maa wean fe tɔɔn, ’té wa kɛlɛna, Bɛn bɛnu woo blaané paan an ma,

⁴⁶ Bɛn bɛnu fuu éé sié wo ta, Dé wo ’ka ’wolé guliyɔɔkɔn gi lo, wo ma éé nyɔɔn‐an.

⁴⁷ Gakelebale a é yuɛma, yé anlé gɔlɛgɔ drɔɔ ’é vo ma. An siéwegibale tɔ ’é kɛlɛ blɛn ma,

⁴⁸ Bale ɛ ke anlé we lɛgipazan nya, Yé éé munu plaan an wuo,

⁴⁹ Yé éé an sié an nyanézannu lee. I an mini an mazannu ta, I an sié glazan lee.

⁵⁰ Bɛwemalé, Gakelebale, an dan i tɔ zin fe lɛ bɛnnu méléna, Yé an dan lɛrɛ vɔ lɛ i tɔ kɛlɛle blɛn we ma.

⁵¹ Mi lé é a dɔ minwiinzan nya, éé a sié we tɔntɔn blɛnnu lee, Yé mi lé wo nyɔnɔ zén a ta, Bale nyanai éé zén‐é a ta, Maa, David valé an kulunu, éé a zén‐é ko ta yifaama.