Lɛrɛvɔ Sɛbɛ 147 - Kazambale lé Sebe Sauunu 1979

Plɛplɛfaazan Bale tɔbɔle

¹ ’Ka Gakelebale tɔ zin fe. Naa, kozé Bale tɔ kɛlɛle blɛn a é zima, É a néné, a tɔ zin fele a é sɔke.

² Gakelebale éé Jérusalɛm dɛrɛ paan; Izraɛl munu lé wo wo fwila, éé wo zén‐é ékeva é ziin.

³ Munu lé wo bli kyɛ dɔ é baba, éé fu vɔa wo bli ma, Yé éé wo tuonanu paan.

⁴ Éé monénénu nɔnɔan, Éé wo faa tɔ paan do do.

⁵ Kozan a blɛn, é a plɛplɛfaazan nya, Alé gikinile glɛ ’ka lo.

⁶ Gakelebale éé wenaanébɔmazannu kunwo é zima, Éé wenyanékɛlɛzannu zunwo fɔɔ tɛrɛ va.

⁷ ’Ka lɛrɛ vɔ Gakelebale lɛ a bɔvɔle nya, ’Ka kozé Bale tɔ kɛlɛ blɛn kɔnɔ gyɛle nya.

⁸ Yee ɛ la gi sɔɔlaan latinu nya, Yee ɛ lɛɛ dan tɛrɛ la, Yee ɛ lu gɔn bɔa gɔblɛnnu ta.

⁹ Éé fɛblele no winu lɛ, Yé dé kanwéi suanu siaa, éé fɛblele no wo lɛ.

¹⁰ Wisoo lé plɛplɛ ’ka a ginanawe nya lo, Sunya nyanazan ’ka a gi nanaan lo.

¹¹ Munu lé woo kanaan Gakelebale lee, wonu ɛ sɔa a lɛ. Woan woo bli kɛla alé zin lɛ, wonu ɛ sɔa a lɛ.

¹² Jérusalɛm munu, ’ka Gakelebale tɔ kɛlɛ blɛn. Siɔn munu, ’ka kazé Bale tɔ zin fe.

¹³ Naa, éé kalé duolinu ta foliɛwɔlɛ dɔa gligli, Yé éé ka benu drɔɔ voo ka va;

¹⁴ Éé kalé tɛrɛ voo drɔɔ, Yé éé ka kaan fɛ zima baba nya;

¹⁵ Éé é déretawenu fé tɛrɛ la; A dére éé bɔa baa é kele.

¹⁶ Éé glasépun zanaan bélé gwɛn vwi zo, Éé goowɔlɛlɛɛ nwɛɛn‐an bélé kyɛyee zo;

¹⁷ Éé glasé vulian é po nya, De ɛ bɔa dɔle lɛ alé dunu ’lɛɛ?

¹⁸ Éé wo ’yi boo é dére nya, É élé fu fɛɛan yé ’yinu é yoro.

¹⁹ É é dére gi wéiin fé Jakɔb lɛ, Éé ’élé bélidɔwenu valé déretawenu wɔlɛma bɔraan Izraɛl munu lɛ;

²⁰ É ’ka ’bɛ zo wenu kɛlɛ lɛ bɛnnu faa lɛ lo, Yé wo ’ka a déretawenu dɔɔ lɛ pelo. ’Ka Gakelebale tɔ zin fe.