Wegɔnévɔlenu 7 - Kazambale lé Sebe Sauunu 1979

¹ An be, ’i an dére pa i ’wuo gi, yé ’i anlé wepladére vo i va.

² ’I tawo anlé weplale yɛrama yé i dan vo lɛ é yuɛma. We lé maa a paa i gi, ’i yuɛ pa a va bélé i yuɛzooné zo.

³ ’I wo yere i bɛnwɔlɛnu ma. ’I wo gyɛ i bli gi bélé sɛbɛ zo.

⁴ Bé fe wedɔɔle lɛ léé: Bii a an buru nya. ’I ’wuoatawe laa, i bwɛ.

⁵ Wo dan i tabin lɛ bɛn le lee, bɛn le lé éé dére néné fé, a lee.

Gɔné gini lomu

⁶ Maa a é dɔle anlé kɔn fɛnɛti ta, yé maa a nagini anlé fɛnɛti gligli la.

⁷ Maa ye ’wuoplɛplɛzannu méléna, maa gɔné do ye pɛniɛnu méléna, gɔné lé a ’wuo ke é sɛrɛle, maa a ye.

⁸ É a giéna kɔn méléna zinu ta, zi blan do lé bɛn le do ke é dɔle a ta, ana, yé é gié a sɔnɔ, yé é go alé kɔn ’léé;

⁹ ’té bɛlaa la gunu dɔra yé béli tan, yé gunu dɔra tiritiri.

¹⁰ Yé bé ye, lezan do da a va, ’té bɔrɔdɛ varɔ a a ta yé dabli a a bli gi.

¹¹ Lezan a lɔluzan nya, yé yara ’ka a gya lo; é ’ka nyana é péli la ébo lé kɔn ’léé lo;

¹² é a wo tatané kɔn méléna zi ta valé flɛnu gi, é a zi blannu faa sɔnɔ zi dɔle nya gɔnénu lee.

¹³ É gɔnézan kun yé é a tuu gyɛ, ’té yara ’ka a ’wuo ma lo yé é léé:

¹⁴ É a lé maa bɔvɔ saraka bo, kyɔ anlé bale kunle lɛ sɔɔ.

¹⁵ Bɛwemalé an bɔra i ’lɛ, i ginile we gi, yé maa i ye.

¹⁶ Maa anlé yialafɛ ma’lɛrɛ sɔnu nya, sɔnu lé wa tan Éjipiti kununu nyɔɔzannu nya, a nya;

¹⁷ miré koo, aloɛ koo, sinamom koo, maa wo nwɛɛn anlé yialafɛ ta lasikɔrɔ nya.

¹⁸ ’I da, ko tu kini ’wuosɛrɛ sɔlɛle nya, kobo nɔ ko sɔle ko ke lɛ gi nanale nya lɛ.

¹⁹ Naa, an zana ’ka kɔn ’léé lo, é go ta baa wo lɛ;

²⁰ é go gɔɔli bala nya é lee yé é ’ka dan da lɛ lao lo fɔɔ, ’té moné dɛrɛ bɔra.

²¹ É a saan é dére néné fele nya, é goan gla nya élé we néné fele nya.

²² Gɔnézan go a zuo é nya do, bélé diri lé é go wigyɛna, a zo, bélé sulasulagyɛzan lé wa yere a blale we gi, a zo,

²³ fɔɔ, yé sawɔlɛ a bli fɔn, bélé miané lé ébo vɔ séli gi, yé é ’ka a gi dɔɔa léé, ézé nyaana lé, lo, a zo.

²⁴ Yé sin, an benu, ’ka an ban ka tɔné nya, ’ka tɔné dɔ an ’léé dére lɛ.

²⁵ Té i bli nɔla le ’ko zoɛ giégane va lo, té i saan yé i go alé zinu ta lo.

²⁶ Naa, é mi kiɛre tuo yé é wo dia, yé gɔnénu lé é wo gyɛ, wa di.

²⁷ Alé kɔn a gamunu nyanana lé zi nya; é go guru gi zia.