Lɛrɛvɔ Sɛbɛ 109 - Kazambale lé Sebe Sauunu 1979

Mi lé di kini a gi, alé bazorole

¹ David lɛrɛ ’ko vɔle gɔɔn lɛrɛvɔzannu zilɛzan lɛ. David zé lé. Lɛrɛ do lé. Balean maa a tɔ zin fé, té i tadɔ an zi lo.

² Naa, weplekɛlɛzannu valé dablikɛlɛzannu wo ’léé vɔa an ma, Woo we fé an lɛ wolé viéwo lɔlu nya,

³ Woo an zi lɛ sɔɔan zapadérenu nya, Woo guli daan an va é pla.

⁴ Wo sɔ an lɛ, naa, wa an nyanézannu nya, Naa, an goo bazoro lɛ.

⁵ Wo anlé wezin lɛ gi paan wenaané nya, Wo sɔ an lɛ, ’té woo an za paan.

⁶ ’I mi ple pla an nyanézan nwiin, Yé mian éé we dɔa a nwiin, ’bɛ ’é dɔ a bɛyila ma.

⁷ Dé wo alé we ble bléyian va, we a gyɛ ma, Yé ’wo alé bazorole ye wenyané nya ma.

⁸ A yinu ’léé ’é kɛlɛ kiéné ma, Yé mi bɛ a pagi si ma.

⁹ Alé nénu ’é kɛlɛ tigalazannu nya ma, A na ’é kɛlɛ gyɛzarale nya ma.

¹⁰ Alé nénu ’é kɛlɛ giézan planu nya, yé ’wo kɛlɛ doropazannu nya ma. Wo ’wolé fɛblele gini wolé kɔn ma baa ma.

¹¹ Vɛɛnpazan alé fɛnu faa sia gla nya ma, Yé bɛn bɛnu alé nyanama tɔnɔ si kyeen nya ma.

¹² Té é sɔ mi do kpen lɛ é ziin lo, Té mi do kpen nyanai é zén a galanénu ta lo.

¹³ ’Wa kulu ga ma, Yé mi kulu lé wo dan bɛ, té wo tɔ é vɔ ’bɛnu va lo.

¹⁴ Weple lé a tranu a kɛlɛ, a sele ’é dɔ Gakelebale gi ma, Yé wenyané lé a bu a kɛlɛ, té wa fwi lo ma.

¹⁵ Wolé wenyané ’é vo yifaama Gakelebale yuɛ gi ma, Té wo sele é dɔ tɛrɛlamunu gi é dɛrɛ lo ma.

¹⁶ Naa, nyanai zénle sele ’ka dɔ lɛ a gi lo, Yé é nyané pa wenaanébɔmazannu valé nyanégyɛzannu ta, Fɔɔ yé é blikyɛdɔzan gyɛ bɛ, azama.

¹⁷ Balepale mi ma sɔ a lɛ, amalé mi bɛ ’é bale pa a ma ma. Mi drɔɔvole ’ka sɔ lɛ a lɛ lo, amalé té a drɔɔ é vo lo ma.

¹⁸ ’É balepale zén ’é ta bélé varɔ zo ma, ’É wɔra a kɔlɛ nya bélé ’yi zo ma, Bélé nyɔnɔ zo a wɔlɛnu nya ma.

¹⁹ ’É kɛlɛ a lɛ bélé varɔ lé éé a zén‐é é ta, a zo, Bélé kyɛsidi lé éé a dɔa é gyɛn yifaama, a zo.

²⁰ Gakelebale, ’i we lɛgi pa an nyanézannu ma a zo ma, Wo valé munu lé woo weple fé an ma, wo nya.

²¹ Yé bii Gakelebale, Mizan, i tɔ lé we ma ’i wezin kɛlɛ an lɛ ma. Ilé zin a blɛn, amalé ’i an si we gi.

²² Maa a wenaanébɔmazan nya, yé maa a nyanégyɛzan nya, Yé wo an bli fuan an gi.

²³ An goo bélé nyanadi furɔ zo, Wo an bin bélé gangan zo.

²⁴ Anlé lɔrɔ sɔnle we ma an powuonu a tɔɔtɔɔ, Yé an kwéé yé plɛplɛ ’ka an lee lo.

²⁵ Woo an yé serele bomami nya, Woo an naginian, ’té woo ’wo ’wuo nyɔɔn‐an.

²⁶ Gakelebale, anzé Bale, ’i bɔ an va. ’I an si we gi ilé zin nya.

²⁷ ’Wo we ’ko dɔɔ ma; i bɛ ɛ kɛlɛ; Bii Gakelebale, bii ɛ kɛlɛ.

²⁸ Dé wo bale pa mi ma, i dan ’bɛzan drɔɔ vo lɛ. Dé wo nwa, yara é dan wo gyɛ lɛ, Yé i wuozan gi é dan nana lɛ.

²⁹ ’Wo yaragyɛwe bɔ an nyanézannu ma ma, Yé wo yara wɔra wo ’wuo ma bélé sɔ zo ma.

³⁰ Maa dan Gakelebale tɔ zin fe lɛ an dére biéle nya, Maa dan a kɛlɛ lɛ blɛn mi gu méléna;

³¹ Naa, éé dɔa nyanégyɛzan bɛyila, Munu lé woo ga dɔa a nwiin, a sile ’bɛnu lee we gi.