Lɛrɛvɔ Sɛbɛ 132 - Kazambale lé Sebe Sauunu 1979

Balebangikɔn tɔ bɔle

¹ Gɔ gié lɛrɛ do lé. Gakelebale, David sele ’é dɔ i gi ma, Nyané faa lé é a ble, a sele ’é dɔ i gi ma.

² É Gakelebale ’nyɔɔn, É Jakɔb lé Mi Plɛplɛ ’nyɔɔn, a fele nya léé:

³ Maa ’ka dan wɔra lɛ anlé sɔkɔn gi lo, Maa ’ka dan yia lɛ anlé yialafɛ ta lo,

⁴ Yi ’ka dan vɔ lɛ an yuɛ la lo, An yuɛ takɔnénu ’ka dan pla lɛ é ke la lo

⁵ Fɔɔ ’té an fɛna ye izé nya, ’Té an bii, Jakɔb lé Mi Plɛplɛ, nyanana kɛlɛ é wo.

⁶ Bé ye, ko Bale lé kɛsu tawe ’ma Éfrata, Yé ko a ye Jaa lé féi.

⁷ Kaa go Bale nyanana, Kaa ’wuo wɔra a gane wuo,

⁸ Gakelebale, ’i nwa, ’i da i flinna, Bii valé ilé kɛsu lé woo i nini la kinile yé a la, a nya.

⁹ Ilé Balebanzannu, ’wo we tegele zén ’wo ta bélé varɔ zo ma, Yé ilé yarapawelazannu ’wo siaa ginanale nya ma,

¹⁰ I wuozan David lé we ma. Mian i nyɔnɔ zén a nwiin, té i yara yɔɔ a ma lo.

¹¹ Gakelebale webozen fe David lɛ ébo ’nyɔɔnle nya, É ’ka dan é dére nɔla lɛ lo; é léé: Maa dan ibozen giné nyana lɛ ilé webleblin ta.

¹² Dé i benu tawo anlé gipawe ta, Yé anlé weplalenu lé maa paan wo gi, dé wa nyi si, ’Té wo é benu é ziin, ’bɛnu é dan nyana lɛ Lɛɛfaama ilé webleblin ta.

¹³ Iin, Gakelebale Siɔn si ézé nya, É sɔ a lɛ léé, ’é kɛlɛ é nyanana nya.

¹⁴ Yee ɛ ke an flinna nya lɛɛfaama; Naa, an bli bɔ ana ma, amalé maa dan nyana lɛ ana.

¹⁵ Maa dan alé fɛblele drɔɔ vo lɛ, Maa dan alé nyanégyɛzannu kan lɛ fɛ nya;

¹⁶ Maa dan Siɔn Balebanzannu kɛlɛ lɛ sile we gi zanadɔɔzannu nya, Yé alé yarapawelazannu wo dan siaa lɛ ginanale nya.

¹⁷ Ana lé maa dan David lé plɛplɛ nwa lɛ, Anlé mi lé, an nyɔnɔ zén a nwiin, maa dan kyɛbɔ ma’lɛrɛ lɛ a lɛ.

¹⁸ Maa dan a nyanézannu gyɛ lɛ yara nya, Naa, alé tɔkoro é dan bi lɛ a ’wuo ma.