Lɛrɛvɔ Sɛbɛ 105 - Kazambale lé Sebe Sauunu 1979

Bale valé élé munu

¹ ’Ka Gakelebale tɔ zin fe, ’ka a tɔ laa. ’Ka a kɛlɛwe blɛnnu zuo fe munu méléna.

² ’Ka lɛrɛ vɔ, ’ka a tɔ bɔ lɛrɛvɔlenu nya, ’Ka a panyanama blɛnnu faa glewo.

³ A tɔ ’lɛzan lé we ma, ka gi ’é nana. Wo lé woo Gakelebale naginian, wo gi ’é nana ma.

⁴ ’Ka Gakelebale laa, ’é bɔ ka va élé plɛplɛ nya. ’Ka a yara gini bléyi faa do do ma.

^5-6 A wuozan Abraam kulunu, ’Kaa Jakɔb lé nénu lé é ka si a va, Weblɛnblɛnnu lé é a kɛlɛ, wo sele ’é dɔ ka gi ma, Gyɛzorowenu valé weblelenu lé woo sié a ’léé, wo sele ’é dɔ ka gi ma.

⁷ Gakelebale a kolé Bale nya; Alé webledérenu a tɛrɛ faa la.

⁸ Alé gipawe sele éé dɔa a gi yifaama, Alé blivolɛdérenu lé é wo fe mi kulu wuru soru zé nya, a sele a a gi.

⁹ Gipawe lé é a kɛlɛ Abraam va, Yee valé balekundére lé é a fe Izak lɛ, wo sele a a gi.

¹⁰ É a dɔ gligli bélidɔwe nya Jakɔb zé nya. É a kɛlɛ gipawe lé a glɛ ’ka lo, a nya, Izraɛl zé nya,

¹¹ A fele nya léé: An dan Kanaan tɛrɛ nɔ lɛ i lɛ, Izé tɔnɔ nya.

¹² Bléyian va lé é we ’ko fe, ’té wo ’ka di lo, ’Té wo ’léé a kiéné, ’té wa bɛn nya ana tɛrɛ la,

¹³ ’Té woo voo nɔɔna bɛnnu ta, ’Té woo sié bɛn do va yé woo goo bɛn bɛ va;

¹⁴ Naa, Bale ’ka zi nɔ lɛ mi do lɛ léé, é yaa wo ta lo, Yé é we lɛdɔ mi nwiinzannu gi wolé we ma.

¹⁵ Yé é léé: Té ka bɛ mane munu lé an nyɔnɔ zén wo nwiin, wo ma lo, Té ka wenaané bɔ anlé balelayemunu ma lo.

¹⁶ Bale léé, lɔrɔ ’é dɔ tɛrɛ la, yé ’bɛ dɔ, Yé é wolé fɛblele nyaa wo lee.

¹⁷ Naa, é mi do pa zia wo ’lɛ, Jozɛfu lé; yé wa dan.

¹⁸ Wo gɔgɔbale fɔnɔ a gane ma Yé wo foliɛwɔlɛbale vɔ a bɔrɔ ma.

¹⁹ É vo a zo Fɔɔ yé we lé é a fe é bwenu lɛ, Gakelebale dɔ a zuo yé a lɛ sɔɔ.

²⁰ Minwiinzan blɛn alé balenu si a ma, Yé bɛnnu nwiinzan a vo éboma,

²¹ Jozɛfu kɛlɛ alé kɔnzan nya, Yé é ’élé fɛnu faa bɛ pa a lee, léé,

²² É pla mi blɛnnu nwiin élé blibɔmawe yɛrama, Yé é we paa alé mi segelenu gi.

²³ ’Bɛ zuo Izraɛl munu da Éjipiti tɛrɛ la, Yé Jakɔb nyana Sam tɛrɛ la.

²⁴ Yé Gakelebale ’élé munu kɛlɛ né kiɛre yaazannu nya, Yé wolé plɛplɛ gié ’wo nyanézannu zé ta.

²⁵ É nyanézannu bli nɔla léé, ’wo ’élé munu za pa, Yé ’wo dabli kɛlɛ é wuozannu lɛ.

²⁶ É ’é wuozan Moizi nwunvɔ, Yee valé Arɔn lé, é a si a va, a nya.

²⁷ Bale lé plɛplɛ nya lé wo weblɛnblɛnnu kɛlɛ Éjipiti munu va, Yé wo gyɛzorowenu kɛlɛ Sam tɛrɛ la.

²⁸ Bale zi dɔ gunuti nya, Yé Moizi valé Arɔn Bale dére ’ma yé wo ’ka a lɛga lɛ a ma lo.

²⁹ Bale wolé ’yinu kinin nyɛ nya, Yé é wolé pɔnu gyɛ.

³⁰ Yolunu bɔra wolé tɛrɛ la di, Wo kɛlɛ ana fɔɔ minwiinzannu lé kɔnnu gi.

³¹ É we fe, yé kyɛ nyɔnɔgɔnénu bɔra, Yé gɔanu bɔra wolé tɛrɛ la fɛfaana.

³² É goowɔlɛlɛɛ pa zia lɛɛ pa gi, Yé é kyɛnɛnɛnu bi wolé tɛrɛ la,

³³ É wolé dɔrɔyilinu valé wolé bɔrɔyilinu gyɛ, Yé é wolé tɛrɛ la yilinu yéli.

³⁴ É we fe, yé flɛlɛ bɔra, Flɛlɛnu lé, wo nɔnɔ ’léé ’ka lo, wo nya.

³⁵ Yé wo tɛrɛ la lu faa ble, Yé wo féiyili poronu faa ble.

³⁶ É wolé né vininzannu faa gyɛ wolé tɛrɛ la, Wolé pɛniɛ la né vininzannu faa lé.

³⁷ Bale ’élé munu fwi Éjipitinu va, gɔɔli valé kyan nya ’wo lee, Yé alé bɛnnu va mi do kpen sɔnéwɔlɛ ’ka san lɛ zia lo.

³⁸ Éjipiti munu gi nana wo gole we ma, Naa, wo kana wo lee, azama.

³⁹ É lafu bua wo ta Yé é kyɛ bɔra wo takinile é béli we gi.

⁴⁰ Wo wi laa a lee, yé é sawɛnu nɔ wo lɛ, Yé é wo kan lagi buru nya.

⁴¹ É gɔlɛ blɛn lɛ so yé ’yi bɔra, Yé é yoro fɛna galenu na bélé yuu zo.

⁴² Naa, a dére ’lɛzan sele dɔ a gi, Yé a wuozan Abraam sele dɔ a gi.

⁴³ É ’élé munu fwi ginanale blɛn nya, Munu lé é wo si a va, é wo fwi, ’té woo siaan ginanale nya.

⁴⁴ É bɛn bɛnu lé tɛrɛ nɔ wo lɛ, Yé nyanama lé bɛn bɛnu a pa, wo a tɔnɔ ble,

⁴⁵ Wolé a déretawenu kɛlɛle we gi, Wolé alé bélidɔwenu ta tawole we ma. ’Ka Gakelebale tɔ zin fe.