Lɛrɛvɔ Sɛbɛ 116 - Kazambale lé Sebe Sauunu 1979

Mi lé é so ga lee, alé Bale tɔ bɔle

¹ Gakelebale an dére maan, yé é anlé welaalenu maan, Amalé é sɔ an lɛ,

² Naa, é ’é tɔné dɔ an lɛ, Yé an dan vo lɛ anlé Bale laana anlé tɛrɛla faa gi.

³ Maa a gabale gi, Gamunu nyanana lé nyanéblele bɔ an ma, Kleblele valé nyanéblele an gyɛ,

⁴ Naa, an Gakelebale laa a fele nya léé: Gakelebaleoo, Gakelebale, ’i an boen si we gi.

⁵ Gakelebale a nyanaizénzan nya; é a tegele, Kozé Bale nyanai éé zén‐é blɛn;

⁶ Gakelebale éé bokiénézannu tabin‐é; We naané bɔ an ma, yé é an si a gi.

⁷ An boen, ’i go, ’i flin, Naa, Gakelebale wezin kɛlɛ i lɛ.

⁸ Iin, i an boen so ga lee, I an yuɛyi bɔle yi ga, I an sɔné sanle yi ga.

⁹ An dan tawo lɛ Gakelebale ’lɛ, Mi yuɛmalenu lé tɛrɛ la.

¹⁰ Dé maa anbo ye wenaanébɔmazan boen nyaoo, Maa a é pale i ta;

¹¹ Maa a nyané biɛn blena yé maa léé: Munu faa a dabli kɛlɛzannu nya.

¹² Wezin faa lé Gakelebale a kɛlɛ an lɛ, An mɛ no a lɛ gii?

¹³ Anlé baleban’yi é dan kɛlɛ lɛ Yé maa dan Gakelebale laa lɛ.

¹⁴ Maa dan anlé balekundére lɛ sɔɔ lɛ Gakelebale lɛ, Alé munu faa yuɛ va.

¹⁵ Woan Gakelebale sɔ wo lɛ, Wo gale wea a lee.

¹⁶ Gakelebaleoo, Gakelebale, maa a i wuozan nya, I wuozan lé maa nya; i wuole be lé maa nya, amalé ’i tɔné dɔ an lɛ, ’I an yerebalenu kini.

¹⁷ Maa dan i ban lɛ i bɔvɔle nya, Yé an dan Gakelebale laa lɛ é tɔ nya.

¹⁸ Maa dan anlé balekundére lɛ sɔɔ lɛ Gakelebale lɛ, Alé munu faa yuɛ va,

¹⁹ Gakelebale lé kɔn gɔrɔ gi, Bii, Jérusalɛm méléna. ’Ka Gakelebale tɔ zin fe.