Wegɔnévɔlenu 3 - Kazambale lé Sebe Sauunu 1979

É we pla pɛniɛnu lɛ

¹ An be, té i gi é san anlé wepaale ma lo, yé anlé bélidɔwenu ’é vo i bli gi ma;

² naa, wo dan i yinu valé ilé tɛrɛla lɛɛnu taa pa lɛ, yé wo dan i vole drɔɔ gi gyɛ lɛ.

³ Té wezin valé yarapale we ta é si i ma lo; ’i wo vɔ i bɔrɔ ma, ’i wo gyɛ i bli gi bélé sɛbɛ zo.

⁴ ’Bɛ zo lé i dan zin ye lɛ yé i gi boen é dan kini lɛ Kazambale valé munu yuɛ va.

⁵ ’Ibozen bɛ pa Gakelebale lee i bli faa nya, té i bli é vo ibozen lé wedɔɔle lɛ lo;

⁶ ’i gi bɔrɔ a ma ilé tawobɛ faa gi, yé é dan ilé zinu ta bɔ lɛ ékema.

⁷ Té ibozen ye wedɔɔzan nya lo; ’i kana Gakelebale lee, yé ’i yara si wenyané ta;

⁸ ’bɛ ɛ dan fu vɔ lɛ i miin ma, yé é dan i kɔlɛ wɔlɛ gi dɔ lɛ é ma.

⁹ ’I Gakelebale bɔ i leefɛnu valé ilé féifɛ vininnu faa nya,

¹⁰ yé ilé fɛzénban é dan fan lɛ fɛ kiɛre nya, yé ilé dɔrɔporo borogigɔlɛ ’woli é dan zana lɛ a ma.

¹¹ An be, té i Gakelebale lé i drɔle ye boawe nya lo; té kana é vɔ i gi alé we lɛdɔle i gi ma lo;

¹² naa, mian sɔ Gakelebale lɛ éé we lɛdɔa a gi, bélé fɛan zo lé né ti a kɛla élé néwezan lɛ, a zo.

¹³ Mi lé é we dɔɔ, azé a néné, ’bɛ valé mi lé a ’wuo ke a ta.

¹⁴ Naa, wedɔɔle mafɛ mini gɔɔlifu zé la, yé a tɔnɔ fila vɔle mini kyan ta;

¹⁵ a wea é mini gɔlɛwezan pɛrɛl ta, yé a vlɛ mini fɛwezannu faa ta.

¹⁶ Mɔnle tɛrɛ la a wedɔɔle bɛyi lee; fua valé tɔbɔle a a bɛbo lee.

¹⁷ Alé tawobɛnu a tawobɛ sɔlenu nya, yé alé zinu faa a vole drɔɔ zinu nya.

¹⁸ É a mibéliyili nya munu lé wa kunwo, wozé nya, yé munu lé wo we dɔɔ, wo gi a é nanale.

¹⁹ Wedɔɔle nya lé Gakelebale tɛrɛ kɛlɛ, gikinile nya lé é lanu dɔ gligli.

²⁰ ’Wuoatawe nya lé gurunu lɛ so, yé latinu éé fli vɔa.

²¹ An be, té i si wepaale ’konu ma baa lo, ’i wedɔɔle valé bɔn‐in bɔrɔle tadɔ izé nya;

²² wo dan kɛlɛ lɛ i bélifɛ nya, ’bɛ valé i bɔrɔmakyan nya.

²³ Yé i dan tawo lɛ ilé zi ta, té kana ’ka i gi lo yé i sɔné ’ka dan san lɛ lo.

²⁴ Dé i yia, kana ’ka dan vɔ lɛ i gi lo; dé i a yiɛna, i dan yi gyɛ lɛ drɔɔ.

²⁵ Té i kana dikiniémigiwe lé éé bɔa mi ma fiaa, a lee lo; té i kana wenyanékɛlɛmunu baale i ta lee lo;

²⁶ naa, Gakelebale é dan kɛlɛ lɛ i tabélidɔzan nya, yé é dan é yuɛ pa lɛ ilé tawogane va, yé wo ’ka zi dɔa i lee lo.

²⁷ Mi lé a yara lé i we zin kɛlɛ a lɛ, té bé nyané kɛlɛ a lɛ lo, ’té dé fɛ a i lee.

²⁸ Dé fɛ a i lee, té bé fe i bɔluzan lɛ léé, ’i go yé ’i da, tɛlɛ yé maa dan a nɔ lɛ, lo.

²⁹ Dé i bɔluzan a é nyanale drɔɔ i sɔnɔ, té i gi nyané bɔrɔ a ma lo.

³⁰ Dé mi ’ka wenyané kɛlɛ lɛ i lɛ lo, té i boawe ble a va lo.

³¹ Té i wɛwɛdɔzan ma maawo lo; té i alé tawobɛ do kpen sia lo.

³² Mi vɔnlenu a é naané Gakelebale yuɛ gi, naa, Bale a mi drɔlenu béé nya.

³³ Gakelebale a é pale wenyanékɛlɛzan gɔnɔlamunu ma, naa, éé mi tegele nyanana drɔɔ voo;

³⁴ éé we nanaan wenanazannu ma, naa, éé zin kɛla bokiénézannu lɛ;

³⁵ wedɔɔzannu é dan tɔ ye lɛ wozé nya, naa, yaragyɛwe é dan kɛlɛ lɛ ’tugyɛzannu zé nya.