Wegɔnévɔlenu 5 - Kazambale lé Sebe Sauunu 1979

Mi bɛ na valé mi bɛ zana ginile

¹ An be, ’i anlé wedɔɔdére ban i tɔné nya, ’i tɔné dɔ anlé gikiniwe lɛ,

² i vole i gi bɔrɔna we gi, é valé wedɔɔle vole i gi we ma.

³ Naa, zɔrɔnyɔnɔ a bɛn le lɔlu gi, yé a ’léé a néné é mini wɛ ta;

⁴ naa, é voéla é a é nyanale bélé kɔnɔn zo, yé a lɛ a bélé ’léé fié gwɔun zo.

⁵ A gane éé zunwo ga vazia, a gane pa éé bɔa gamunu nyanana.

⁶ É ’ka é gi bɔrɔan mibélizi ma lo. Alé zinu a saanzinu nya yé é ’ka é gona dɔɔa lo.

⁷ Yé sin, an benu, ’ka tɔné dɔ an lɛ; té ka sɔn vɔ an ’léé dérenu ma lo.

⁸ Zi lé éé goo a va, ’i si a ma baa, té i bié alé kɔn ’léé lo,

⁹ dé i da i tɔbɔle nɔ mi bɛ lɛ, yé gi pɔnpɔnzan i lɛɛnu bɔi a ta

¹⁰ dé bɛnnu é da kan ilé fɛnu nya yé ilé nyanama gooli é go bɛnnu ié kɔn gi;

¹¹ dé i da dunnu izé ’wuo pla bléyi va, ’té i nɛ valé i kɔlɛ é blé,

¹² yé i léé, mɛmalé munu lé an drɔle za kɛlɛ an gii? Mɛmalé an bli weplale an lɛ ye boawe nyaa?

¹³ É kɛlɛ kaa yé an ’ka anzannu dére ’ma lɛ lo, yé an ’ka tɔné dɔ lɛ munu lé wo we paa an gi, wo lɛ loo?

¹⁴ É vo sɛ yé wenaané faa é bɔ an ma munu valé zén‐ékeva munu méléna.

¹⁵ ’Ibo lé ’yiguru gi ’yi mini, ’yinu lé woo bɔa ilé ’yiguru gi, bé mini ma.

¹⁶ É a lé ilé ’yibɔnanu éé yoro béeraa? É a lé ilé ’yibaanu é yoro flaworo dii?

¹⁷ ’Wo kɛlɛ bii do kpen zé nya ma, té wo kɛlɛ i va bɛnnu zé nya lo ma.

¹⁸ Ilé ’yibɔna drɔɔ ’é vo ma, yé i gi ’é nana i boronéla le va ma,

¹⁹ ’é sɔ i lɛ bélé gan?-?blané zo, bélé gɔrɔ nɔnɔmi baba zo; ’i a nyɔnu ye izé nya bléyi faa ma yé a sɔle i lɛ ’é i sia ana bléyi faa ma ma.

²⁰ An be, mɛmalé bɛn le i sian anaa? ’té i ’bɛ vɔa le bɛ nyɔnu zii?

²¹ Naa, mi lé tawobɛnu a Gakelebale lé éé mi lé zinu naginian, a yuɛ va.

²² Wo dan wenyanékɛlɛzan kun lɛ ébo lé wenyané kɛlɛna, alé wenyané balenu a yerean.

²³ Wo ’ka we paa lɛ a gi lo, amalé é dan ga lɛ. É élé tavole glɛ kini, bɛwemalé é dan san lɛ.