Lɛrɛvɔ Sɛbɛ 104 - Kazambale lé Sebe Sauunu 1979

’Wo fɛ faa Kɛlɛzan tɔ bɔ

¹ An boen, ’i Gakelebale drɔɔ vo. Gakelebale, anzé Bale, i blɛɛn glɛ ’ka lo. Fua valé tɔbɔle a é zénle i ta bélé sɔ zo.

² Éé san zén‐é ’é ta bélé sɔ zo, Éé la sɔɔlaan bélé sɔ fwilale zo.

³ É élé kɔn dɔ ’yinu ta loru baa, Yé éé lafunu kɛla élé goro nya. Éé tawoo fu nya.

⁴ Éé funu kɛla élé nwunvɔzannu nya, Éé kyɛnɛnɛnu kɛla élé nyanamapazannu nya.

⁵ É tɛrɛ gane vɔ gligli, A ma ’ka dan nyɔɔn lɛ pelo.

⁶ Bé ta yɔɔ guru lé a wɔlɛ ma nyaana ’ka lo, a nya, bélé sɔ zo. ’Yinu gɔblɛnnu mini;

⁷ I siaa ’yinu ta tɔɔn, wo go vlan nya, Wo ilé zagele vun wele ’ma tɔɔn, yé wo wɔra ékeva.

⁸ Gɔblɛnnu nwa loru, yé gɔworonanu zun tɛrɛ, Fɛ lé béna gɔɔn wo lɛ, ana.

⁹ I ’yinu glɛ dɔ, léé, té wo glɛ kini lo, Té ’wo nɔla é ziin tɛrɛ ta sɔɔlale we ma lo.

¹⁰ Éé ’yibɔnanu kɛla, ’té wona ’yinu éé bɔraan, ’Té woo yoroan gɔnu worona.

¹¹ Yé bwigiwinu faa éé ’yi minian ana, Yé bwi gi sokofalenu éé ’yiminilɔrɔ sié ’wo ma ’bɛna.

¹² Lagi mianénu éé nyanaan a gɔ la, ’Té woo wé yilibɛnu ta.

¹³ Kazambale éé nyanaan lagi loru baa, ’té éé ’yi nwɛɛn‐an gɔblɛnnu ta; Alé nyanama tɔnɔ éé tɛrɛ kaan.

¹⁴ Éé lu bɔraan winu zé nya, Yé éé yili sɛsɛnénu bɔraan munu mawe kɛlɛfɛ nya, Tɛrɛ lé fɛ dɔle we ma.

¹⁵ Yé nwɛ lé éé mi gi nanaan, Yee valé nyɔnɔ lé éé mi yara kɛla yɔrɔyɔrɔ, éé wo bɔraan, É valé buru lé éé mi dɔa plɛplɛ, wo nya.

¹⁶ Gakelebale lé yilinu kan ’yi nya, Sɛdrɛyilinu lé é wo suru Liban tɛrɛ la, wo lé.

¹⁷ Wo nwiin lé mianénu woo kɔn dɔa; Bwibalo éé nyanaan siprɛyilinu ta.

¹⁸ Gɔ torolenu a bwigibolinu zé nya. Yé gɔlɛnu a wi lé wa laama daman, wo yɔɔna nya.

¹⁹ Kazambale moné kɛlɛ, bléyinu gɔɔnle we ma, Yiri é vɔbléyi dɔɔ.

²⁰ I dan gunutinu nya yé béli éé taan, ’Té pɔrɔgiwinu faa zén tawole va;

²¹ Golizra boronénu woo siaan wolé fɛblele zuo, Yé wo ’wolé fɛblele ma laan Bale lee.

²² Dé yiri nwa tɔɔn, woo sié ana, Yé woo yiaan ’wo nyanana.

²³ Mi éé bɔraan élé nyanama pale we gi, Yé éé voo élé nyanama pana fɔɔ yé nyanadi é pa.

²⁴ Oo Gakelebale, i panyanamanu a di. I wo faa kɛlɛ wedɔɔle nya, Tɛrɛ a é fanle i kɛlɛfɛ zinnu nya.

²⁵ Wɛyi lé é ke blɛɛn, ’té a laala ke é gyɛle, yee lé ke bɛ. A va lé fɛ yuɛmale kiénénu valé fɛ yuɛmale blɛnnu lé, Wo nɔnɔ ’léé ’ka lo, wo ke.

²⁶ A ta lé ’yitagoronu éé tawoo, Wo valé wɛyi va fɛ yuɛmale blɛn lé bé kɛlɛ léé, ’é zana gyɛ wɛyi va, wo nya.

²⁷ Winu faa bli a i lɛ léé, Dé ’wolé fɛblele nɔbléyi bɔ, i dan a nɔ lɛ ’wo lɛ.

²⁸ Bé no wo lɛ, yé wa sian, I i lee fuoan, yé woo kaan fɛ zin nya.

²⁹ Dé i yara si wo ta, ’bɛ éé gi bɔrɔ paan wo ma, I i flinle sié wo lee yé woo gaan, Yé woo nɔlaan é ziin ’wolé vun nya.

³⁰ I flinle paan zia yé i wo kɛlɛ a nya, Yé i tɛrɛ yuɛla kɛla fɛ dɛrɛ nya é ziin.

³¹ Gakelebale lé fuasan ’é vo ana yifaama ma. Yé Gakelebale gi ’é nana ’é kɛlɛfɛnu ma ma.

³² Dé é tɛrɛ nagini tɔɔn, ’té a ma a nyɔɔnna, Dé é bɛ mane gɔ blɛnnu ma tɔɔn, ’té kyɛgoi a bɔrɔana wo gi.

³³ An dan Gakelebale tɔ vɔ lɛ lɛrɛ nya anlé tɛrɛla faa gi, An dan anzé Bale kɛlɛ lɛ blɛn an yuɛma bléyi faa va.

³⁴ An dérenu ’é kɛlɛ néné a tɔné gi ma, Maa a a va léé, an gi ’é nana Gakelebale gi.

³⁵ Wenyanékɛlɛzannu ’wo si tɛrɛ la ma, Weplekɛlɛzannu kulu ’é ga ma. An boen, ’i Gakelebale drɔɔ vo, ’Ka Gakelebale tɔ zin fe ma.