Lɛrɛvɔ Sɛbɛ 118 - Kazambale lé Sebe Sauunu 1979Guliwuo vole mi lee ma bɔvɔle ( Ezd 3:10–11 ; LvS 68 ; 110 ) 1 ’Ka Gakelebale tɔ zin fe, naa, é a é zin, Naa, a nyanai éé zén‐é yifaama. 2 Izraɛl munu a fe ma: Naa, a nyanai éé zén‐é yifaama. 3 Arɔn lé munu a fe ma: Naa, a nyanai éé zén‐é yifaama. 4 Munu lé woo kanaan Gakelebale lee, wa fe ma: Naa, a nyanai éé zén‐é yifaama. 5 Bléyian va lé maa ke kleblena, maa Gakelebale laa; Gakelebale a ’ma, yé é an vo anbo ma. 6 Gakelebale éé paan an va, an ’ka kanaan we do kpen lee lo; Blaminu é bɔa mɛ ɛ kɛlɛle lɛ an lɛɛ? 7 Gakelebale a an bɔavazan nya, Yé dé maa an nyanézannu ye, an gi éé nanaan é wo. 8 Vɔle Gakelebale zi fila vɔ É mini vɔle mi zi lɛ; 9 Vɔle Gakelebale zi fila vɔ É mini vɔle mi blɛnnu zi lɛ. 10 Bɛnnu faa an zi lɛ sɔɔ; Gakelebale tɔ nya, maa wo wi kinié ékema. 11 Wo an zi lɛ sɔɔ; wo diri an zi; Gakelebale tɔ nya, maa wo wi kinié ékema. 12 Wo an zi lɛ sɔɔ bélé zɔrɔnu zo; Woo dirian bélé kyɛ lé éé lélinu blé, a zo; Gakelebale tɔ nya, maa wo wi kinié ékema. 13 I an nyunu léé, an dia, Naa, Gakelebale bɔ an va. 14 Gakelebale a anlé plɛplɛ nya, yee lé maa a tɔ zin fé. Yee ɛ an si we gi. 15 Wa siaana guliwuo sile we ma, yé wa siaana silewegi we ma, mi tegelenu lé kɔnnu gi, a fele nya léé: Gakelebale bɛyi é élé plɛplɛ nagɔɔn‐an. 16 Gakelebale bɛyi a é nwale, Gakelebale bɛyi é élé plɛplɛ nagɔɔn‐an. 17 Maa ’ka dan ga lɛ lo, maa dan vo lɛ é yuɛma, Yé an dan Gakelebale panyanamanu zuo fe lɛ. 18 Gakelebale we lɛdɔ an gi, Naa, é ’ka an vo lɛ gale lee lo. 19 ’Ka zi tegele lɛ so an lɛ, ’An wɔra ana, yé ’an Gakelebale tɔ zin fe. 20 Gakelebale lé kɔn ’léé lé é ke ’ko: Ana lé mi tegelenu éé wɔraan. 21 Maa i tɔ zin fé; i anlé we laale nyi si, Yé i an si we gi, bɛzama. 22 Gɔlɛ lé kɔndɔmunu sɔn vɔ a ma, É kɛlɛ kɔnsungɔlɛ nya. 23 We ’ko si Gakelebale va, Yé é a givuruwe nya ko yuɛ gi. 24 Gakelebale kyɔyi ’ko nɔ ko lɛ, ’É kɛlɛ ko lɛ yi zin valé ginanayi nya ma. 25 Oo Gakelebale, ’i ko si we gi ma. Oo Gakelebale, ’i fua nɔ ko lɛ ma. 26 Mi lé é da Gakelebale tɔ gi, a drɔɔ ’é vo ma. Koan ko ke Gakelebale lé kɔn gi, ko ka drɔɔ vo. 27 Gakelebale a Bale nya yé éé ko va kinié. ’Ka balebanwi yere, ’Ka go a nya fɔɔ balebanna bélinu ma. 28 Bii a anzé Bale nya, yé maa dan i tɔ zin fe lɛ, Anzé Bale, maa dan i tɔ bié lɛ. 29 ’Ka Gakelebale tɔ zin fe, naa, é a é zin, Naa, a nyanai éé zén‐é yifaama. |
Alliance Biblique de Cote d'Ivoire 1979
British & Foreign Bible Society