Lɛrɛvɔ Sɛbɛ 10 - Kazambale lé Sebe Sauunu 1979

We tegele ma laa bazorole

¹ Oo Gakelebale, mɛmalé i a é dɔle baa? Mɛmalé i yɔɔan kleblebléyi vaa?

² Mi nyanénu lé boblɛn ma lé woo wenaané bɔmazannu zuo bin‐é, Wolé vɔmizidére bɛ, éé woboen kunwo.

³ Naa, mi nyanénu woo ’wobo tɔ bɔa wolé blibɔmawe nya, Yé kyeenwozannu lé woo mi gya, woo Gakelebale sɔnɔan, ’té woo nyé yélié a ma.

⁴ Mi nyané a fé boblɛn naané nya léé: É ’ka we lɛdɔa mi gi lo. Bale ’ka pelo. Bé ye, alé ’wuogibɔrɔlenu faa lé ke bɛ.

⁵ Yifaama a kɛlɛwenu nyian é wo, Ilé weblelenu a a ma baa, é ’ka wo gi maan lo, É ’ka é nyanézannu yé we do nya lo.

⁶ É lé é bli gi léé, ’é sɔnéwɔlɛ ’ka saan lo. É a é yɔɔle yifaama we tɔntɔn lee.

⁷ A ’léé a é fanle balepalenu koo, dabli kɛlɛle koo, mitablelenu koo, wo nya, Miblifliwe valé weple a a nɛnɛ la.

⁸ Éé voo é yɔɔle flanu sɔnɔ ’wiile flanu ta we ma, Éé weanwiinlozannu gya, fɛna yɔɔlenu na. Éé wenaané bɔmazannu naginian é yuɛ nyané nya.

⁹ É a é yɔɔle é yɔɔna bélé golizra lé ke é yiana, a zo. É a é yɔɔle é yɔɔna, a bɔrale wenaané bɔmazan ma fiaa yé é dia wo ta we ma. Éé din‐é a ta yé éé a ganaan élé séli nya.

¹⁰ Éé tuaan, ’té é a é bliile Yé éé nyanaizénlazannu kunwo é sɔné nya.

¹¹ Yé é lé é bli gi léé: We sele éé saan Bale gi. É ’é yara yɔɔan; é ’ka a naginian monomono lo.

¹² Gakelebale, ’i nwa, oo Bale, ’i bɛ nwa; Té wenaané bɔmazan sele é saan i gi lo.

¹³ Mɛmalé mi nyané éé nyé yélié Bale maa? Mɛmalé é a fena é bli gi léé: I ’ka we lɛdɔa mi gi loo?

¹⁴ Naa, i a naginina duowo; i kleblele valé nyanéblele yé Wele wolé we ma we gi. I lee lé wenaané bɔmazannu wobozen bɛ paan, Bii ɛ bɔa bugalazan valé tigalazan va.

¹⁵ ’I mi nyanénu bɛ yéli, ’I wolé weplenu lɛgi pa, ’wo san i yuɛ gi.

¹⁶ Gakelebale a minwiinzan nya yifaama, a glɛ ’ka lo, É bɛnnu nyaa élé tɛrɛ la,

¹⁷ Oo Gakelebale, i nyanéblemunu lé balekundérenu maan, I wo bli ta dɔa plɛplɛ; i tɔné dɔa wo lɛ

¹⁸ We tegele kɛlɛle ti valé bugalazan lɛ we gi, é valé munu lé woo yaan ’bɛnu ta, ’bɛnu lɛ; Wo we ’ko kɛlɛ léé, blami lé wa si tɛrɛ va, té é di blɛn kini mi gi bɛwo é ziin lo.