Wegɔnévɔlenu 25 - Kazambale lé Sebe Sauunu 1979

Salomɔn lé wegɔnévɔlenu taa lo

¹ Salomɔn lé wegɔnénu ke lo é ziin. Juda munu nwiinzan Ézékia lé munu ɛ wo gyɛ sɛbɛ la.

² We yɔɔle a Bale tɔbɔwe nya; we zuo kulile a minwiinzannu tɔbɔwe nya.

³ La a loru fɛan zo, tɛrɛ guru a fɛan zo, minwiinzannu bli a fɛan zo, mi ’ka a gi dɔɔa lo.

⁴ ’I gɔɔlifu bo si é va yé é dan kɛlɛ lɛ kana nya é folizan lɛ.

⁵ ’I mi naané si minwiinzan ’lɛ, yé alé plale mi nwiin é dan dɔ lɛ gligli we tegele nya.

⁶ Té ibo kɛlɛ mi blɛn nya minwiinzan ’lɛ lo, yé té i dɔ mi blɛnnu dɔna lo;

⁷ dé wa fe i lɛ léé, ’i da ’ko, ’bɛ fila vɔ é mini wolé i zunle minwiinzan lé i ke é dɔle a ’lɛ, a yuɛ va ta.

⁸ Té i go ilé we nya weblemunu va é kele lo, dé i bɔluzan é da i gyɛ yara nya yé dé bé kɛla kaa é voéla, i ’ka a gi dɔɔa lo.

⁹ Ka valé i bɔluzan, kalé we zuo fe é ke lɛ, naa, té i mi bɛ lé gungiwe fe lo,

¹⁰ dé a ’mazan é da i gyɛ yara nya, ’té i tɔ naané bɔle glɛ ’ka dɔa lo.

¹¹ Dére lé wa fé é febléyi nya, é a bélé kyan po lé wa zén gɔɔlifu kana gi, a zo.

¹² Wedɔɔzan lé éé we plaan tɔnégidrɔɔzan lɛ, é a ’bɛzan lɛ bélé tɔnémakyan valé ’lɛrɛkyan wezan zo.

¹³ Nwunvɔzan lé éé yara paan we la, é a ézan lɛ bélé lolu zo ’sagyɛbléyi va; éé fu vɔa ézan ma.

¹⁴ Mi lé ébo tɔ bɔa vié nya blɛ kɛlɛle gi, é a bélé fu valé lati lé wo ka dan lɛɛ nya lo, wo zo.

¹⁵ Bli tiéé éé minwiinzan tuaan, lɔ ma néné éé mi wɔlɛ ’wiié.

¹⁶ Dé i zɔrɔnyɔnɔ ye, bé ble é blele yɛrama, dé i da kan yé i féé a nya.

¹⁷ Té i go i punmazan lé kɔn ’léé fiéfié lo, dé i lɔrɔ é da nyaa a ma yé é i za pa.

¹⁸ Mi lé éé vié woo é punmazan ma, é a bélé gboné koo, gwɔun koo, sawɔlɛ lɛmabole koo, wo zo.

¹⁹ Pale liwozan ta we tɔntɔn bɔyi nya é a bélé suiɛ yélile valé sɔnéwɔlɛ sanle zo.

²⁰ Lɛrɛ vɔle blikyɛdɔzan lɛ, é a bélé sɔ sile a ta dunu bléyi va zo, é a bélé yi zénle gɔlɛkyɛvun ta zo.

²¹ Dé lɔrɔ a i nyanézan gyɛna, ’i fɛblele nɔ a lɛ; dé ’yiminilɔrɔ a a gyɛna, ’i ’yi minile nɔ a lɛ.

²² Naa, a kɛlɛle ’ko zo nya lé yara é dan a kwaa lɛ yé Gakelebale é dan i banwo lɛ.

²³ Yirinwana bɛbola fu éé dan lɛɛ nya, yé liwo nɛnɛ éé dan yara kyɛ vɔle a gi nya.

²⁴ Nyanale kɔn béli ma fila vɔ é mini nyanale kɔn gi drɛwo le va ta.

²⁵ We néné lé é si tɛrɛ baa ta, é a bélé ’yi drɔɔ zo wɔlɛinyaamazan lɛ.

²⁶ Mi tegele lé a sɔnéwɔlɛ san mi naané yuɛ va, é a bélé ’yibɔna lé a yuɛ nɔla, a zo, bélé ’yi’wuo lé é sɛrɛ, a zo.

²⁷ Zɔrɔnyɔnɔ kiɛre blele ’ka é zima lo, naa, mi bɛ tɔ zin fele a mi tɔbɔwe nya.

²⁸ Mi lé é ’ka ébo kunwo lo, é a bélé fla lé a zi gɔrɔ ’ka lo, yé wa guru zana a gi, a zo.