Wegɔnévɔlenu 29 - Kazambale lé Sebe Sauunu 1979

¹ Mi lé a yara a lé, wo we pla a lɛ, yé é ’ka é ’wuo dɔa a wuo lo, wo dan a ’wii lɛ za ma, té a lia ’ka lo.

² Dé mi tegelenu gi gyɛ munu gi éé nanaan; dé mi naané pla wo nwiin munu éé dunnuan.

³ Mi lé wedɔɔle éé sɔa a lɛ, é é ti gi nanaan; naa, mi lé éé goo bɔrɔdɛ lomu va, é élé fɛnu sɛra.

⁴ Minwiinzan é élé tɛrɛ dɔa gligli we tegele kɛlɛle nya, naa, mi lé éé blɛfɛnu sié, éé a guru zanaan a gi.

⁵ Mi lé é é bɔluzan ze vɔa dabli nya, éé san plaan a gane wuo.

⁶ Mi naané lé wenyané a sanbale nya, naa, we ’wuo éé voo mi tegele lɛ yé a gi éé nanaan.

⁷ Mi tegele nyanégyɛzannu gi we dɔɔ, naa, mi naané ’ka ’wuoatawe gi maan lo.

⁸ Mi ma we nanazannu éé flawe kyɛ dɔa, naa, wedɔɔzannu éé bliflile ta zanaan.

⁹ Dé wedɔɔzan za vɔ ’tugyɛzan va, dé a bli flioo, dé é yéri sioo, é ’ka dan flin lɛ lo.

¹⁰ Mi nyɛzanamunu éé mi wéiin za paan, naa, mi drɔlenu éé wo ta béli dɔa.

¹¹ ’Tugyɛzan élé bliflile faa bɔraan, naa, wedɔɔzan ézé ta dɔa.

¹² Dé mununwiinzan éé tɔné dɔa viédérenu lɛ, a wuomunu faa a mi naanénu nya.

¹³ Nyanégyɛzan valé nyanépamitazan éé keeé; Gakelebale ɛ wo fiénu yuɛ va kinié.

¹⁴ Minwiinzan lé éé nyanégyɛzannu lé we blé tegele a plale mi nwiin glɛ ’ka dan dɔ lɛ lo.

¹⁵ Vlewɔlɛ valé mi drɔle, woo mi kɛla wedɔɔzan nya, naa, né lé wa vo é pla é dan é bu gyɛ lɛ yara nya.

¹⁶ Dé mi naanénu gi gyɛ, ’té wenyané gi gyɛ, naa, mi tegelenu é dan wo guru zanana a gi ye lɛ.

¹⁷ I we lɛdɔ ilé né gi yé é dan flinle nɔ lɛ i lɛ, yé é dan ibozen gi nana lɛ.

¹⁸ Dé we ta ’ka bɔraan lo, munu ’ka kanaan we ma lo; mi lé éé bélidɔwe ta tawoo, a gi éé nanaan.

¹⁹ Wo ’ka we lɛdɔa luu gi ’wo dére saa nya lo; dé é a ’maoo, é ’ka dan a lɛdɔ lɛ a ma lo.

²⁰ Dé i mi do yé, ’té éé tanyilawe fé, mi bli éé kɛla ’tugyɛzan lɛ é minié yee ta.

²¹ Mi wuozan lé wa pa é zima é kénéné la bléyi va, é voéla é dan kɛlɛ lɛ ézan be nya.

²² Wɛwɛdɔzan éé dan wesiale nya, yé bliflizan éé wenyané kiɛre kɛla.

²³ Boblɛn éé mi kɛla kiéné, naa, woo bokiénézan tɔ bɔa.

²⁴ Mi lé yee valé kyeenwozan éé fɛ gulian, é a ébozen nyanézan nya; éé balepadére maan, yé é ’ka a fé lo.

²⁵ Kanale munu lee a mikunsan nya, naa, mi lé ébo bɛ pa Gakelebale lee, a ta béli a é dɔle.

²⁶ Mi kiɛre a zin ginina ’wo nwiinzannu va, naa, Gakelebale ɛ mi faa lé we yuɛ gi boo tegele.

²⁷ Mi ple a bélé bo zo mi tegelenu yuɛ gi, yé mi lé alé zi ke é drɔle é a bélé bo zo mi naanénu yuɛ gi.