Wegɔnévɔlenu 22 - Kazambale lé Sebe Sauunu 1979

¹ Tɔ zin fila vɔ fuafɛ kiɛre ta, yé zin mini gɔɔlifu valé kyan ta.

² Fuablezan valé nyanégyɛzan éé keeé; Gakelebale ɛ wo fiénu kɛlɛ.

³ Yuɛikinizan éé wenaané yé, yé éé yɔɔan, naa, nékénénémi éé goo é ’lɛ mi, yé woo we lɛdɔa a gi.

⁴ Bo kiéné valé kanale Gakelebale lee ma tɔnɔ lé ke fuablele koo, tɔbɔle koo, vole é yuɛma koo, wo nya.

⁵ Lélinu valé sanbalenu a mi vɔnle lé zi ta; mi lé éé yuɛ paan ébozen va, éé sié a ma baa.

⁶ Zi lé é a lé mi a ta tawo, ’bélé we paa nékénéné gi ma; dé é kɛlɛ segeleoo, é ’ka dan si lɛ a ta lo.

⁷ Fuablezannu éé plaan nyanégyɛzan nwiin, yé mi lé éé vɛɛn sié é a vɛɛnzan lé luu nya.

⁸ Mi lé éé weple vɔa éé weple gya, yé alé blifli vlewɔlɛ é dan yéli lɛ.

⁹ Mi lé éé mi naginian nyanai zénle nya, a drɔɔ é dan vo lɛ, naa, élé fɛblele ke no nyanégyɛzannu lɛ, azama.

¹⁰ ’I wenanazan bin, yé wesiale é dan nyaa lɛ; yé zavɔle valé mi sɔnɔle boli é dan kini lɛ.

¹¹ Mi lé bli gi bɔle éé sɔa a lɛ, ’té éé dére zin fé, minwiinzan blɛn a a béé nya.

¹² Gakelebale yuɛ éé ’wuoatawe tabin‐é, naa, éé liwozannu kunwo wo dére ma.

¹³ Kun‐anwozan léé: Golizra a béera! É dan an gyɛ lɛ kɔn méléna zi ta.

¹⁴ Bɛn lomu ’léé a guru lé a wɔlɛ ma ke baa, a nya; mi lé Gakelebale bli fli a ma, é dan dia lɛ a gi.

¹⁵ Tavowe a é yerele né bli ma; a drɔ vlewɔlɛ é dan a si lɛ a ma baa.

¹⁶ Mi lé éé nyané paan nyanégyɛzan ta ébo lé fua taa yele we gi, é valé mi lé éé blɛ kɛla fuablezannu lɛ, lɔrɔ saa ɛ dan a gyɛ lɛ.

Wegɔnévɔlenu lé woo mi kɛla wedɔɔzan nya

¹⁷ ’I an ban i tɔné nya, yé ’i tɔné dɔ wedɔɔzannu dére lɛ; ’i yara pa anlé ’wuoatawe ta.

¹⁸ Dé i wo tadɔ i bli gi yé wo vo i lɔlu ta yifaama, ’bɛ é dan i gi nana lɛ.

¹⁹ Bii gi lé maa a a va léé, maa we paa kyɔ, i pale Gakelebale ta we ma.

²⁰ Maa weplale valé ’wuogibɔrɔwenu gyɛ sɛbɛ ta izé nya,

²¹ sɔbɛlawenu valé dére bozennu paale i gi we ma, yé munu lé wo i pa zia, i we zi pa wo lɛ dére bozen nya.

— 1 —

²² Té i fɛ si nyanégyɛzan lee, a kɛlɛle nyanégyɛzan nya we ma lo, yé té i nyané pa mi tɔɔtɔɔnu ta flagɔrɔ ’léé lo;

²³ naa, Gakelebale é dan dɔ lɛ wo zuo, yé munu lé wo wolé fɛnu si é dan wolé tɛrɛla si lɛ wo lee.

— 2 —

²⁴ Té i kɛlɛ bliflizan béé nya lo, té i nana wɛwɛdɔzan va lo,

²⁵ dé alé wekɛlɛbɛ é da vɔ i lee, yé wo kɛlɛ ibozen kunsanbale nya.

— 3 —

²⁶ Munu lé wo ’wobo vɔa we gi, wo valé munu lé woo kɛla vɛɛnyurunu nya, té i nana wo va lo;

²⁷ dé a banwofɛ ’ka i lee lo, mɛmalé i a a va léé, wo ilé yialafɛ si i wuoo?

— 4 —

²⁸ Fɛ lé i tranu a vɔ é kyɛn ’wo glɛdɔfɛ nya, té bé soowɔla lo.

— 5 —

²⁹ I blabozan yéé? É dan dɔ lɛ minwiinzan blɛn sɔnɔ, é ’ka dan dɔ lɛ mi pla sɔnɔ lo.