Lɛrɛvɔ Sɛbɛ 119 - Kazambale lé Sebe Sauunu 1979

Bale lé bélidɔwe

¹ Munu lé gun ’ka wolé tawobɛ ma lo, ’Té woo tawoo Gakelebale lé bélidɔwe yɛrama, wozé a néné.

² Munu lé woo alé wepladérenu maan, ’Té wa lɛdɔama wo bli faa nya, wozé a néné.

³ Munu lé wo ’ka weplenu kɛla lo, ’Té woo tawoo alé zinu ta, wozé a néné.

⁴ I we pla munu lɛ, Wolé i déretawenu kɛlɛle tegele we ma.

⁵ An kɛlɛwenu ’é kɛlɛ tegele, Yé ’an dɔ i déretawenu ta;

⁶ Dé an yuɛ pa ilé bélidɔwe sɔnnénu va, Yara ’ka dan an gyɛ lɛ lo,

⁷ Dé wo ilé bélidɔwe tegelenu paa an gi, Maa dan i tɔ zin fe lɛ an bli tegele nya,

⁸ Maa a a va léé, maa i déretawenu kɛla. Té i daan an ma tata lo.

Bale lé bélidɔwe lɛdɔmale

⁹ Pɛniɛ a kɛla ka yé alé tawobɛ é kɛlɛ tegelee? ’É tawo i dére yɛrama ma.

¹⁰ Maa i naginian an bli faa nya, Té bé nyi si léé, maa ilé bélidɔwe sɔnnénu vo an yuɛ zuo lo.

¹¹ Maa i dére paan an bli gi, Té an wenyané kɛlɛ i ma lo we gi.

¹² Gakelebaleoo, Bale, i drɔɔ ’é vo ma, ’I i déretawenu paa an gi.

¹³ Maa i ’léé wegibɔidérenu faa nɔnɔan An lɔlu nya.

¹⁴ An gi éé nanaan tawole ilé weplale yɛrama we gi, Bélé fɛan zo lé fɛwezannu faa ke an lee, a zo.

¹⁵ An bɔn‐in bɔrɔan i déretawenu ma, Yé an yuɛ a ilé zinu va.

¹⁶ I déretawenu an gi nanaan é baba, An gi ’ka saan i dére ma lilo.

Wezin yele Bale lé bélidɔwe ma

¹⁷ ’I wezin kɛlɛ maa, i wuozan lɛ, an vole é yuɛma we gi; Yé an tawo i dére ta.

¹⁸ ’I an yuɛ fuo, Yé maa ilé bélidɔwenu gi we blɛnnu ye.

¹⁹ Maa a bɛn nya tɛrɛ la; Té i ilé bélidɔwe sɔnnénu yɔɔ an lee lo.

²⁰ Ilé bélidɔwenu lɔrɔ a an boen ma bléyi faa ma Fɔɔ yé é vɔ an ma gyɛ nya.

²¹ Boblɛnzannu lé, bale ke é pale wo ma, ’Té woo ilé bélidɔwe sɔnnénu voo ’wo yuɛ zuo, i bon‐ɛn‐an wo nya.

²² Maa ilé wepladérenu nyi sié, Amalé ’i yara si an ’wuo ma, té wan ye boazan nya lo.

²³ Dé minwiinzannu an ma we bleoo, I wuozan éé bɔn‐in bɔrɔan i déretawenu ma.

²⁴ Wenu lé bé pla an lɛ, wa an ginanamawenu nya, Woo ɛ we paan an gi.

Bale lé bélidɔwe nyi sile é bli faa nya

²⁵ An boen a é wɔrale vun wuo, ’I an béli i dére yɛrama.

²⁶ Maa anlé wenu zuo fé, yé i tɔné dɔa an lɛ; ’I i déretawenu paa an gi.

²⁷ Zi lé é sɔ i lɛ, ’bé gɔɔn an lɛ, Yé maa dan bɔn‐in bɔrɔ lɛ i panyanama blɛnnu ma.

²⁸ An boen éé wuvɔa an bli kyɛ dɔle we ma; ’I an tɔrɔ paa i dére nya.

²⁹ ’I an si viézi ta, Yé ’i zin kɛlɛ an lɛ léé, ’an go ilé bélidɔwe zuo.

³⁰ An webozen lé zi si a va anzé nya, Maa ilé bélidɔwenu plaan an wuo.

³¹ An kunwo ilé wepladérenu ma, Gakelebale, té yara an gyɛ lo ma.

³² ’I anlé we ’male taa pa, ’Té an vlan buruwo ilé bélidɔwe sɔnnénu ta.

We gi ’male ma bazorole

³³ Gakelebale, ’i i déretawenu paa an gi, Anlé tawole a ta we gi fɔɔ yé an bɔ a ’wuoplana

³⁴ ’I gikinile nɔ an lɛ ilé bélidɔwe lɛdɔmale we ma, Yé maa a ta tawo an bli faa nya.

³⁵ ’I go an nya ilé bélidɔwe sɔnnénu zuo, Naa, woo sɔa an lɛ.

³⁶ An bli ’é bɔ ilé weplalenu ma ma, Té é bɔ tɔnɔ yele ma lo.

³⁷ Té an yuɛ é bɔ boafɛnu ma lo ma, Yé ’i an vo é yuɛma, an tawo ilé zi ta.

³⁸ Blivolɛdére lé ke munu lé woo kanaan i lee, wozé nya, ’Bé lɛ sɔɔ, maa i wuozan lɛ.

³⁹ Yaragyɛwe lé éé kana zén‐é an gi, ’bé si an ma baa, Naa, ilé weblelenu a zin saa nya.

⁴⁰ Bé ye, é sɔ an lɛ léé, an tawo i dére ta; Amalé ’i an vo é yuɛma, ilé we tegele gi ma.

Pale Bale lé bélidɔwe ta

⁴¹ Gakelebale, ’i nyanai zén an ta Yé ’i an béli, ilé blivolɛdére yɛrama.

⁴² ’Té an bɔa a zi pale lɛ mian éé an sɔnɔan, a lɛ, Naa, an paan i dére ta.

⁴³ Té i webozen dére si an ’léé tata lo, Naa, an bli a ilé weblelenu lɛ.

⁴⁴ Maa dan tawo lɛ ilé bélidɔwe ta bléyi faa ma, Lɛɛfaama, ’bɛ glɛ ’ka lo.

⁴⁵ An dan tawo lɛ anbo ma, Naa, é a an gi léé, maa i déretawenu kɛlɛ.

⁴⁶ An dan ilé wepladérenu zuo fe lɛ minwiinzannu ’lɛ, ’Té yara ’ka an gya lo.

⁴⁷ An gi éé nanaan é baba ilé bélidɔwenu ma, Wo sɔ an lɛ.

⁴⁸ Ilé bélidɔwe sɔnnénu lé, wo sɔ an lɛ, an bɛ soian wo vazia, Yé maa a a va léé, an bɔn‐in bɔrɔ i déretawenu ma.

Bli vole Bale lé bélidɔwe lɛ

⁴⁹ Ilé blivolɛdére lé bé fe maa, i wuozan lɛ, Yé an bli vo a lɛ, a sele ’é dɔ i gi ma.

⁵⁰ Wean éé an tɔrɔ paan anlé nyané gi, Yee lé ke léé, ilé blivolɛdére éé vole é yuɛma no an lɛ.

⁵¹ Boblɛnzannu woo an ma we nanaan é baba, Naa, an ’ka yara sié ilé bélidɔwe ta lo.

⁵² Oo Gakelebale, wenu lé bé ble é kyɛn, dé a sele dɔ an gi, ’Bɛ an tɔrɔ paan.

⁵³ Mi nyanénu lé woo daan ilé bélidɔwenu ta tawole ma, Dé maa wo ye an bli éé flian wo ma é baba.

⁵⁴ Maa i déretawenu vɔa lɛrɛ nya, Kɔn lé maa ke a gi bɛn nya, a gi.

⁵⁵ Oo Gakelebale, i tɔ sele éé dɔa an gi é béli, Yé maa ilé bélidɔwenu ta tawo.

⁵⁶ Wean é ke néné anzé nya, yee lé ke léé, Maa i déretawenu kɛla.

Mi lé ébo nɔle Bale lé bélidɔwe lɛ

⁵⁷ Oo Gakelebale, maa léé, anzé lé ke léé, Maa i dérenu lɛdɔma.

⁵⁸ Maa a laa i lee an bli faa nya léé, I nyanai ’é zén an ta ilé blivolɛdére yɛrama.

⁵⁹ An ’wuo gi bɔrɔan an kɛlɛwenu ma, Yé maa léé: An dan tawo lɛ ilé wepladérenu ta.

⁶⁰ An goo, an ’ka mɔn‐o lo, Yé an tawo é kele ilé bélidɔwe sɔnnénu ta.

⁶¹ Mi nyanénu éé sannu vɔa an zi, Naa, an gi ’ka saan ilé bélidɔwe ma lo.

⁶² An nwaan tu la i tɔ zin fele we ma, Ilé weblele tegelenu ma.

⁶³ Munu faa lé woo kanaan i lee, maa a wo béé nya, Woo valé munu lé woo i déretawenu kɛla, wo nya.

⁶⁴ Gakelebaleoo, Bale, tɛrɛ a é fanle ilé zin nya, ’I i déretawenu paa an gi.

Bale lé bélidɔwe wezan

⁶⁵ Gakelebaleoo, Bale, i wezin kɛla maa i wuozan lɛ, Ilé blivolɛdére yɛrama.

⁶⁶ ’I wedɔɔle valé gikinile nɔ an lɛ, Naa, an bli paan ilé bélidɔwe sɔnnénu lɛ.

⁶⁷ Bléyian va lé i ’ka tan an tua lɛ lo, maa ilé zi vo an yuɛ zuo, Naa, sin, maa i dére ta tawoo.

⁶⁸ Bii a é zin, yé i wezin kɛla, ’I déretawenu paa an gi.

⁶⁹ Boblɛnzannu éé ’wuo gi nyané bɔrɔan viépale nya an ma, Naa, maa i déretawenu kɛla an bli faa nya.

⁷⁰ Wo bli a wo gi dirikaa, bélé nyɔnɔ bo zo, Naa, ilé bélidɔwe an gi nanaan é baba.

⁷¹ Ilé an tuale a é zima, I déretawenu draanle we ma.

⁷² I ’léé bélidɔwenu a é zima anzé nya, É gié kyanfɛnu valé gɔɔlifufɛnu wuru soru ta.

Bale lé bélidɔwe a tegele

⁷³ I an kɛlɛ i bɛ nya, bii ɛ an bɔra tɛrɛ la, I‐gikinile nɔ an lɛ, maa lé ilé bélidɔwe sɔnnénu draanle we gi.

⁷⁴ An bli a ilé blivolɛdérenu lɛ, Amalé munuan woo kanaan i lee, dé wo an ye, wo gi éé nanaan.

⁷⁵ Oo Gakelebale, maa a gi dɔɔ léé, ilé weblelenu a tegele. I yara pale we ta ma lé i an tua.

⁷⁶ Ilé zin ’é an tɔrɔ paa ma, Blivolɛdére lé bé fe i wuozan lɛ, a yɛrama.

⁷⁷ I nyanai ’é zén an ta, an vole é yuɛma we gi. Naa, ilé bélidɔwe a an ginanamawe nya.

⁷⁸ Boblɛnzannu lé woo yaan an ta é pla, yara ’é wo gyɛ, Naa, an bɔn‐in bɔrɔan i déretawenu ma.

⁷⁹ Munuan woo kanaan i lee, ’wo da é ziin an va ma, Wo valé munuan wo ilé weplalenu dɔɔ, wo nya.

⁸⁰ Té gun é vo an ma i déretawenu ma lo, Té yara an gyɛ lo we ma.

Mi sole we lee ma bazorole

⁸¹ É sɔ an lɛ léé, i an béli, an boen wɔlɛi nyaa é ma, An bli a ilé blivolɛdére lɛ.

⁸² An yuɛ gi gunu dɔra ilé blivolɛdére naginile we ma, Yé maa léé, i dan an tɔrɔ paa lɛ mɛ bléyi vaa?

⁸³ Maa a bélé wikɔlɛkuo lé é ke kyɛgoi va, a zo; Naa, i déretawenu sele ’ka saan an gi lo.

⁸⁴ I wuozan lé tɛrɛla yinu vo nɔɔ? Munuan woo nyané paan an ta, i dan wolé we ble lɛ mɛ yi laa?

⁸⁵ Boblɛnzannu woo guru blɛnnu boo an ’lɛ, Wo ’ka we kɛla ilé bélidɔwenu yɛrama lo.

⁸⁶ Ilé bélidɔwenu a yara pale we ta saa nya, Woo nyané paan an ta é pla. ’I bɔ an va.

⁸⁷ É vo sɛné yé wo anzé nyaa tɛrɛ la, Naa, an ’ka sɔn vɔ lɛ i déretawenu ma lo.

⁸⁸ ’I an béli ilé zin nya, Wepladérenu lé woo sié i ’léé, maa lé wo kɛlɛle we gi.

Bli vole Bale lé bélidɔwe lɛ

⁸⁹ Oo Gakelebale, i dére a é dɔna La gi bléyi faa ma.

⁹⁰ I yara paan we ta mi kulu é kulu faa zé nya; Bii ɛ tɛrɛ gane vɔ, yé é ana gligli.

⁹¹ Ilé bélidɔwenu yɛrama fɛnu faa ana kyɔ, Naa, fɛnu faa a i wuo.

⁹² Dé ilé bélidɔwe ’ka kɔɔn kɛlɛ lɛ an ginanawe nya lo, ’Té an ga anlé nyané gi.

⁹³ An gi ’ka dan san lɛ i déretawenu ma monomono lo, Naa, wo nya lé i an béli.

⁹⁴ Maa a izé nya; ’i an si we gi ma. Naa, maa i déretawenu kɛla.

⁹⁵ Mi nyanénu an lɛbɛn‐é an gyɛle we ma; Naa, an bɔn‐in bɔrɔan ilé wepladére ma.

⁹⁶ Fɛnu faa lé gun ’ka wo ma lo, maa ye léé, wo glɛ a; Naa, ilé bélidɔwenu glɛ ’ka lo.

Bale lé bélidɔwe va sɔlɛle

⁹⁷ Ilé bélidɔwe sɔ an lɛ é baba. An bɔn‐in bɔrɔan ’bɛ ma bladi nyanadi.

⁹⁸ Ilé bélidɔwenu lé we ma, an we dɔɔ é mini an nyanézannu ta. Naa, wa an va yifaama, azama.

⁹⁹ An bɔn‐in bɔrɔan ilé wepladérenu ma, Amalé an we dɔɔ é mini an gi wepaazannu faa ta.

¹⁰⁰ Maa i déretawenu kɛla, Amalé an gi kinile mini mi kwakwanu ta.

¹⁰¹ An gane sié zi naanénu faa ’léé, Tawole i dére ta we ma.

¹⁰² Bii ɛ we paan an gi, Amalé an ’ka daan ilé bélidɔwenu kɛlɛle ma lo.

¹⁰³ I dérenu a an ’léé néné, É mini zɔrɔnyɔnɔ wɔrale an ’léé lɛ.

¹⁰⁴ I déretawenu an gi kinié, Yé viéwole faa za a an gi.

San lé éé sié Bale lé bélidɔwe va

¹⁰⁵ I dére a kyɛbɔ nya, a nya lé an wuo yé, Yé éé san nwɛɛn‐an anlé zi ta.

¹⁰⁶ An dan anlé balekundére lɛ sɔɔ lɛ, léé, An dan tawo lɛ ilé bélidɔwe tegelenu ta.

¹⁰⁷ An tua weboen nya, Gakelebale, ’i an béli i dére nya.

¹⁰⁸ Oo Gakelebale, an bligiwenu lé éé bɔraan an léé, ’bé nyi si, Yé ilé bélidɔwenu paa an gi.

¹⁰⁹ Maa a yifaama é bɔrale ga lɛ, Naa, an gi ’ka saan ilé bélidɔwe ma lo.

¹¹⁰ Mi nyanénu woo sannu plaan an lee, Naa, maa ’ka i déretawenu voo an yuɛ zuo lo.

¹¹¹ Ilé weplalenu a yifaama anlé tɔnɔ nya, Naa, wa an bli gi ginanawe nya.

¹¹² É a an bli gi léé, an bɔ i déretawenu kɛlɛle lɛ, Yifaama, fɔɔ yé an bɔ a ’wuoplana.

Bale lé bélidɔwe éé mi ta béli dɔa

¹¹³ Blifiézan za a an gi, Naa, ilé bélidɔwe sɔ an lɛ.

¹¹⁴ Bii a an yɔɔna valé an takuunzan nya; An bli a ilé blivolɛdére lɛ.

¹¹⁵ Mi nyanénu, ’ka si an ma baa, Yé an tawo anzé Bale lé bélidɔwenu ta.

¹¹⁶ ’I an dɔ gligli ilé blivolɛdére yɛrama, an vole é yuɛma we gi. Té yara an gyɛ we lé an bli ke a lɛ, ’bɛ we ma lo.

¹¹⁷ ’I kun an ma, yé an si we gi, Yé maa i déretawe kɛlɛ yifaama.

¹¹⁸ Munu faa lé, woo sié i déretawenu zuo, i wo yé boamunu nya; Iin, woo dabli kɛla é pla.

¹¹⁹ I tɛrɛla wenyanékɛlɛzannu faa sian bélé bli zo, Amalé ilé weplalenu sɔ an lɛ.

¹²⁰ Kana blɛn zén an gi ilé we ma, yé an ma éé nyɔɔn‐an, Yé an kanaan ilé weblelenu lee.

Bale lé bélidɔwe lɛdɔmale

¹²¹ Maa bélidɔwe valé we tegele kɛla; Té i an vo munu lé woo yaan an ta, wo lee lo.

¹²² Wezin kɛlɛle maa i wuozan lɛ, ’é kɛlɛ ilé sɔbɛlawe nya, Té i zi nɔ boblɛnmunu lɛ léé, wo yaa an ta lo.

¹²³ An yuɛ gi gunu dɔra ilé mi bélile naginile we ma, Yee valé ilé we tegele lé blivolɛdére naginile we gi.

¹²⁴ ’I we kɛlɛ i wuozan lɛ ilé zin yɛrama, Yé ’i déretawenu paa an gi.

¹²⁵ Maa a i wuozan nya; ’i gikinile nɔ an lɛ, Ilé wepladérenu dɔɔle we gi.

¹²⁶ Gakelebale, ilé wekɛlɛbléyi bɔ; Wa ilé bélidɔwe sɛrɛna, azama.

¹²⁷ Bɛwemalé ilé bélidɔwenu sɔ an lɛ, É mini kyan lɛ; é mini kyan tegele lɛ.

¹²⁸ Bɛwemalé maa i déretawenu faa yé we tegelenu nya; Viéwo zinu faa za a an gi.

Bale lé bélidɔwe lɔrɔ

¹²⁹ Ilé weplalenu a é nɔnɔmi, Bɛwemalé an boen éé wo kɛla.

¹³⁰ I dére gi ’male éé mi va kinié. Munuan wo gi ’ka é kinile tegele lo, éé wo gi kinié.

¹³¹ Ilé bélidɔwe sɔnnénu lɔrɔ an gya, Amalé an ’léé fuo yé maa a flin blɛn wona lɔrɔ nya.

¹³² ’I yara dɔ an vazia, yé ’i nyanai zén an ta, Bélé fɛan zo lé bé kɛla i tɔ sɔlɛmunu lɛ, a zo.

¹³³ ’I an gane dɔ gligli tawole i dére ta we ma, Yé té i zi nɔ weple do kpen lɛ léé, é pla an nwiin lo.

¹³⁴ ’I an si munu lé woo yaan an ta, wo lee, Maa lé i déretawenu kɛlɛle we gi.

¹³⁵ I yara ’é bi maa i wuozan ta ma, Yé ’i déretawenu paa an gi.

¹³⁶ Wo ’ka ilé bélidɔwenu kɛla lo, Amalé an yuɛyi éé yoroan bélé ’yi zo.

Bale lé bélidɔwe a tegele

¹³⁷ Oo Gakelebale, bii a tegele, Yé ilé weblelenu a é sɔke.

¹³⁸ Ilé weplalenu pun sina lé ke we tegele nya, Yee valé yarapalale blɛn bozen nya.

¹³⁹ An mazannu gi san i dérenu ma, Amalé an fuu dɔle an ta éé blé bélé kyɛ zo.

¹⁴⁰ Wo i dére faa gi dan, Yé é sɔ maa i wuozan lɛ.

¹⁴¹ Maa a kiéné, yé wo ’ka an yé mi nya lo; Naa, an gi ’ka saan i déretawenu ma duowo lo.

¹⁴² I kɛlɛwe tegele a we tegele lé éé voo ana yifaama, a nya, Yé ilé bélidɔwenu a webozen nya.

¹⁴³ An kle blé ’té an nyané blé kaii; Naa, ilé bélidɔwenu a an ginanawe nya.

¹⁴⁴ Ilé weplalenu a tegele lɛɛfaama, a glɛ ’ka lo; ’I gikinile nɔ an lɛ, yé an vo é yuɛma.

Mi sole we lee ma bazorole

¹⁴⁵ Maa i laan an bli faa nya; Gakelebale, bé zi pa an lɛ, Maalé i déretawe kɛlɛle we gi.

¹⁴⁶ Maa i laan; ’i an si we gi, Maalé ilé weplalenu ta tawole we ma.

¹⁴⁷ An nwaan tukinigunu nya yé an siaan; An bli a ilé blivolɛdérenu lɛ,

¹⁴⁸ Tukinile ’lɛ, an vuoan Bɔn‐in bɔrɔle i dére ma we ma.

¹⁴⁹ ’I tɔné dɔ an dére lɛ ilé zin yɛrama, ’I an vo é yuɛma ilé weblele yɛrama.

¹⁵⁰ Munuan woo wenyané kɛla, wa biéna, Wa é sile bélidɔwe ma baa.

¹⁵¹ Oo Gakelebale, bii a é pu, Yé ilé bélidɔwe sɔnnénu faa a webozen nya.

¹⁵² Ana mɔn, ’té maa a gi dɔɔ léé, Ilé weplalenu ana yifaama.

Bɔle ’é va ma bazorole

¹⁵³ ’I anlé nyanéblele ye, yé ’i an vo anboma, Naa, an gi ’ka saan ilé bélidɔwe ma lo.

¹⁵⁴ ’I dɔ an zuo yé ’i an tabo, ’I an vo é yuɛma ilé blivolɛdére yɛrama.

¹⁵⁵ Sile we gi a é sile mi nyanénu ma baa, Naa, wo ’ka i déretawenu kɛla lo.

¹⁵⁶ Oo Gakelebale, i mi mawe dɔɔ é baba, ’I an vo é yuɛma ilé weblele yɛrama.

¹⁵⁷ Nyané pa antazannu valé an mazannu a di; Naa, maa ’ka paama ilé weplalenu ma lo.

¹⁵⁸ Munu lé woo mi banwoo munu lɛ, ’Té wo ’ka tawoo i dére ta lo, wolé we an kaan.

¹⁵⁹ I déretawenu sɔ an lɛ; ’i bɔn‐in bɔrɔ ’bɛ ma; Gakelebale, ’i an vo é yuɛma ilé zin yɛrama.

¹⁶⁰ I dére pun sina lé ke webozen nya, Yé ilé bélidɔwe tegelenu glɛ ’ka lo.

Mibo nɔle bélidɔwe kɛlɛle we ma

¹⁶¹ Minwiinzannu éé nyané paan an ta é pla, Naa, gligli éé zén‐é an gi i dére saa lé we ma.

¹⁶² An gi éé nanaan i dére lé we ma, Bélé mian é gulizarafɛ kiɛre ye, a zo.

¹⁶³ Viéwole za a an gi; éé ’naan an ma é baba; Naa, ilé bélidɔwe sɔ an lɛ.

¹⁶⁴ Maa i tɔ kɛla blɛn yi do gɔnɔ sɔrafié, Ilé bélidɔwe tegelenu lé we ma.

¹⁶⁵ Munuan ilé bélidɔwenu sɔ wo lɛ, vole drɔɔ kiɛre a wozé nya, Yé wenaané do ’ka bɔa wo ma lo.

¹⁶⁶ Gakelebaleoo, Bale, an bli a ilé mi sile we gi lɛ, ’Té maa ilé bélidɔwe sɔnnénu paan.

¹⁶⁷ An boen éé tawoo ilé wepladérenu ta; Wo sɔ an lɛ é baba.

¹⁶⁸ Maa i déretawenu valé ilé wepladérenu kɛla, Naa, i anlé tawobɛ faa dɔɔ.

Bɔle ’é va ma bazorole

¹⁶⁹ Gakelebaleoo, Gakelebale, anlé siaalenu ’é bɔ i va ma, ’I gikinile nɔ an lɛ ilé blivolɛdére yɛrama.

¹⁷⁰ Anlé we laale ’é bɔ i va ma. ’I an si we gi ilé blivolɛdére yɛrama.

¹⁷¹ ’Maa i tɔ zin fele sɔɔla an lɔlu nya ma, Naa, i i déretawenu paan an gi.

¹⁷² ’Maa i dére vɔ lɛrɛ nya ma, Naa, ilé bélidɔwe sɔnnénu faa a tegele.

¹⁷³ ’I bɔ an va, Naa, maa i déretawenu si a va anzé nya.

¹⁷⁴ Oo Gakelebale, an bli éé bɔa ilé mi sile we gi ma, Yé ilé bélidɔwe a an ginanawe nya.

¹⁷⁵ An boen ’é vo é yuɛma ma, i tɔ zin fele we ma. Yé ilé weblelenu an dɔ gligli ma.

¹⁷⁶ An vola bélé ’bla lé é saan, a zo; ’i i wuozan nagini ma, Naa, an gi ’ka saan ilé bélidɔwe sɔnnénu ma pelo.