Wegɔnévɔlenu 26 - Kazambale lé Sebe Sauunu 1979

¹ Fɛan zo lé lɛɛ kinile féipabléyi va ’ka é zima lo yé lɛɛ dale ’sagyɛbléyi va ’ka é zima lo, a zo duo lé tɔbɔle ’ka ’tugyɛzan nyɛɛan lo.

² Mianénu éé fwilaan fɛan zo yé leelené éé sié fɛan zo, a zo lé bale pale mi ma gwɛ ma ke; é ’ka mi kunwo lo.

³ Plén a, wisoo lé we ma; ’léé foliɛwɔlɛ a, sokofale lé we ma, yé vlewɔlɛ a, ’tugyɛzan lala lé we ma.

⁴ Té i we zi pa ’tugyɛzan lɛ alé ’tugyɛwe yɛrama lo, dé ka da bɔ a nya ékema.

⁵ ’I we zi pa ’tugyɛzan lɛ alé ’tugyɛwe yɛrama, té ébo ye wedɔɔzan nya lo we gi.

⁶ Mi lé éé we paan ’tugyɛzan ’léé, é ébo gane bɔié yé éé weple minian.

⁷ Furuagyɛzan gane a tɔɔtɔɔ fɛan zo, a zo lé dére gɔ do fele ke ’tugyɛzan ’léé.

⁸ ’Tugyɛzan tɔbɔle a bélé gɔlɛwezan vulile sia nya zo.

⁹ Léli wɔrale nwɛgyɛzan lee a fɛan zo, a zo lé gɔnévɔle ke ’tugyɛzan ’léé.

¹⁰ Mi lé éé ’tugyɛzan valé dɔwo?-?munu sié é wuomunu nya, é a bélé savulizan lé éé mi faa tuoan, a zo.

¹¹ ’Tugyɛzan lé éé nɔlaan élé ’tugyɛwe va, é a bélé blén lé éé nɔlaan é féé va, a zo.

¹² Dé i mi ye, yé é dɔ a gi léé, ’é we dɔɔ, mi bli é vo ’tugyɛzan lɛ é mini yee ta.

¹³ Kun‐anwozan léé: Golizra a zia, golizra a kɔn méléna zi ta!

¹⁴ Kɔn ’léé duoli éé nɔlaan é vɔgifɛ gi fɛan zo, a zo duo lé kun‐anwozan éé nɔlaan élé yialafɛ ta.

¹⁵ Kun‐anwozan éé fɔn kinié yé a wɔrale a ’léé a a ma tɔntɔn.

¹⁶ É dɔ kun‐anwozan gi léé, ’é we dɔɔ é mini mi sɔrafié lé woo we zi paan dére zin nya, wo ta.

¹⁷ Giézan lé éé vɔa we lé é ’ka azé nya lo, a gi, é a bélé mi lé éé blén kunwo é tɔné ma, a zo.

^18-19 Mi lé éé dabli kɛla é bɔluzan lɛ yé é léé: Glean maa wo loo? é a bélé bliflikaiizan lé é sonanu koo, sawɔlɛ koo, gale koo, éé wo vulian, a zo.

²⁰ Kyɛyili ’ka lo, a we ma lé kyɛ éé dirian, yé dé liwozan ’ka lo, drɛwole ’wuo éé dɔa.

²¹ Tɛɛn éé kyɛnyɛ kɛla, yé yili éé kyɛ kɛla, a zo duo lé drɛwozan éé drɛ kyɛ dɔa.

²² Liwozan dére a bélé fɛ néné zo, yé éé zunwo mi bun‐an wɔlɛ ma.

²³ Bli naanézan lé a lɔlu ma ke néné, é a bélé gɔɔlifu bo lé wa giéan tɛrɛbɔ ma, a zo.

²⁴ Mizapazan é ébo ta yɔɔan é lɔlu nya, yé éé dabli paan é bli gi.

²⁵ Dé é we fe dére néné nya, té i pa a ta lo, naa, wenaané sɔrafié a a bli gi.

²⁶ Dé élé mi zapale ta yɔɔ dabli nya faa, alé wenaané ta é dan bɔra lɛ zén‐ékevamunu méléna.

²⁷ Mi lé é guru bo, éé diaan a gi, yé gɔlɛ éé nɔlaan mi lé é a buru la, a ta.

²⁸ Dablizan nɛnɛ éé munu tuoan yé éé wo za paan, yé zevɔ dabli nya nɛnɛ éé mi guru zanale a gi ma’lɛra.