Lɛrɛvɔ Sɛbɛ 103 - Kazambale lé Sebe Sauunu 1979

Bale lé sɔlɛle

¹ David zé lé. An boen, ’i Gakelebale drɔɔ vo. Maa i tɔ blɛn drɔɔ vo an bli faa nya ma.

² An boen, ’i Gakelebale drɔɔ vo, Yé we zinnu lé é a kɛlɛ i lɛ, té i gi é san a do kpen ma lo.

³ Yee ɛ i ma we voo ilé weplenu faa ma, Yee ɛ i bélié ilé gyɛnu faa gi,

⁴ Yee ɛ i sié ga lee. Yee ɛ zin valé nyanai zénle woo i ’wuo ma bélé tɔkoro zo;

⁵ Yee ɛ i kaan fɛ zima zima nya i kwala gi, Yee ɛ i nɔlaan mi boroné nya é ziin bélé gola kwakwa éé nɔlaan é sua nya fɛan zo, a zo.

⁶ Gakelebale éé we tegele kɛla, Yé munu faa lé vanu éé yaan wo ta, éé wolé we blé tegele.

⁷ É ’élé wekɛlɛbɛ gɔɔn Moizi lɛ, Yé é ’é kɛlɛwenu gɔɔn Izraɛlnu lɛ.

⁸ Gakelebale nyanai éé zén‐é, yé é mi mawe dɔɔ, A bli ’ka flian é kele lo, yé alé zin a blɛn;

⁹ É ’ka zɔ dɔa mi va yifaama lo, Alé bliflile ’ka goo é ’lɛ yifaama lo,

¹⁰ É ’ka kolé we lɛgi paan kolé wenyanénu yɛrama lo, É ’ka we lɛdɔa ko gi kolé weplenu yɛrama lo.

¹¹ Naa, fɛan zo lé la ke é sile tɛrɛ ma baa, A zo lé alé zin ke blɛn, munu lé woo kanaan a lee, wo vazia.

¹² Fɛan zo lé yirivɔna ke é sile yirinwana ma baa, A zo lé éé kolé bélidɔwe sɛrɛlenu sié ko ma baa.

¹³ Fɛan zo lé né ti nyanai éé zén‐é élé nénu ta, A zo lé Gakelebale nyanai éé zén‐é munu lé woo kanaan a lee, wo ta.

¹⁴ Naa, fɛan é ko kɔlɛ kɛlɛ a nya, é a dɔɔ, A sele a a gi léé, ko a vun nya.

¹⁵ Naa, blami yinu a bélé lu zo, Éé vwi bié bélé féi lunu zo,

¹⁶ Dé fu gié a ma tɔɔn, ’té é ’ka ana é dɛrɛ lo, Yé fɛ lé é ke ana é kyɛn, ’bɛna ’ka a yé é dɛrɛ lo.

¹⁷ Naa, munu lé woo kanaan Gakelebale lee, alé zin éé voo wo ta lɛɛfaama, Yé a nyanai éé zén‐é wo é nénu é nénu ta,

¹⁸ Munu lé woo alé gipawe kɛla, Yé alé bélidɔwe sele éé dɔa wo gi, ’té wa lɛ sɔɔan, woo lé.

¹⁹ Gakelebale élé webleblin dɔra gligli la gi, Yé é a é plale fɛnu faa nwiin.

²⁰ Ka lé ka ke alé lanjenu nya, ’Té ka ke plɛplɛ é baba, ’té ka tawoo alé bélidɔwenu ta, ’Té ka a dére lɛdɔama, ’ka Gakelebale drɔɔ vo.

²¹ Ka faa lé ka ke alé gulidanzannu nya, ’Té ka a a wuozannu nya, ’té ka alé blibɔmawe kɛla, ’ka Gakelebale drɔɔ vo.

²² Ka lé ka ke a panyanama nya, Fɛ faa lé ka ke ana, ’té Bale ke é plale ka nwiin, ’ka Gakelebale drɔɔ vo. An boen, ’i Gakelebale drɔɔ vo.