Wegɔnévɔlenu 31 - Kazambale lé Sebe Sauunu 1979

We lé wa pla minwiinzan blɛn lɛ

¹ Minwiinzan blɛn Lémuɛl dérenu lo. We gɔ do do lé a bu we paa a gi wo nya, wo lo.

² An be, maa dan fe lɛ i lɛ nɔɔ? An giné, maa dan fe lɛ i lɛ nɔɔ? Anlé bale kun‐ama be, maa dan fe lɛ i lɛ nɔɔ?

³ Té ilé plɛplɛ nɔ lomu lɛ lo, té i giébɛ bɛ pa lomu lé woo minwiinzannu saan, wo lee lo.

⁴ Lɛmuɛl, nwɛ minile ’ka minwiinzannu zé nya lo, dɔrɔ minile ’ka minwiinzan benu zé nya lo,

⁵ dé wo da a mini yé wo gi é san bélidɔwe ma yé wo ’ka a se kɛla nyanéblemunu lɛ lo.

⁶ ’Ka dɔrɔ lɛ plɛplɛ nɔ zamaga wo munu lɛ, ’ka nwɛ nɔ blikyɛdɔmunu lɛ,

⁷ yé wa mini yé wo gi é san nyané lé é wo gyɛ, a we ma, yé wolé nyanéblele sele ’ka dɔa wo gi é dɛrɛ lo.

⁸ ’I ’léé fuo bobogyɛzan lé we gi, wo valé sɔnvɔmamunu lé we gi.

⁹ ’I ’léé fuo, ’i wolé we ble tegele ma, ’i dɔ nyanéblemunu valé nyanégyɛmunu zuo ma.

’Wuoata le

¹⁰ Mi kyɛn ɛ bɔalɛ yé é le tegele yee? A wea é mini gɔlɛwezan pɛrɛlnu ta.

¹¹ A zana a é pale a ta, yé tɔnɔ ’ka vuruan a zana ma monomono lo.

¹² Lezan éé we zin kɛla é zana lɛ, é ’ka wenaané kɛla a lɛ lo, alé tɛrɛla faa gi.

¹³ Éé ’blakyɛɛ valé lɛn sié yé éé nyanama paan é bɛnu nya gi nanale nya.

¹⁴ É a bélé yaawo ’yitagoro zo, éé sié baa élé fɛ nya.

¹⁵ Éé nwaan tukinigunu nya yé éé fɛ no élé kɔngimunu lɛ yé éé nyanama no é wuolomu lɛ.

¹⁶ Éé gi bɔrɔan féi do ma yé éé a lɔa; alé nyanama mafɛ nya lé éé dɔrɔféi paan.

¹⁷ Éé plɛplɛ vɔa é sɔ ma sɔ nya, yé éé bɛnu dɔa plɛplɛ.

¹⁸ É a ye léé, élé nyanama tɔnɔ a; alé kyɛbɔ ’ka dirian é béli lo.

¹⁹ Éé kunwo kununu lii ma yé a bɛnwɔlɛnu éé kunwo dian‐yili ma.

²⁰ Éé bɛ soian nyanéblemunu lɛ, éé lee fuoan nyanégyɛmunu lɛ.

²¹ Kana ’ka a gi léé, dunu é dan élé kɔngimunu gyɛ lɛ lo, naa, alé kɔngimunu faa éé sɔ sɔɔn zén‐é ’wo ta.

²² Éé sɔnu taan, alé sɔnu a lɛnsɔ valé galunaa sɔ nya.

²³ A zana a lɛamazan nya flagɔrɔ ’léé, ’té dé é nyana ana mi segelenu va.

²⁴ Éé varɔnu kɛla yé éé wo daan, éé kyɛsidinu daan yaawomunu lee.

²⁵ Éé plɛplɛ valé tɔbɔle zén‐é ’é ta sɔ nya yé éé yéri sié tɛlɛ tɛlama ma.

²⁶ Éé ’léé fuoan wedɔɔle nya, yé wepaale zima a a nɛnɛ la.

²⁷ A yuɛ a élé kɔngiwe faa ta é zima, yé é ’ka kun‐anwozan blefɛ blé lo.

²⁸ A benu éé nwaan yé wa drɔɔ vo, a zana éé nwaan yé é a tɔ bɔ.

²⁹ Lomu kenu woo we kɛla tegele, naa, bii gié wo faa ta.

³⁰ Zin a dabli nya, yé yara nɔnɔmi a fɛ boa nya; lezan lé éé kanaan Gakelebale lee, yee lé wo dan a tɔ bɔ lɛ.

³¹ ’Ka a ban alé nyanama ma tɔnɔ nya ma, a kɛlɛwenu a tɔ zin fe flagɔrɔ ’léé ma.