Lɛrɛvɔ Sɛbɛ 139 - Kazambale lé Sebe Sauunu 1979

Bale we faa dɔɔ — é mi mawe dɔɔ

¹ David lɛrɛ ’ko vɔle gɔɔn lɛrɛvɔzannu zilɛzan lɛ. David zé lé. Gakelebale, i an giwe naginian yé i an dɔɔ,

² Dé an nyanaoo, dé an nwaoo, i ’bɛ dɔɔ; Dé i a baaoo, i an ’wuogibɔrɔle dɔɔ;

³ Dé maa a tawonaoo, dé maa a yiɛnaoo, i ’bɛ dɔɔ; Yé i an kɛlɛwenu faa dɔɔ.

⁴ Oo Gakelebale, dé dére ’ka tan bɔ lɛ an nɛnɛ ta lo, ’Té i ’bɛ faa dɔɔ tɛkɛ.

⁵ Bii a é dirile an zi; Yé i bɛ paan an ta.

⁶ Wedɔɔle blɛn ’bɛ zo éé an gi vuruan, É a an ma baa; an ’ka ’bɛ gi maan lo.

⁷ An go kyɛn yé an si i léli ma baa? An vɔa fli gi kyɛnzia yé an si i yuɛ gii?

⁸ Dé an go la gi, ’té bii lo. Dé an yia gamunu nyanana, ’té bii lo.

⁹ Dé an nwa bladi tutu, dé an si boenwo‐oo, Yé dé an go wɛyi glɛ sinaoo,

¹⁰ ’Bɛna lé é ziin i bɛ éé goo an nya, Yé i dan an kun lɛ.

¹¹ Dé maa léé, gunutinu é dan an ta yɔɔ lɛ duowo, ’Té ’bɛ kinin san nya an zi,

¹² Iin, gunutinu ’ka i yuɛ gi bɔa lo, Béli éé bié bélé é yiéyi zo, Yé gunutinu a bélé san zo.

¹³ Bii ɛ an koligifɛnu kɛlɛ, Bii ɛ an kɛlɛ an bu bɔn gi.

¹⁴ Maa i tɔ zin fé léé, maa a fɛ yuɛmale lé éé mi gi vuruan, a nya, I panyanamanu a zevɔwenu nya, An boen ’bɛ gi dɔɔ é zima.

¹⁵ Bléyian va lé wa an kɛlɛna kyeen gi, fɛna yɔɔle na, ’Té maa a tinna an bu bɔn gi, An kɔlɛ ’ka é yɔɔle bii lee pelo.

¹⁶ Bléyian va lé an kɛlɛle péli ’ka tan sia lɛ lo, Yinu lé an dan kɛlɛ lɛ tɛrɛ la, Dé wo va yi do kpen ’ka tan bɔ lɛ lo, ’Té wo faa a é gyɛle ilé sɛbɛ ta.

¹⁷ Oo Bale, i ’wuogibɔrɔ ma wenu gi ’male an kele. Wo nɔnɔ ’léé a blɛn é baba.

¹⁸ Dé maa wo nɔnɔ, ’té wa kiɛre, wo mini nyénénu ta. Dé maa vuo ’té maa a i va tan.

¹⁹ Oo Bale, ’i wenyanékɛlɛzannu gyɛ ma. Mi nyɛ zanamunu, ’ka si an ma baa.

²⁰ Woo we fé i ma mi ple lé wefebɛ nya, Woo i tɔ fé vié we gi, woan wo ke i nyanézannu nya, woo lé.

²¹ Gakelebale, munu lé i za ke wo gi, maa ’ka dan wo za pa lɛ loo? Munu lé woo nwaan i ma, wolé we ’ka an kaan loo?

²² Maa wo za paan zapale bozen nya; Maa wo yé an nyanézannu nya.

²³ Oo Bale, ’i an giwe nagini; ’i an bli dɔɔ ma. ’I an giwe dan; ’i an ’wuogibɔrɔlenu dɔɔ ma.

²⁴ Bé nagini, dé maa a zi naané taa? Yé ’i go an nya vole é yuɛma lé a glɛ ’ka lo, alé zi ta.