Lɛrɛvɔ Sɛbɛ 144 - Kazambale lé Sebe Sauunu 1979

Minwiinzan blɛn Bale bɔ vɔ

¹ David zé lé. Gakelebale, anlé gɔlɛgɔ, a drɔɔ ’é vo ma, Yee ɛ gulidanbɛ paan an gi, Yee ɛ an kɛlɛ gulidanzan nya.

² É a wezinkɛlɛzan nya an lɛ; é a an tin‐évafɛ plɛplɛ nya. É a an yɔɔna plɛplɛ valé an siéwegizan nya. É a an takuunzan valé an vɔzizan nya. Yee ɛ anlé munu plaan an wuo.

³ Gakelebale, blami a mɛ fɛ nya yé i ’bɛ dɔɔ? Blami be a mɛ fɛ nya yé i ’bɛ mawe kɛlaa?

⁴ Blami a bélé flinle do zo, Alé yinu a bélé furɔ lé éé nɔlaan, a zo.

⁵ Gakelebale, ’i ilé lanu tua, yé ’i zun. ’I bɛ mane gɔblɛnnu ma yé kyɛgoinu é bɔra wo gi ma,

⁶ ’I lɛɛ yuɛ wuo vɔ, yé ’i an nyanézannu fwila ma. ’I sawɔlɛnu vuli wo va, yé wo diéra.

⁷ Bii lé i ke la gi, ’i bɛ soi; ’I an si ’yi blɛnnu lee yé ’i an si we gi, ’I an si bɛnnu lee,

⁸ Bɛnnu lé woo viéwoo, ’Té woo dabli kɛla, ’i an si wo lee.

⁹ Oo Bale, an dan lɛrɛ dɛrɛ vɔ lɛ i lɛ, Maa dan i tɔ kɛlɛ lɛ blɛn kpélé lé a wɔlɛ ke vu, a nya.

¹⁰ Biian i minwiinmunu sié we gi, Biian i i wuozan David so migyɛ gwɔun lee,

¹¹ ’I an si we gi, yé ’i an si bɛn lee, Bɛn lé, éé viéwoo, ’Té éé dabli kɛla, ’i an si a lee.

¹² Ko benu a bélé yiliné plaa lé Woo toroan ’wo boronéla bléyi va, wo zo; Ko lunu a bélé kɔnwɛyilinu lé wo wo ma nyaa, Yé wo wo kɛlɛ minwiinzannu lé kɔn nyɛɛfɛnu nya, wo zo.

¹³ Kolé boonu a é fanle Fɛblele gɔnɔ faa nya yé é bɔra a ’léé. Kolé ’blanu éé né yaan baa wuru é wuru di nya Kolé féinu ta;

¹⁴ Kolé diridanu woo né yaan di; We do ’ka kɛla ko lɛ lo; wo ’ka goo ko nya luu gi lo. Wu ’ka wé kolé zinu ta lo.

¹⁵ Munu lé wolé we ke ’bɛ zo, wozé a néné. Munu lé wozé Bale ke Gakelebale nya, wozé a néné.