Lɛrɛvɔ Sɛbɛ 102 - Kazambale lé Sebe Sauunu 1979

Pɛniɛ lé di kini a gi, alé bazorole

¹ Ba lé nyanéblezan a zoro, bléyian va lé a fuu si a ta, ’té éé nyanainya dére fé Gakelebale lɛ, yee lé.

² Gakelebale, ’i tɔné dɔ anlé bazoro dére lɛ, Yé an siaale ’é bɔ i va ma.

³ Yian nya lé kleblele da an va, té i yara yɔɔ an ma lo. Dé maa a siaana, ’i tɔné dɔ an lɛ, Yé ’i anlé bazoro dére ’ma yé bé nyi si é kele ma.

⁴ Naa, anlé yinu éé giéan bélé kyɛgoi zo, Yé an wɔlɛnu kyɛ éé blé bélé kyɛnyɛ zo.

⁵ An bli a bélé lu lé wa wo, ’té a ma zɔrɔ, a zo, Yé fɛblele sele saan an gi.

⁶ An dunnule plɛplɛ lé we ma lé An kwéé.

⁷ Maa a bélé valusanbla zo, Maa a bélé banblégunbɛ lé éé nyanaan fla kwa la, a zo;

⁸ Maa ’ka yi gya é dɛrɛ lo, Yé maa a bélé miané lé éé nyanaan kɔn nwiin é do, a zo.

⁹ Yi faa do do ma an nyanézannu éé sɔnɔdére fé an lɛ, Yé woo an tɔ ’nyɔɔn‐an yo nya wolé bliflile zi.

^10-11 I bli nwale valé i bli flile lé we ma lé An vungoi blé fɛblele pa gi, Yé an yuɛyi a é vɔɔle an mininwɛ nya. Naa, i an nwa yé i an vuli baa.

¹² Anlé yinu a bélé nyanadi furɔ zo, Yé an zɔrɔan bélé lu zo.

¹³ Naa, bii Gakelebale, ilé plale mi nwiin glɛ ’ka lo, Yé i tɔ sele a mi kulu faa gi.

¹⁴ I dan nwa lɛ, yé i dan i nyanai zén lɛ Siɔn munu ta; Ilé nyanai zénle wo ta bléyi bɔ, Bléyi lé bé dɔ, é bɔ sin.

¹⁵ Naa, alé gɔlɛnu sɔ ko, i wuozannu lɛ, Yé alé vungoi we a ko lee.

¹⁶ Yé bɛnnu é dan kana lɛ Gakelebale tɔ ma, Yé tɛrɛ la minwiinzannu faa é dan kana lɛ alé fuasan lee.

¹⁷ Iin, Gakelebale é dan Siɔn dɔ lɛ é ziin. É dan ébo gɔɔn lɛ munu lɛ élé fua nya.

¹⁸ Éé nyanaizénlazan lé bazoro dére maan, É ’ka dan serele bo lɛ alé bazoro dére ma lo.

¹⁹ ’Wo we ’ko gyɛ mi kulu lé wo ’ka tan bɔra lɛ lo, wozé nya ma, Yé munu lé wo dan wo yaa lɛ, ’wo Gakelebale kɛlɛ blɛn ma.

²⁰ Naa, Gakelebale a élé fɛna sauun lé é ke la gi loru baa bɛ, ana, ’Té éé tɛrɛ la naginian,

²¹ Luugimunu lé dunnule ’male koo, Munu lé wo dan zamaga wo lɛ, wo vole woboma koo, a we gi.

²² É dan we ’ko kɛlɛ lɛ léé, ’wo Gakelebale tɔ sɔɔla Siɔn, Yé wa tɔ zin fe Jérusalɛm,

²³ Bléyian va lé migɔnɔnu zén ékeva, É valé bɛntɛrɛ faa nya, Gakelebale bɔle we ma, a bléyi va.

²⁴ É anlé plɛplɛ si an lee zia, É anlé tɛrɛla yi kenu si a ta.

²⁵ Maa léé: Anzé Bale, bii lé i yi ’léé ’ka lo, Té i an yinu bɔi a ta lo.

²⁶ Bii ɛ tɛrɛ kɛlɛ é kyɛn, Yé lagi a i bɛ panyanama nya.

²⁷ Wo dan gié lɛ, naa, bii éé voo ana; Wo faa é dan kɛlɛ lɛ é kwa bélé sɔ zo; I dan wo tavɔɔ lɛ bélé varɔ zo, yé wo ta é dan vɔɔ lɛ.

²⁸ Naa, bii, éé voo i dɔbɛ duo gi, Yé i lɛɛ ’ka lɛɛnu va lo.

²⁹ I wuozan benu é dan nyana lɛ wobo lé tɛrɛ la, Yé wo kulu é kulunu é dan vo lɛ ana i ’lɛ kli.