Wegɔnévɔlenu 24 - Kazambale lé Sebe Sauunu 1979

— 19 —

¹ Té i mi naanénu ma maawo lo, yé té i bli é bɔ kɛlɛle wo va ma lo;

² naa, woo mi guru zanale a gi bɔrɔan ’wo bɔn‐in, yé wo lɔlunu éé weple fé.

— 20 —

³ Wedɔɔle nya lé woo kɔn dɔa, yé gikinile nya lé wa dɔa gligli;

⁴ ’wuoatawe nya lé a gi kɔnmi zinu éé faan fɛwezannu gɔnɔ faa valé mi sɔlɛfɛnu nya.

— 21 —

⁵ Wedɔɔzan a é fanle plɛplɛ nya, yé mi lé a ’wuo ke a ta, alé plɛplɛ éé dɔa gligli.

⁶ Naa, i dan guli dan lɛ gibɔrɔle nya, yé sile we gi éé sié mi kiɛre lé weplale va.

— 22 —

⁷ Wedɔɔle éé giéan ’tugyɛzan ta, é ’ka dan é ’léé fuo lɛ flagɔrɔ ’léé lo.

— 23 —

⁸ Mi lé ke é gi bɔrɔna léé, ’é wenaané kɛla, wa laama miblifliwe kɛlɛzan baba.

⁹ Gibɔrɔle tavowe ma a wenyané saa nya, yé mi ma wenanazan a bélé bo zo munu yuɛ gi.

— 24 —

¹⁰ Dé i fuu si i ta nyanébleyi nya, ilé plɛplɛ ke é dan si lɛ i ta.

— 25 —

¹¹ Munu lé wa gona wo nya wo gyɛna, ’i wo si munu lee, wo lé wa gona wo bɔrɔ bona, ’i wo béli.

¹² Dé bé fe léé: Aa! ko ’ka gi dɔɔ lɛ lo baa? Mi lé éé mi gi bli daan ékema, é ’ka a yé loo? Mi lé éé i boen tabin‐é, é ’ka a gi dɔɔa loo? É ’ka dan mi faa do do banwo lɛ wo kɛlɛwe yɛrama loo?

— 26 —

¹³ An be, ’i zɔrɔnyɔnɔ ble, naa, é a é zima; yé zɔrɔyoduo é dan kɛlɛ lɛ néné i nɛnɛ la.

¹⁴ A zo duo lé ’i we dɔɔ i boen zé nya ma; dé bé ye, i dan a tɔnɔ ye lɛ tɛlɛ tɛlama, yé we lé i bli kɛlɛ a lɛ é ’ka dan vo lɛ é pla lo.

— 27 —

¹⁵ Mi naané, té i san vɔ mi tegele lé kɔn ’léé lo; té i ’wii a nyanana ta lo;

¹⁶ naa, mi tegele éé diaan gɔnɔ sɔrafié yé éé nwa é ziin, naa, woo mi naanénu vɔa we tɔntɔn gi.

— 28 —

¹⁷ Té i nyanézan diale é i gi nana lo, yé dé a sɔnéwɔlɛ san, té ’bɛ é sɔ i lɛ i bli gi lo,

¹⁸ dé Gakelebale é da a ye yé é ’ka sɔa a lɛ lo, yé alé bliflile é si a ma.

— 29 —

¹⁹ Munu lé woo wenaané kɛla, té i bli é fli wo ma lo, té i mi naanénu ma maawo lo;

²⁰ naa, mi lé éé wenaané kɛla, alé tɛrɛ tɛlama ’ka lo; mi naanénu lé kyɛbɔ éé dirian.

— 30 —

²¹ An be, ’i kana Gakelebale valé minwiinzan blɛn lee; té i vɔ awomunu va lo.

²² Wo guru é dan zana lɛ a gi fiaa, azama, yé de ɛ wo faa lé nyanéblele dɔɔ?

Wegɔnévɔlenu lé woo mi kɛla wedɔɔzan nya, wo taa lo

²³ We lé wedɔɔmunu a fé é ziin, yee lo: dé i a weblena, é ’ka é zima léé, i we ble mi dɔbɛ ma lo.

²⁴ Mi lé éé a fé mi naané lɛ léé: Bii a tegele, munu éé bale paan a ma, migɔnɔnu éé bale paan a ma.

²⁵ Naa, munu lé woo we lɛdɔa a gi, wo dan wezin ye lɛ, yé drɔɔvole valé we zin é dan kɛlɛ lɛ wozé nya.

²⁶ Mi lé éé we zi paan dére tegele nya, é a bélé é pwɛpwɛ vɔ é wo a lɔlu ma.

²⁷ ’Ilé béera wenu bɛ pa ékema, ’ilé féi ma’lɛrɛ, ’bɛ zuo yé ’ilé kɔn dɔ.

²⁸ Té i kɛlɛ wenayézan nya i punmazan ma é pla lo; i a a va léé, i dabli kɛlɛ i lɔlu nyaa?

²⁹ Té bé fe léé, we lé é a kɛlɛ an lɛ, maa dan anzé kɛlɛ lɛ a lɛ, lo; té bé fe léé, maa dan we lɛgi pa lɛ mi do do ma wo kɛlɛwe yɛrama, lo.

³⁰ Maa gié kun‐anwozan lé féi sɔnɔ, ’wuosɛrɛzan lé dɔrɔféi sɔnɔ.

³¹ Yé bé ye, lélinu tuu fɛfaana, yé yoné lé plin ana faa ble yé gɔlɛ gɔrɔ zana.

³² Yé maa nagini téiin yé we lé maa a ye, é we paa an gi.

³³ ’I yi gyɛ sɛ, ’i flin sɛ, ’i bɛ vɔ ékela sɛ yé ’i yi gyɛ;

³⁴ nyané é dan i gyɛ lɛ fiaa, bélé awozan zo, yé lɔrɔ é dan dɔ lɛ ilé kɔn ’léé bélé gulidanzan zo.