Wegɔnévɔlenu 8 - Kazambale lé Sebe Sauunu 1979

Wedɔɔle tɔbɔle

¹ Wedɔɔle ’ka siaana loo? Gikinile ’ka é dére nwana loo?

² Éé dɔa gɔ la loru zi sɔnɔ, É valé zi blannu ta;

³ É a siaana flagɔrɔ ’léé koo, Gɔrɔ gi koo, kɔn ’léénu koo, wona, yé é léé:

⁴ Munu, ka lɛ lé an siaan, Yé an dére éé we fé blaminu lɛ.

⁵ ’Wuoplɛplɛzannu, ’ka wevasile draan; ’Tugyɛzannu, ’ka gikinile draan.

⁶ We blɛn a an ’léé, amalé ’ka tɔné dɔ, Yé an lɔlu lɛ fuoan we drɔle paale i gi we ma.

⁷ Naa, an ’léé éé weboen fé, Yé viéwole za a an lɔlu gi;

⁸ An ’léé dére faa a tegele, Vié valé blinɔladére ’ka wona lo.

⁹ Mi lé a ’wuo ke a ta, éé wo faa yé wéiin, Yé wonu lé wo wedɔɔle ye, wa é drɔle wozé nya.

¹⁰ Anlé wepaale ’é sɔ i lɛ é mini gɔɔli ta ma, Yé wedɔɔle ’é sɔ i lɛ é mini kyan wezan baba ta ma.

¹¹ Naa, wedɔɔle mini gɔlɛwezan pɛrɛlnu ta, A vlɛ mini fɛwezan faa ta.

¹² Maa, wedɔɔle, maa nyanaan wevasile va, Yé maa bɔn‐in danle dɔɔ.

¹³ Kanale Gakelebale lee lé ke wenyané za pale nya; É bɔluzan yele kiéné koo, boblɛn koo, tawobɛ naané koo, ’Léé nyané koo, wo za a an gi.

¹⁴ Weplale valé wevagyɛle a anzé nya; Gikinile lé ke an nya, plɛplɛ a anzé nya.

¹⁵ An nya lé minwiinzannu éé plaan munu nwiin, Yé minwiinzannu benu éé munu béli dɔa we tegele nya;

¹⁶ An nya lé dutinu koo, Mi segelenu koo, tɛrɛ la weblezannu faa koo, woo plaan munu nwiin.

¹⁷ Munu lé an sɔ wo lɛ, wo sɔ an lɛ, Yé munu lé woo an ginian, woo an yé.

¹⁸ Maa va lé fua koo, tɔbɔle koo, Mɔnfɛnu koo, we tegele koo, wo ke.

¹⁹ An tɔnɔ fila vɔ é mini kyan lɛ, é mini kyanbozen lɛ, Yé an mafɛnu fila vɔ é mini gɔɔlifu ta.

²⁰ Maa tawoo wetegele zi ta, Yé an tawoo zi drɔlenu méléna,

²¹ Fɛ zin nɔle we gi munu lé an sɔ wo lɛ, wo lɛ, ’Bɛ valé wolé fɛwezannu fanle we gi.

²² Gakelebale an bɔra élé nyanama vinin nya, Alé nyanama faa va maa ɛ ke alé nyanama kwa nya.

²³ Dé é an bɔra ’té bléyinu ’ka lo, A pélisia bléyi va tɛrɛ bɔrale ’lɛ, ’té maa ana é kwakwa.

²⁴ Bléyian va lé gurunu valé ’yibɔnanu ’ka lo, ’Bɛ bléyi va lé wo an yaa.

²⁵ Bléyian va lé é ’ka tan gɔnu bɔra lɛ lo, Bléyian va lé gɔpanénu ’ka lo, ’bɛ bléyi va lé wo an yaa;

²⁶ ’Bɛ bléyi va tɛrɛ koo, féinu koo, Tɛrɛwɔlɛ kiiéné boen koo, é ’ka tan wo do kpen kɛlɛ lɛ lo.

²⁷ Bléyian va lé é la kɛlɛ, ’té maa ana; Bléyian va lé é fɛ diri tɛrɛ guru ta loru,

²⁸ Yé é latinu pla loru, ’Té guru gi ’yibɔnanu éé dun‐an plɛplɛ,

²⁹ Yé é wɛyi glɛ dɔ yé ’té wɛyi ’ka é glɛ kinié lo, Yé é tɛrɛ gane vɔ,

³⁰ ’Bɛ bléyinu va, ’té maa a a sɔnɔ nyanama pana a va, Yé maa a yifaama a ginanamazan nya, Yé an gi éé nanaan a yara,

³¹ ’Té an gi éé nanaan a kɛlɛtɛrɛ ma, ’Té maa anlé zin yé blaminu méléna.

³² Yé sin an benu, ’ka tɔné dɔ an lɛ; Munu lé woo tawoo anlé tawobɛ gi, wozé a néné.

³³ ’Ka tɔné dɔ wepaale lɛ, ka kɛlɛle wedɔɔzannu nya we ma. Té ka sɔn vɔ a ma lo.

³⁴ Mi lé éé tɔné dɔa an lɛ, ’Té é ke é yuɛma yi faa do do ma anlé kɔnnu ’léé, ’Té éé yuɛ paan anlé duoli vɔiyili?-?nu va, ’bɛzan zé a néné.

³⁵ Naa, mi lé é maa ye, é bélile ye, Yé é Gakelebale lé zin ye.

³⁶ Naa, mi lé éé wenyané kɛla an ma, éé wenyané kɛla ébozen ma; Munu faa lé woo an za paan, gale sɔ wo lɛ.