Wegɔnévɔlenu 30 - Kazambale lé Sebe Sauunu 1979

Aguu dérenu lé

¹ Jaké be Aguu dére lé ke ’ko. Dére gɔ do do lé é a fe Itiɛl valé Ukal lɛ, wo lé ke ’ko.

² Weboen nya, an ’wuo a plɛplɛ é mini mi faa ta; An gi ’ka é kinile bélé mi zo lo;

³ An ’ka we dɔɔa lo, yé we lé mi sauunnu a dɔɔ, maa ’ka a dɔɔa lo.

⁴ De ɛ go la gi yé de ɛ zuun? De ɛ fu kun é lee? De ɛ ’yinu yere élé sɔ gii? De ɛ tɛrɛ glɛ ta bɔraa? A tɔ lé nɔɔ? yé wa be tɔ laama nɔɔ? Bé fe an lɛ do, ’té dé bé dɔɔ.

⁵ Bale dére faa gi a é danle. Munu faa lé wa ’wo yɔɔna ginina Bale va é a wo botakuunfɛ nya.

⁶ Té bé dére taa pa lo, dé é da we pla i lɛ yé wo i ye viézan nya.

Wegɔnévɔle bɛnu

⁷ Maa we fié ma laa i lee, té i wo nyané kɛlɛ an lɛ an gale ’lɛ lo.

⁸ I viéwe valé viédére si an ma baa; té i an gyɛ nyané nya lo, té i an kɛlɛ fua nya lo; ’i fɛblele nɔ an lɛ anlé fɛblele yɛrama,

⁹ dé an da fɛ kiɛre ye, yé maa sɔn vɔ i ma yé maa léé, de ɛ ke Gakelebale nyaa? Taa, dé nyané é da an gyɛ yé maa kyeen wo yé maa anlé Bale tɔ sɛrɛ.

¹⁰ Té i mi wuozan tɔ sɛrɛ ézan lɛ lo, dé é da bale pa i ma yé ibo gyɛ we nya.

¹¹ Migɔnɔ do ana yé woo bale paan ’wo ti ma, yé wo ’ka ’wo bu drɔɔ voo lo.

¹² Mi gɔnɔ do ana yé é dɔ ’wo gi léé, ’wo bli gi a é bɔle, ’té wo ’ka ’wo tiri sié lo.

¹³ Migɔnɔ do ana yé woo mi naginian ’wo yuɛ zuo, ’té wo yuɛ a é fuole.

¹⁴ Migɔnɔ do ana yé wo suiɛ a gwɔun nya yé wo puowɔlɛ a sɛnnénu nya tɛrɛ la nyanéblemunu minile we gi, munu va nyanégyɛzannu minile we gi.

¹⁵ Miin lu a fié yé wo léé: Bé nɔ! Bé nɔ! Fɛ yaa ana yé lɔrɔ ’ka sié wo ma lo, fɛ ziɛn boen ’ka fé léé: É sɔ, monomono lo:

¹⁶ Gamunu nyanana koo, sɔn le koo, tɛrɛ lé é ’ka kaan ’yi nya lo koo, kyɛ koo, wo ’ka a fé léé: É sɔ, monomono lo.

¹⁷ Mi lé éé we nanaan é ti ma yé éé sɔn vɔa é bu lɛdɔle ma a ma, kanwéi é dan a yuɛ so lɛ a gi, yé gola lé nénu é dan a ble lɛ.

¹⁸ We yaa ana, an ’ka wo gi maan ’lo, wa bozenwo ziɛn, an ’ka bɔa wo gi ’male lɛ lo;

¹⁹ gola nyɔnɔ lé é ke la gi koo, méné nyɔnɔ lé é ke gɔlɛ la koo, ’yitagoro nyɔnɔ lé é ke wɛyi la koo, gɔné nyɔnɔ lé é ke blɛnzan lé kɔn ’léé koo, woo lé.

²⁰ Gɔné bɛ ginizan lé wekɛlɛbɛ lé ke ’ko: Éé fɛ blé, éé lɛ ma booan, a zuo é léé: Maa ’ka wenaané kɛlɛ lɛ lo.

²¹ Fɛ yaa ana, tɛrɛ ma éé nyɔɔn‐an wo lee; fɛ ziɛn ana tɛrɛ ’ka bɔa dɔle lɛ wolé we wuo lo:

²² Luu lé é kinin minwiinzan nya koo, ’tugyɛzan lé é kan fɛblele nya koo,

²³ sereleboma le lé é bo si koo, mi wuo le lé é ézan zara ble koo, woo lé.

²⁴ Wi ziɛn a tɛrɛ la, wa kiéné, naa duowo wo gi kini é baba.

²⁵ Zɔnéné?-?nu ’ka plɛplɛ lo, yé wo ’wolé fɛblele ma’lɛra lɛɛdabléyi va;

²⁶ wi lé wa laama daman, é ’ka plɛplɛ lo, yé wo ’wo nyanana kɛla gɔlɛkoro gi;

²⁷ gangannu nwiinzan ’ka lo, naa, woo goo ’wo palu ma palu ma;

²⁸ bɔwiiboli lé wa kun ’wo bɛ nya, yé é a minwiinzannu lé kɔnnu gi, woonu lé.

²⁹ Fɛ yaa ana yé wa é nɔnɔmi, fɛ ziɛn boen, wolé tawobɛ a é nɔnɔmi;

³⁰ golizra lé ke winu va nyanazan nya yé é ’ka biéan ’é zuo fɛ do kpen lee lo, ’bɛ a do;

³¹ wisoo lé gulidanfɛnu ke a ta, ’bɛ a do; boligɔné a do; minwiinzan lé mi do kpen ’ka bɔa dɔle lɛ a ma plɛplɛ lo, ’bɛ a do, woo lé.

³² Dé boblɛn i nyunu léé, ’i ’tugyɛwe kɛlɛ, dé i gi bɔrɔle a é naané, ’i bɛ pa i lɔlu ta.

³³ I dirinyɔyi gya?-?gian yé bé nyɔnɔ ye fɛan zo, i fɛ duun‐an mi nyé lɛ yé a nyɛ é so fɛan zo, a zo duo lé, mi bliflile éé dan wesiale nya.