Lɛrɛvɔ Sɛbɛ 107 - Kazambale lé Sebe Sauunu 1979

SEBE SORUZAN (Lɛrɛvɔle 107–150) Wo Bale tɔ bɔ alé zin lé we ma

¹ ’Ka Gakelebale tɔ zin fe, naa, é a é zin, Naa, a nyanai éé zén‐é yifaama.

² Munu lé Gakelebale wo tabo, Yé é wo si wo nyanézannu lee,

³ Yé é wo si tɛrɛ faa la, Yirinwanazia koo, yirivɔnazia koo, yirinwana bɛbolazia koo, wɛyi vazia koo, wona, yé é wo zén ékeva, ’wo yee duo ɛ fe ma.

⁴ Wo vo nɔɔna bwi gi; wo vo tawona wo saa, Yé fla lé wo bɔa nyanale lɛ a ta, wo ’ka ’bɛ ta zi ye lɛ lo.

⁵ Lɔrɔ valé ’yiminilɔrɔ vo wo gyɛna, Yé wo boen fuu si wo ta.

⁶ Wolé kleblele gi, wo siaa Gakelebale lɛ, Yé é wo si wolé nyané blɛn blelenu gi;

⁷ É go wo nya zi tegele ta, Wo bɔle wo nyanafla ta we gi.

⁸ ’Wo Gakelebale tɔ zin fe alé zin Valé we blɛnnu lé é a kɛlɛ blami benu lɛ, a we ma ma.

⁹ Naa, mi boen lé ’yiminilɔrɔ ke a gyɛna, é a si a ma, Yé mi boen lé, lɔrɔ ke a gyɛna, é a kan fɛ zima nya.

¹⁰ Woo nyanaan gunutinu va, é valé gale furɔ wuo, Wo vo luugizannu nya, ’té wa nyanaizénlazannu valé gɔgɔbale gizannu nya;

¹¹ Wo Bale dére lɛga a ma, Wo Loruzan lé weplale ye boawe nya, azama.

¹² É wo tua nyané blele nya, Wo dia, yé wo bɔavazan ’ka lo.

¹³ Wolé kleblele gi wo siaa Gakelebale lɛ, Yé é wo si wolé nyané blɛn blelenu gi;

¹⁴ É wo si gunutinu valé gale furɔ wuo, Yé é wo ma balenu bɔi.

¹⁵ ’Wo Gakelebale tɔ zin fe alé zin Valé we blɛnnu lé é a kɛlɛ blaminu lɛ, a we ma ma.

¹⁶ Naa, é zénéduolinu ’wii. Yé é kɔn lɛ tan foliɛwɔlɛnu bɔi.

¹⁷ Tavozannu kɛlɛwe naanénu Valé wolé weplenu lé we ma lé wo kɛlɛ wenaanébɔmazannu nya.

¹⁸ Fɛblele lɔrɔ nyaa wo boen ma Yé ga bɔ wo lɛ é pu.

¹⁹ Wolé kleblele gi wo siaa Gakelebale lɛ, Yé é wo si wolé nyané blɛn blelenu gi;

²⁰ Bale é dére pa wo lɛ zia yé é wo béli. Yé é wo si ga lee.

²¹ ’Wo Gakelebale tɔ zin fe alé zin Valé we blɛnnu lé é a kɛlɛ blaminu lɛ, a we ma ma.

²² ’Wa ban a bɔvɔlenu nya ma, ’Wa kɛlɛwenu zana dɔɔ ’té woo siaan ginanale nya ma.

²³ Munu lé wo tawo wɛyi ta, ’yitagoronu gi, ’Té woo nyanama paan ’yi blɛnnu ta,

²⁴ Wo ɛ Gakelebale kɛlɛwenu ye, Wo ɛ alé we blɛnnu ye wɛyi va.

²⁵ É we fe yé fu plɛplɛ gié, Yé ’bɛ wɛyi nwa.

²⁶ Wɛyi nwa loru yé é zén é pai, Ga bɔra wo lɛ amalé wo gi nyɛ kini;

²⁷ Glinnii vɔ wo ’wuo gi yé wo vɔ dadada bélé nwɛgyɛzan zo. Yé wolé gikini faa saan wo gi tata.

²⁸ Wolé kleblele gi wo siaa Gakelebale lɛ, Yé é wo si wolé nyané blɛn blelenu gi;

²⁹ É fu giélenu dɔ, yé é wɛyi nyana drɔɔ, Yé a nwalenu ta zana.

³⁰ Munu gi nana léé, wo vo drɔɔ, Yé Gakelebale go wo nya ’yitagoro dɔna lé, wo bli bɔ kɔɔn a ma, ana.

³¹ ’Wo Gakelebale tɔ zin fe alé zin Valé we blɛnnu lé é a kɛlɛ blaminu lɛ, a we ma ma.

³² ’Wa tɔ bié zén‐ékeva munu méléna, Yé ’wa kɛlɛ blɛn mi segelenu méléna ma.

³³ Éé yuunu nɔlaan fɛna gale nya, Yé éé ’yibɔnanu nɔlaan tɛrɛ gale nya,

³⁴ Tɛrɛ lé éé fɛ dɔa di, éé a nɔlaan wɛtɛrɛ nya, Mi nyanénu lé woo nyanaan ana, wolé we ma.

³⁵ Éé nyéné saa lé fɛna kɛla ’yiguru nya, Yé éé tɛrɛ gale nɔlaan ’yibɔnanu nya,

³⁶ Yé munu lé lɔrɔ ke wo gyɛna, éé wo nyanaan ana. Woo fla paan, nyanale ana we gi;

³⁷ Woo fɛwɔlɛnu vɔa féinu ta, yé woo dɔrɔyilinu suruan, Yé woo féifɛnu soo ana.

³⁸ É wo drɔɔ vo yé wo faan Yé é ’ka wolé winu ’léé zana a gi lo.

³⁹ Mi yaale wo ta koo, we tɔntɔn bɔle wo ma koo, nyané blele koo, Dé wo ’léé kɛlɛ kiéne yé ’bɛ wo tua,

⁴⁰ Gakelebale éé nyé yélié mi blɛnnu ma Yé éé wo kɛla nɔɔzannu nya é boa bwi gi, ’té wo ’ka zi yé lo.

⁴¹ Naa, éé nyanégyɛzannu sié wolé nyané gi, Yé éé wo gɔnɔlamunu kɛla kiɛre bélé trubɛnu zo.

⁴² Mi tegelenu éé ’bɛ yé, yé wo gi éé nanaan, Naa, weple kɛlɛzannu faa lɔlu lɛ a é tanle.

⁴³ Mian a ’wuo ke a ta, ’é tawo we ’konu ta ma, Yé ’é bɔn‐in bɔrɔ Gakelebale lé zin ma ma.