Wegɔnévɔlenu 9 - Kazambale lé Sebe Sauunu 1979

Wedɔɔle valé ’tugyɛwe

¹ Wedɔɔle élé kɔn dɔ, élé kɔnwɛyili sɔrafié ma nyaa.

² É élé winu bɔrɔ bo, é élé dɔrɔ kuu, yé é élé tablé ma’lɛrɛ.

³ É wuolomu nwunvɔ, éé siaan fla gɔ nwiin yé é léé:

⁴ ’Wuoplɛplɛzannu ’wo wɔra ’ko‐oo ’ko! É lé ’wuosɛrɛzannu lɛ léé:

⁵ ’Ka daoo ’ka da, ’ka anlé buru ble, ’ka anlé dɔrɔ kuule mini;

⁶ ’ka daan ’wuoplɛplɛwe ma yé ka dan vo lɛ é yuɛma; ’ka tawo gikiniwe zuo.

⁷ Mi lé éé we plaan wenanazan lɛ, é dan ’bɛ gini lɛ é yuɛ zuo glan‐un, yé mi lé éé mi nyané drɔan, é dan ’bɛ sɔnɔ lɛ.

⁸ Té i we pla mimawenanazan lɛ lo, dé é da i za pa; ’i we pla wedɔɔzan lɛ yé i dan sɔ lɛ a lɛ.

⁹ ’I we paa wedɔɔzan gi yé é dan we taa dɔɔ lɛ; ’i we paa mi tegele gi yé alé wedɔɔle gi é dan gyɛ lɛ.

¹⁰ Wedɔɔle pélisiana lé ke kanale Gakelebale lee nya, yé gikiniwe a mi sauunnu lé wedɔɔle nya.

¹¹ Maa nya lé ilé yinu taa é dan pa lɛ, yé ilé tɛrɛla lɛɛnu gi é dan gyɛ lɛ.

¹² Dé i we dɔɔ, ’té i we dɔɔ ibo lɛ; dé i a mi ma wenanazan nya, i dan a ma ban ye lɛ i do.

¹³ Tavowe a bélé lɔlu le zo, a ’wuo a plɛplɛ yé é ’ka we do kpen dɔɔa lo.

¹⁴ Éé nyanaan élé kɔn ’léé, éé nyanaan blin ta fla gɔ nwiin,

¹⁵ giémunu lé wo yara ke wolé zi ta tegele, siaale wo lɛ we gi, yé é léé:

¹⁶ ’Wuoplɛplɛzannu ’wo wɔra ’ko‐oo ’ko! É lé ’wuosɛrɛzan lɛ léé:

¹⁷ ’Yi lé wa kyeenwo, é a néné, yé fɛblele lé wa sia kyeen nya, a we a.

¹⁸ Yé gɔnézan ’ka a gi dɔɔa léé, gamunu ana mi lo, yé munu lé é wo laa, wa gamunu nyanana wɔlɛ ma lo.