Wegɔnévɔlenu 4 - Kazambale lé Sebe Sauunu 1979

Wedɔɔle ma tɔnɔ

¹ An benu, ’ka tɔné dɔ mi ti do lé wepaadére lɛ, ’ka tɔné dɔ flee, wedɔɔle we gi;

² naa, maa we zin gɔɔn‐an ka lɛ, té ka sɔn vɔ anlé wepaale ma lo.

³ Maa a an ti be wɔlɛ do nya, maa a an bu be wɔlɛ do kpen lé é sɔ a lɛ é baba, a nya.

⁴ An ti we paa an gi, yé é lé an lɛ léé: An dére ’é vo i bli gi ma; ’i anlé weplale nyi si yé é dan vo lɛ é yuɛma.

⁵ ’I we dɔɔ, i gi ’é kini; té i gi é san an ’léé dérenu ma lo, yé té i yara si wo ta lo.

⁶ Té bé vo lo, yé é dan é yuɛ pa lɛ i va; i bli ’é bɔ a ma, yé é dan i takuun lɛ.

⁷ Wedɔɔle pélisiana lé ke ’ko: I gi ’é kini, yé dé ilé fɛ faa no a we gioo, ’i kɛlɛ ’wuoatazan nya.

⁸ Bé tɔ bɔ, yé é dan i nwa lɛ; dé bé tuu gyɛ é dan kɛlɛ lɛ i tɔbɔwe nya;

⁹ é dan tɔkoro zin wo lɛ i ’wuo ma, yé é dan tɔbɔkoro zin nɔ lɛ i lɛ.

¹⁰ An be, ’i tɔné dɔ, yé ’i an dére nyi si; yé ilé tɛrɛla lɛɛnu taa é dan pa lɛ.

¹¹ Maa wedɔɔzi gɔɔn‐an i lɛ, yé maa goo i nya zi drɔlenu ’léé.

¹² Dé i a tawona fɛ do kpen ’ka dan vɔ lɛ i gane gi lo; dé i a vlan buruna, i gane ’ka dan vɔ lɛ fɛ gi lo.

¹³ We lé wa paa i gi, ’é vo i gi, té é san i gi lo; é a i bélifɛ nya amalé bé tabin.

¹⁴ Té i wɔra wenyanékɛlɛzannu lé zi ’léé lo, yé té i tawo mi naanénu lé tawobɛ gi lo.

¹⁵ ’I paa a ma, té i gié ana lo; ’i nɔla, ’i gié fɛ bɛna zia.

¹⁶ Naa, dé wo ’ka tan wenyané kɛlɛ lɛ lo, wo ’ka yi gya lo, dé wo ’ka tan mi saan lɛ lo, yi ’ka wo gya lo;

¹⁷ naa, wenyané ɛ ke wo bleburu nya; glawe ɛ ke wo mininwɛ nya.

¹⁸ Mi tegelenu lé zi a bélé san lé éé bié nyananyana, a zo; a bile gi éé goo gyɛle nya fɔɔ yé yiéyi é pa.

¹⁹ Wenyanékɛlɛmunu lé zi a bélé gunuti zo; fɛ lé éé wo diaan wo ’ka a yé lo.

²⁰ An be, ’i tɔné gi bo wéiin yé i an dére ’ma, yé ’i tɔné dɔ anlé wefedére lɛ.

²¹ Té i si wo ma baa lo; ’i wo yɔɔ i bliwɔlɛ ma;

²² naa, munu lé wo wo ye, wa wo bélifɛ nya yé éé fu vɔa wo kɔlɛ faa ma.

²³ ’I yuɛ pa i bli va é mini fɛ bɛ faa ta; bélile ’wuo si ana, bɛwema.

²⁴ ’I viéwe si i ’léé, ’i dablidérenu si i ’léé.

²⁵ ’I yuɛ dɔ i ’lɛ tegele ma, té i yuɛ vɔ fɛ bɛna zia lo.

²⁶ ’I gi bɔrɔ zi lé i ke giéna a ta, a ma ma, yé ilé tawobɛ faa ’é kɛlɛ tegele ma.

²⁷ Dé é a i bɛyila nyaoo, dé é a i bɛbola nyaoo, té i nɔla ana lo, yé ’i gane si wenaané kɛlɛna zia.