Lɛrɛvɔ Sɛbɛ 106 - Kazambale lé Sebe Sauunu 1979

Bale lé zin lé é a kɛla munu lɛ

¹ ’Ka Gakelebale tɔ zin fe. ’Ka Gakelebale tɔ zin fe, naa, é a é zin. Naa, a nyanai éé zén‐é yifaama.

² De ɛ bɔa Gakelebale kɛlɛwe blɛnblɛnnu zuo fele lɛɛ? De ɛ dan a tɔ zin fele faa sɔɔla lɛɛ?

³ Munuan woo tawoo bélidɔwe ta, ’Té woo we tegele kɛla bléyi faa va, wozé a néné.

⁴ Gakelebale, dé i wezin kɛlɛ ilé munu lɛ, an sele ’é dɔ i gi ma; Dé i bɔ wo va, an sele ’é dɔ i gi ma,

⁵ Léé, munu lé i wo si a va, maa wolé ginanale ye, Yé an gi é nana ilé munu va, Yé anbo ze vɔ ilé munu va.

⁶ Ko wenyané kɛlɛ bélé ko tranu zo, Ko weple kɛlɛ; ko wenaané kɛlɛ.

⁷ Bléyian va lé ko tranu ke Éjipiti tɛrɛ la, wo ’ka ilé gyɛzorowenu gi ’ma lɛ lo, Ilé zin kiɛre sele ’ka dɔ lɛ wo gi lo, Naa, wo nwa i ma Wɛyi sɔnɔ, Wɛyi Sɔɔn sɔnɔ.

⁸ Naa, Bale wo si we gi é tɔ lé we ma, ’Élé plɛplɛ tagɔɔnle munu lɛ we gi.

⁹ É siaa Wɛyi Sɔɔn ta yé ’bɛ béli; Yé é gié wo nya wɛyiwɔlɛ ma bélé fɛna pla zo.

¹⁰ É wo si wo zapazannu lee, Yé é wo so wo nyanézannu lee.

¹¹ ’Yinu wo nyanézannu mini, Wo va mi do kpen ’ka vo lɛ lo.

¹² Yé wo dɔ a dérenu ta, Wo a tɔ zin fe lɛrɛvɔle nya.

¹³ Naa, alé nyanama sele saan wo gi é kele, Wenu lé é dan wo kɛlɛ lɛ, wo ’ka a lɛsɔɔle lɛbɛn lɛ lo.

¹⁴ Naa, bli bɔle fɛnu ma wo kun bwi gi, Yé wo Bale gi dan nyéné saa lé fɛna.

¹⁵ Woo wean ma laan a lee, é a kɛlɛ wo lɛ, Naa, é kwéé gyɛ vɔ wo ma.

¹⁶ Wo maawo Moizi ma fla, Yee valé Gakelebale lé mi sauun Arɔn nya.

¹⁷ Yé tɛrɛ é lɛ so yé é Datan mini, Yé é lɛ tan Abiram valé élé munu ta.

¹⁸ Yé kyɛ bi mi gu ’ko méléna, Yé kyɛnɛnɛ mi plenu ble.

¹⁹ Wo diriné kɛlɛ Orɛb gɔ ma, Wo dia ’wo bli la kyan diriné ’ko ’lɛ.

²⁰ Wo ’wolé fua Bale tavɔɔ Dirigɔné lé, éé lu blé, a yili nya.

²¹ Wo Siéwegizan Bale lé É we blɛnnu kɛlɛ Éjipiti tɛrɛ la,

²² Yé é gyɛzorowenu kɛlɛ Sam tɛrɛ la, Yé é we blɛnblɛnnu kɛlɛ Wɛyi Sɔɔn sɔnɔ, wo gi san a ma.

²³ Amalé é léé, é dan wo kulu ga lɛ, Naa, fɛana lé Bale bli nwa wo ma, Moizi lé, Bale a si a va, é dɔ ’bɛna, Yé é alé bliflile wo ma nɔla, yé é alé wo kulu gale yi ga.

²⁴ Yé tɛrɛ lé éé mi gi nanaan é baba, wa ye boatɛrɛ nya, Wo ’ka ’wo bli vo lɛ Gakelebale dére lɛ lo,

²⁵ Wo gun gyɛ wolé sɔkɔnnu gi, Yé wo ’ka a dére lɛdɔ lɛ a ma lo.

²⁶ Amalé é bɛ nwa, léé, É dan wo gyɛ lɛ bwi gi yé ’wo ga,

²⁷ É dan wo kulu ga lɛ bɛnnu méléna, É dan wo nwɛɛn lɛ tɛrɛ la.

²⁸ Yé wo péli vɔ Baal‐Péɔɔ va, Yé wo mivunbanwi ble.

²⁹ Wo Gakelebale bli fli wo kɛlɛwenu nya, Yé mi gyɛgyɛ vɔ wo ma.

³⁰ Yé Finé nwa yé é Bale bli dɔrala, Yé migyɛgyɛ ’ko ’wuo dɔ.

³¹ Wo we ’ko ye Finé ma we tegele nya, Mi kulu faa va, lɛɛfaama.

³² Wo Gakelebale blifliwe kɛlɛ Mériba ’yi bai, Yé Bale we lɛdɔ Moizi gi wolé we ma,

³³ Naa, wo Moizi bli kyɛ dɔ, Yé é we pla fe é kele.

³⁴ Bɛnnu lé Gakelebale a fe Izraɛlnu lɛ léé, ’wo wo kulu ga, Wo ’ka wo kulu ga lɛ lo.

³⁵ Wo vɔɔ ’bɛnu nya, Yé ’bɛnu kɛlɛwenu vɔ wo lee.

³⁶ Wo ’bɛnu lé miyilinu bɔ, Yé ’bɛ kɛlɛ wo kunsan nya;

³⁷ Wo wolé miyilinu ban ’Wo benu valé ’wo lunu nya,

³⁸ Wo weanwiinlozannu nyɛ zana, Wo benu valé wo lunu nyɛ lé. Wo Kanaan tɛrɛ la miyilinu ban ’wolé nénu nya, Yé wo ana tɛrɛ sɛrɛ migyɛle nya.

³⁹ A zo lé wo ’wobozen tiri dɔ ’wo kɛlɛwenu nya, Yé wo kɛlɛwenu kɛlɛ bélé bɔrɔdɛ le kɛlɛwe zo.

⁴⁰ Gakelebale bli fli élé munu ma, Yé é ’élé munu ye bélé naaninvɔmafɛ zo.

⁴¹ É wo pa bɛnnu lee. Yé wo zapamunu pla wo nwiin,

⁴² Wo nyanézannu yaa wo ta, Yé ’bɛnu wo zun ’wolé plɛplɛ wuo.

⁴³ Bale wo si we gi gɔnɔ kiɛre nya, Naa, wa é nwale a ma ’wo bli gi. Yé wolé weple lé we ma lé wo kɛlɛ wenaanébɔmazannu nya.

⁴⁴ É wolé siaalenu ’ma aan wo, É wolé kleblele ye duowo.

⁴⁵ Wolé we ma lé alé gipawe sele dɔ a gi; Alé zin blɛn yɛrama lé é nyanai zén wo ta.

⁴⁶ Yé é we kɛlɛ léé, munu lé, ’bɛnu wo kɛlɛ wolé luu nya, ’Bɛnu nyanai é zén wo ta.

⁴⁷ Gakelebale, kozé Bale, ’i ko si we gi. ’I ko si bɛnnu méléna, yé ’i ko zén ékeva, léé, Ko i tɔ ’lɛzan kɛlɛ blɛn Yé ko i tɔ zin fe ginanale nya.

⁴⁸ Gakelebale, Izraɛlnu zé Bale, a drɔɔ ’é vo ma, Lɛɛfaama, a glɛ ’ka lo! Yé munu faa a fe léma: Amɛɛn! ’Ka Gakelebale tɔ zin fe!