Lɛrɛvɔ Sɛbɛ 145 - Kazambale lé Sebe Sauunu 1979

Bale tɔbɔ lɛrɛ lé

¹ Bale tɔ zin fele lé. David zé lé. Oo, Anzé Bale, an nwiinzan, maa dan i tɔ bié lɛ. Yé maa dan i drɔɔ vo lɛ yifaama, a glɛ ’ka lo.

² Maa dan i drɔɔ vo lɛ yi faa do do ma, Yé maa dan i tɔ ma gyɛ lɛ yifaama, a glɛ ’ka lo.

³ Gakelebale a blɛn; a tɔ zin fele yara lé, A kɛlɛle blɛn glɛ ’ka lo.

⁴ Mi kulu faa do do ’wo i panyanamanu tɔ bɔ ma, Yé ’wo i kɛlɛwe blɛɛnnu sɔɔla ma.

⁵ Maa dan ilé fuasan tɔbɔle blɛɛn zuo fe lɛ, Maa dan i kɛlɛwe blɛɛnu vɔ lɛ lɛrɛ nya.

⁶ Ilé plɛplɛ lé éé nyɛ zén‐é mi gi, wo dan a glewo lɛ, Yé fɛan zo lé i ke blɛn, maa dan a zuo fe lɛ.

⁷ ’Wo ilé wezin blɛn sele dɔ munu gi yé ’é nwɛɛn, Yé ’wo ilé we tegele tɔ bɔ.

⁸ Gakelebale nyanai éé zén‐é, yé é mi mawe dɔɔ, A bli ’ka flian é kele lo, yé é a é fanle zin nya.

⁹ Gakelebale a é zin munu faa vazia, Yé a nyanai éé zén‐é é kɛlɛfɛnu ta.

¹⁰ Oo Gakelebale, i kɛlɛfɛnu faa wo dan i tɔ zin fe lɛ, Yé ilé yarapawelazannu é dan i drɔɔ vo lɛ.

¹¹ Wo dan ilé plale mi nwiin lé fua zuo fe lɛ, Yé wo dan i plɛplɛ tɔ sɔɔla lɛ,

¹² Ilé plɛplɛ nagɔɔnle munu lɛ we gi, Ilé plale mi nwiin lé fua blɛɛn tagɔɔnle we gi.

¹³ Ilé plale mi nwiin a lɛɛfaama we nya, a glɛ ’ka lo, Yé i lɛdɔmale ana yifaama.

¹⁴ Munu faa lé woo diaan, Gakelebale éé wo kunwo, Yé wo faa lé wo ke é plinle, éé wo drɔan tegele.

¹⁵ Munu faa yuɛ a i lɛ, Yé i fɛblele no wo lɛ é nɔbléyi va.

¹⁶ I bɛ ma a wolowolo, Yé i fɛ yuɛmalenu faa kaan wolé blibɔmafɛnu nya.

¹⁷ Gakelebale a tegele élé wekɛlɛbɛnu faa gi. Yé é a nyanaizénzan nya é panyanama faa gi.

¹⁸ Munu faa lé woo Gakelebale laan, é a wo sɔnɔ, Wo faa lé wa laan ’wo bli faa nya, woo lé;

¹⁹ Munu lé woo kanaan a lee, éé wolé blibɔmawenu lɛ sɔɔan, Éé wo siaale maan yé éé wo sié we gi.

²⁰ Munu faa lé Gakelebale éé sɔa wo lɛ, éé wo tabin‐é, Yé éé mi nyanénu faa kulu gaan.

²¹ An Gakelebale tɔ zin sɔɔlaan, Yé mi faa a drɔɔ vo ma, Yifaama, té a glɛ é dɔ lo.