Wegɔnévɔlenu 6 - Kazambale lé Sebe Sauunu 1979Weplalenu ( WGV 11:15 ; 12:26–27 ; 20:25 ) 1 An be, dé i kɛlɛ i bɔluzan lé we?-?yuru nya, dé i kɛlɛ mi bɛ lé vɛɛn yuru nya, 2 ’té i ’léé dére i kun, ’té i ’léé dére i yere. 3 An be, bé kɛlɛ ’ko zo: i a i bɔluzan wuo, bɛwemalé ’i si we ’ko gi. ’I go, ’i ’wuo wɔra a gane wuo, ’i zanté vɔ a lɛ é baba; 4 té i yi gyɛ lo, té yi é vɔ i yuɛ la lo. 5 ’I si we ’ko gi, bélé gan éé vlan buruwo lupazan lee fɛan zo, a zo; bélé miané éé sié é gyɛzan lee fɛan zo, a zo. 6 Kun‐anwozan, ’i go wanwan va; bé lé tawobɛnu nagini yé i gi ’é kini ma. 7 Alé duti koo, a taginizan koo, a nwiinzan koo, a do kpen ’ka lo; 8 é ’élé fɛblele sian lɛɛ da bléyi va, éé blefɛ zun dɔa fɛgyɛbléyi va. 9 Kun‐anwozan, i dan vo lɛ é yiale fɔɔ mɛ bléyi vaa? I dan vuo lɛ mɛ bléyi nyaa? 10 ’I yi gyɛ sɛ, ’i flin sɛ, ’i bɛ vɔ é ke la sɛ yé ’i yi gyɛ, 11 nyané é dan i gyɛ lɛ fiaa bélé kyeenwozan zo, yé lɔrɔ é dan dɔ lɛ ilé kɔn ’léé bélé gulidanzan zo. 12 Mi vɔnle, weplekɛlɛzan, éé tawoo é ’léé lé vié nya; 13 éé yuɛ bɛ do lɛ taan; éé we fé é gane nya, éé tɔmase kɛla é bɛnwɔlɛnu nya; 14 we vɔnle a a bli gi, é ’wuo gi bɔrɔan wenaané ma bléyi faa va. Éé zɛn vɔa. 15 É ziin, a sɛrɛle é dan bɔ lɛ fiaa; wo dan a ’wii lɛ bléyi do nya tata yé é ’ka bɔa nwale lɛ lo. 16 Fɛ suiɛdo ’ka sɔ lɛ Gakelebale lɛ lo, maa fé, a sɔrafié faa za a a gi: 17 mi gini é yuɛ zuozannu koo, viéwo nɛnɛ koo, munu lé woo weanwiinlozan nyɛ nwɛɛn‐an koo, 18 weple gi bɔrɔ bli koo, ganenu lé woo vlan buruwo wenyané kɛlɛna koo, 19 dabli wenayezan lé éé vié woo koo, mi lé é bwenu vɔa ékema koo, woo lé. Bɔrɔdɛ lomu 20 An be, ’i tawo i ti lé wepladére yɛrama, té i sɔn vɔ i bu lé wepaale ma lo. 21 ’Wo vo i bli ma yifaama, ’i wo vɔ i bɔrɔ ma. 22 Dé i a tawona, wo dan zi gɔɔn lɛ i lɛ, dé i a yigyɛna, wo dan yuɛ pa lɛ i va, yé dé i vuo wo dan we fe lɛ i lɛ. 23 Naa, weplale a kyɛbɔ nya, yé wepaale a kyɛsan nya, yé mi drɔ dérenu a mibélizi nya. 24 Wo dan i tabin lɛ ’wuosɛrɛ le lee, é valé bɛn le ’léé dére néné lee. 25 Té i bli é bɔ a ma a nɔnɔmi we ma lo, yé té i daan ibo ma léé, é i saan é yuɛtakɔné gyɛle nya lo. 26 Naa, bɔrɔdɛ le lé we ma lé mi ébo gya nyané nya fɔɔ yé sɔwuliné do é vo a bɔrɔ ma, yé bofla le éé san vɔa mi lé bélile wezan lee. 27 Mi é kyɛnyɛ zén é golɛ gi yé alé varɔ kyɛ ’ka blé loo? 28 Mi é tawo kyɛnyɛ ta yé a gane kyɛ ’ka blé loo? 29 A zo duo lé éé kɛla mi lé é go é bɔluzan na vazia, a lɛ; mian é bɛ mane a ma, é ’ka dan vo lɛ é pla lo. 30 Dé lɔrɔ a kyeenzan gyɛna, yé é kyeen wo é kanle we gi, wo ’ka a voo é pla lo; 31 dé wa kun, é dan a banwo lɛ gɔnɔ sɔrafié, é dan élé kɔngifɛnu faa nɔ lɛ. 32 Naa, mi lé é mi bɛ na ginian, a ’wuo a é sɛrɛle; mi lé éé we kɛla ’bɛ zo, yee ɛ ébo saan; 33 tuole valé tɔ sɛrɛle saa lé é dan a ye lɛ, yé yara ’ka dan si lɛ a ’wuo ma monomono lo. 34 Maawole éé mi bli flian é baba yé a nyanai ’ka dan zén lɛ welɛgipa yi nya lo; 35 é ’ka dan a ma folifɛ do kpen si lɛ lo, dé bé ban ’léé gi gyɛoo, é ’ka dan wo si lɛ lo. |
Alliance Biblique de Cote d'Ivoire 1979
British & Foreign Bible Society