Lɛrɛvɔ Sɛbɛ 137 - Kazambale lé Sebe Sauunu 1979

Luugimunu lé wuvɔ lɛrɛ

¹ Bléyian va lé ko ke é nyanale Babilɔn lé yuunu gɔ ta, Dé Siɔn sele dɔ ko gi, ko wuvɔ.

² Ko kolé kɔnɔnu dun ’bɛna Yuusiayilinu ma.

³ Ana lé munu lé wo ko kun guli ma, wo lé ko lɛ léé, ko lɛrɛ vɔ, Yé munu lé wo yaa ko ta, wo léé: Ka gi ’é nana; ’Té wa fé léé: ’Ka ka fla Siɔn lɛrɛ vɔ ko lɛ.

⁴ Ko kɛla kaa yé ko Gakelebale lé lɛrɛ vɔ Tɛrɛ lé é ’ka kozé nya lo, a taa?

⁵ Jérusalɛm, dé i sele saan an gi, An bɛyi ’é ga ma.

⁶ Dé i sele ’ka dɔ lɛ an gi lo, Dé Jérusalɛm ’ka an gi nanaan Yé é mini we bɛnu faa ta lo, An nɛnɛ ’é kua an lagolo ma ma.

⁷ Gakelebale, Édom munu sele ’é dɔ i gi ma, Munu lé, wa fe Jérusalɛm ma yi la léé: ’Ka a ’wii, ’ka a ’wii Fɔɔ yé é bɔ a gane vɔna ma, wo sele ’é dɔ i gi ma.

⁸ Babilɔn munu, ’kaa kɔn ’wiizannu, Wenaané lé ka kɛlɛ ko lɛ, Mian é a lɛgi kɛlɛ ka lɛ, ’bɛzan zé a néné.

⁹ Mian é kalé nénu sié, ’té éé wo wiian gɔlɛ ta, Azé a néné.