Lɛrɛvɔ Sɛbɛ 115 - Kazambale lé Sebe Sauunu 1979

Bale lé ke Bale bozen nya é do kpen

¹ Gakelebale, té wo ko tɔ bɔ lo, té wo ko tɔ bɔ lo, Naa, bii ɛ tɔ lé wa bɔ ma, Ilé zin valé i yara pale we ta lé we ma.

² Mɛmalé bɛnnu a fé léé: Kalé Bale a kyɛɛn?

³ Kolé Bale a la gi, Weowean é sɔ a lɛ, yee lé éé a kɛla.

⁴ Wozé miyilinu a gɔɔli valé kyan nya, Munu bɛ panyanama lé.

⁵ Wo ’léé a, wo ’ka wé lo, Wo yuɛ a, wo ’ka yɛrɛ yé lo;

⁶ Wo tɔné a, wo ’ka we maan lo, Wo nyé a, wo ’ka fɛ gin sié lo,

⁷ Wo bɛ a, wo ’ka bɛ manean fɛ ma lo, Wo gane a, wo ’ka tawoo lo, Wo ’ka we do kpen fé wo bɔrɔ gi lo,

⁸ Munuan ’bɛnu wo kɛlɛ, ’bɛnu a bélé wo zo, Wo lé woo paan wo ta, wolé we a bélé wozé zo.

⁹ Izraɛl, ’ka pa Gakelebale ta. É a ka bɔavazan valé ka takuunzan nya.

¹⁰ Arɔn lé munu, ’ka pa Gakelebale ta. É a ka bɔavazan valé ka takuunzan nya.

¹¹ Ka lé ka kanaan Gakelebale lee, ’ka pa Gakelebale ta, É a ka bɔavazan valé ka takuunzan nya.

¹² Ko sele a Gakelebale gi; é dan ko drɔɔ vo lɛ, É dan Izraɛl munu drɔɔ vo lɛ, É dan Arɔn lé munu drɔɔ vo lɛ.

¹³ Munuan woo kanaan Gakelebale lee, é dan wo drɔɔ vo lɛ, Mi kiénénu koo, mi segelenu koo, woo lé.

¹⁴ Gakelebale é dan wezin kɛlɛ lɛ ka lɛ kiɛre, Ka valé kalé nénu lé.

¹⁵ Gakelebale lé, é la valé tɛrɛ kɛlɛ, ’É ka drɔɔ vo ma.

¹⁶ Lanu a Gakelebale zé nya, Naa, é tɛrɛ nɔ blaminu lɛ.

¹⁷ Gamunu ’ka Gakelebale tɔ kɛla blɛn lo, Munuan woo goo fɛ lé fɛ do kpen ’ka wé ana lo, ana, wo va mi do kpen ’ka a tɔ kɛla blɛn lo;

¹⁸ Naa, dé é a ko nya, ko dan Gakelebale drɔɔ vo lɛ, É sia bléyi ’ko va fɔɔ yifaama, a glɛ ’ka lo. ’Ka Gakelebale tɔ zin fe.