Lɛrɛvɔ Sɛbɛ 17 - Kazambale lé Sebe Sauunu 1979

Weanwiinlozan lé bazorole

¹ David lé bazorole. Gakelebale, ’i tɔné dɔ we tegele lɛ, ’i an siaalenu ’ma, Anlé bazorodére lé maa a fe an lɔlu nya, ’té dabliwe ’ka a va lo bɛ, ’bé ban i tɔné nya.

² An kɛlɛle tegele ’é kɛlɛ i yara, I yuɛ ’é anlé wedrɔle ye ma.

³ Dé i an bli nagini, dé i da an va é bélioo, Dé i an gi dan, i ’ka dan we do ye lɛ ana lo. An bɔn‐in bɔrɔmawe valé an ’lééwe a do.

⁴ Dé an munu kɛlɛwenu ye, an yara a é pale dére lé éé sié i ’léé, a ta, Yé an yuɛ paan anbo va glawekɛlɛmunu lé zi lé we ma;

⁵ Maa a é dɔle gligli ilé zinu ta, An ganenu ’ka buuan pelo.

⁶ Baleoo Bale, i an dére nyi sié, amalé maa i laa, ’I an ban i tɔné nya, ’i tɔné dɔ an dérenu lɛ.

⁷ Bii lé i yɔɔna ginimunu sié we gi, Yé i wo sié wo nyanézannu lee i bɛyi nya bɛ, ’Ilé zin gɔɔn an lɛ.

⁸ ’I an takuun bélé yuɛzooné takuunle zo; ’I an ta béli dɔ i bɛa buale an ta nya,

⁹ Mi nyanénu lé woo nyané paan an ta koo, An nyanézannu lé é ke migyɛzannu nya, yé woo an zi lɛ sɔɔan koo, wo lee.

¹⁰ Woo ginyané kɛla munu lɛ, We blɛnblɛnnu fele a wo ’léé,

¹¹ Wa dana ko zuo; wo ko zi lɛ sɔɔ tɛkɛ, Woo ko ma vɔɔan léé, ’wo ko dia tɛrɛ va.

¹² Wa bélé golizra lé miwi kini ékema lɔrɔ ke a gyɛna, a zo. Wa bélé golizra boroné lé ke é yiɛna, ’té éé fɛ mabɛn‐é, a zo.

¹³ Gakelebale, ’i nwa, ka kee wo nya yé ’i wo guru zana a gi. ’I an si mi nyanénu lee ilé gwɔun nya.

¹⁴ Gakelebale, ’i an si munu lee i bɛ nya, ’i an si tɛrɛ ’ko la munu lee. Woo ’wozé yé tɛrɛ ’ko la, I wo bɔn faan ilé fɛ zimanu nya; Wolé nénu éé kaan, Yé wolé fɛ ta drɔɔnu éé voo wo nénénu zé nya.

¹⁵ Naa, dé é a maa nya, we ’ka an nwiin lo, yé an dan i yara ye lɛ, Dé an vuo tɔɔn, dé maa i ye, ’bɛ anzé bɔ.