Wegɔnévɔlenu 28 - Kazambale lé Sebe Sauunu 1979

¹ Dé mi do kpen ’ka mi naané zuo bina looo, ’té éé vlan buruwo, naa, mi tegele éé bli ta dɔa plɛplɛ bélé golizra boroné zo.

² Dé tɛrɛ do la munu nwa ’wo nwiinzan ma, minwiinmunu a di, dé mi do ’wuo a é ta yé é we dɔɔ, éé mɔn‐o é plale munu nwiin.

³ Nyanégyɛzan lé éé nyané paan tɔnanénu ta, é a bélé lɛɛ plɛplɛ lé éé fɛnu sɛra, a zo.

⁴ Mi lé éé sɔn vɔa bélidɔwe ma, éé mi naanénu tɔ zin fé, naa, mi lé éé bélidɔwe ta tawoo a bli éé flian wo ma.

⁵ Munu lé wo wobo no wenaané lɛ, wo ’ka we tegele gi maan lo, naa, mi lé éé Gakelebale naginian éé we faa gi maan.

⁶ Nyanégyɛzan lé ke tawona é dɔbɛ wéiin gi, a fila vɔ é mini mi lé alé zinu ke é plinle, ’té éé fua blé, a ta.

⁷ Mi lé éé bélidɔwe ta tawoo é a gikinibe nya, naa, mi lé éé goo wenaané kɛlɛna, é é ti gya yara nya.

⁸ Mi lé élé fɛnu gi gya tɔnɔ yele élé gɔɔli ma valé a pale a ma we ma, éé wo tééan mi lé a nyanai éé zén‐é nyanégyɛzannu ta, azé nya.

⁹ Dé mi é tɔné lɛ tan bélidɔwe ’male ma, alé bazorole boen a bélé bo zo.

¹⁰ Mi lé éé mi tegelenu saan zi naané ta, yeeboen éé diaan guru lé é a bo, a gi; naa, mi lé a dɔbɛ ke wéiin, éé fɛ zin yé élé tɔnɔ nya.

¹¹ É dɔ fuablezan gi léé, ’é we dɔɔ; naa, nyanégyɛzan lé a ’wuo ke a ta, ’bɛ alé wedɔɔle gi daan.

¹² Dé we ’wuo vo mi tegelenu lɛ, é a tɔbɔle blɛn nya; dé mi naanénu nwa, mi faa éé yɔɔan do do.

¹³ Mi lé élé wenyané yɔɔan, alé we do kpen ’ka vɔa a ma lo, naa, mi lé éé wo fé yé éé daan wo ma, yee ɛ nyanai zénle é ta yé.

¹⁴ Mi lé éé kanaan yifaama a gi éé nanaan. Naa, mi lé é bli dɔ plɛplɛ we tɔntɔn éé bɔa a ma.

¹⁵ Mi naané lé éé plaan nyanégyɛmunu nwiin, é a bélé golizra lé ke wena, é valé urisi lé lɔrɔ ke a gyɛna, wo zo.

¹⁶ Minwiinzan lé a ’wuo ’ka a ta lo, éé nyané pale mi ta lɛ sié, naa, mi lé éé fɛ kiɛre yele za paan, é élé tɛrɛla taa paan.

¹⁷ Mi lé mi bɛ nyɛwe ke a nwiin, éé fwian fɔɔ yé é go guru gi; té mi do kpen a diéra lo ma.

¹⁸ Mi lé éé tawoo é dɔbɛ wéiin nya é dan si lɛ we gi, naa, mi lé éé tawoo zi plinle fié ta, é dan dia lɛ a do ta.

¹⁹ Mi lé éé féi paan é dan kan lɛ fɛblele nya, naa, mi lé éé goo boawenu zuo, nyané é dan a gyɛ lɛ.

²⁰ Yarapawelazan drɔɔ vole gi éé gya, naa, mi lé a ta ke kelekele fuablele ma, we lɛdɔle a gi yi ’ka dan ga lɛ lo.

²¹ Mi vabole ’ka é zima lo, yé fɛblele yele lé we ma lé mi é ébo no wenyané kɛlɛle lɛ.

²² Blibɔfɛmazan é ébo tunuan fuablele we gi, yé é ’ka gi dɔɔa léé, lɔrɔ é dan é gyɛ lɛ lo.

²³ Mi lé éé we plaan munu lɛ, é voéla é dan zin ye lɛ é mini mi lé éé mi ze vɔa dabli nya, a ta.

²⁴ Mi lé éé kyeen woo é ti valé é bu ma yé é léé, wenyané ’ka ’bɛ nya lo, é a guruzanaagizan bɔluzan nya.

²⁵ Boblɛnzan éé mi vɔa ékema, naa, mi lé ébo bɛ pa Gakelebale lee, éé kaan.

²⁶ Mi lé éé paan ébozen bli ta, é a ’tugyɛzan nya, naa, mi lé éé tawoo wedɔɔle yɛrama é dan si lɛ we gi.

²⁷ Mi lé éé fɛ no nyanégyɛzan lɛ, fɛ ’ka dan vuru lɛ a ma lo, naa, mi lé éé yuɛ lɛ taan, bale pale a ma é dan kɛlɛ lɛ di.

²⁸ Dé mi naanénu nwaan, mi faa éé yɔɔan do do; dé wo zamaga wo, mi tegelenu gi éé gya.