Wegɔnévɔlenu 27 - Kazambale lé Sebe Sauunu 1979

¹ Té ibo ze vɔ tɛlɛ we kɛlɛle ma lo, naa, we lé éé bɔa yi do do ma, i ’ka a gi dɔɔa lo.

² Mi bɛ ’é i tɔ bɔ ma, té ibo ’léé i tɔ bɔ lo; bɛn ’é i tɔ bɔ ma, té ibo lɔlu é i tɔ bɔ lo.

³ Gɔlɛ bɛn a, yé nyéné gi bɛn a, naa, ’tugyɛzan bliflile bɛn a, é mini wo fiénu ta.

⁴ Bliflikaiizan gi a é pɔnpɔn, yé bliflile a bélé ’yiyoro plɛplɛ zo, naa, mi kyɛɛn ɛ bɔa dɔle lɛ maabole mi va maa?

⁵ We plale mi lɛ gɔrɔ la fila vɔ é mini béé blele kyeen gi ta.

⁶ Dé i béé tuo i lee, ’bɛ ilé yara pale we la nagɔɔn‐an, naa, mi nyané lé pwɛpwɛ vɔle a dabli nya.

⁷ Mi lé é kan, éé sɔn vɔa zɔrɔyoduo blele ma, naa, mi lé lɔrɔ ke a gyɛna, fɛ nyanale faa a a ’léé néné.

⁸ Mi lé éé sié élé fɛna ma baa, é a bélé miané lé éé sié é kɔn ma baa, a zo.

⁹ Nyɔnɔ valé lasikɔrɔ éé mi gi nanaan yé mi béé lé wegɔɔnle mi lɛ sɔlɛle nya, é a néné.

¹⁰ Té i so i béé valé i ti béé va lo, té i go i bwe lé kɔn gi ilé nyanébleyi nya lo; i punmazan lé ke i sɔnɔ a fila vɔ é mini i bwe lé ke baa, a ta.

¹¹ An be, ’i we dɔɔ ma yé an gi é dan nana lɛ yé an bɔ we zi pale lɛ an sɔnɔzan lɛ.

¹² Yuɛikinizan éé wenaané yé, yé éé yɔɔan, naa, nékénénémi éé goo é ’lɛ mi, yé woo we lɛdɔa a gi.

¹³ Mi lé é kɛlɛ mi bɛ lé vɛɛnyuru nya, ’i alé sɔ si; ’i bɛfɛ si a lee, bɛnnu lé we ma.

¹⁴ Mi lé é bɔluzan drɔɔ vo é bladi tutu dére plɛplɛ nya, wo dan a ye lɛ bélé bale pale a ma zo.

¹⁵ Kɔn ’bɔɔle lɛɛ blɛn dayi la valé drɛwo le, wo bɔ ékema.

¹⁶ Dé é sɔ mian lɛ léé, ’é a tadɔa, é sɔ ’bɛzan lɛ léé, ’é fu tadɔa yé ’é nyɔnɔ kun é bɛ nya.

¹⁷ Foliɛwɔlɛ éé foliɛwɔlɛ lɛdɔa fɛan zo, a zo duo lé mi é mi bɛ bli nwaan.

¹⁸ Mi lé éé bɔrɔyili suruan, é dan a poro ble lɛ, yé mi lé é ézan tabin‐é, wo dan a tɔ bɔ lɛ.

¹⁹ Fɛan zo lé mi éé yara yé ’yi va, a zo duo lé mi gi bli ébo dɔɔ.

²⁰ Gamunu nyanana valé guru ’ka faan lo, a zo duo lé mi yuɛ ’ka kaan yɛrɛ yele nya lo.

²¹ Gɔɔlifu selebɔ a gɔɔlifu zé nya yé bɔɔnwoli ’léé a kyan zé nya; naa, woo mi yé é tɔbɔle yɛrama.

²² Dé i ’tugyɛzan pa ’sa va yé bé zɔn ’woli gi nwuni nyaoo, a voro ’ka so a ma lo.

²³ ’Ilé ’blanu faa dɔɔ do do ma, ’ilé trubɛnu pa é zima ma;

²⁴ naa, fuafɛnu ’ka voo ana yifaama lo, yé tɔkoro ’ka mɔn‐o lɛɛfaama lo.

²⁵ Woo kyaa bɔié yé lu drɔɔdrɔɔ é bɔ; dé luyɛ tuu, wa bɔié gɔnu ma yé wa pla kɔn gi.

²⁶ ’Blanénu a, sɔ zénle i ta we ma, boligɔnénu nya lé i féi lɔa,

²⁷ bolitina nyɔyi a kalé fɛblele nya, bii koo, ilé kɔngimunu koo, i wuolomu koo, kazé nya.