Lɛrɛvɔ Sɛbɛ 143 - Kazambale lé Sebe Sauunu 1979

Bɔle mi va ma bazorole

¹ David lé lɛrɛ lé. Gakelebale, ’i an ban i tɔné nya, maa a gona bazorona, ’i tɔné dɔ anlé nyanainya dére lɛ. I a yarapawelazan nya, i a tegele, amalé ’i we an lɛ ma.

² Té i kun i wuozan lé weblele ma lo, Naa, mi yuɛmalenu va mi do kpen ’ka tegele i yuɛ gi lo.

³ An nyanézan éé an boen zuo bin‐é, É a a va léé, ’é anlé tɛrɛla nyaa, Éé a kɛla léé, an nyana gunutinu va, Bélé munu lé wo gana mɔn, wo zo.

⁴ An léli fuu a é sile é ta, An bli kyɛ dɔ an gi,

⁵ We kyɛnnu lé bé kɛlɛ, wo sele a an gi, An bɔn‐in bɔrɔan i panyanamanu faa ma, An ’wuo gi bɔrɔan i bɛ panyanamanu ma.

⁶ Maa an bɛnu soian i vazia; I lɔrɔ an boen gya bélé ’yiminilɔrɔ zo. Ka ye do.

⁷ Gakelebaleoo, Bale, ’i anlé welaale nyi si é kele. An lɛbole bɔ é pu. Té i yara yɔɔ an ma lo, Dé an da kɛlɛ bélé munu lé woo goo guru gi, wo zo.

⁸ Maa ilé zin zuo ’ma bladi ma. Naa, maa a pale bii ɛ ta. Zi lé é a lé an tawo a ta, bé nagɔɔn an lɛ ma, Naa, an bɔn‐in bɔrɔle faa a i vazia.

⁹ Gakelebaleoo, Bale, ’i an si an nyanézannu lee, Maa yɔɔna naginian i va.

¹⁰ ’I ilé blibɔmawe kɛlɛle paa an gi, Naa, bii a anzé Bale nya. I léli zima ’é go an nya zi tegele ta ma,

¹¹ Gakelebale, i tɔ lé we ma ’i an béli ma, I a tegele, ’i an boen si kleblele gi.

¹² I a é zin, amalé ’i an nyanézannu faa kulu ga, Munu lé wo yaan an boen ta, ’i wo faa gyɛ zama. Naa, maa a i wuozan nya.