Wegɔnévɔlenu 21 - Kazambale lé Sebe Sauunu 1979

¹ Minwiinzan bli a bélé ’yiyoro zo Gakelebale lee; fɛana sɔ a lɛ, ana lé éé a yoroan.

² Mi lé tawobɛ faa a é drɔle ébo yuɛ gi, naa, mi lé éé mi bligiwenu daan ékema, Gakelebale lé.

³ We tegele valé we drɔle kɛlɛle a é sɔe Gakelebale yuɛ gi é mini saraka bole ta.

⁴ Mi ginile é yuɛ zuo valé bliile blɛn ɛ ke mi naané lé kyɛbɔ nya, é a wenyané saa nya.

⁵ Mi lé a bɛ wɔlɛi ’ka nyaan a ma lo, alé ’wuogibɔrɔwenu éé goo a nya fɛ kiɛre yele saa va, naa, mi lé éé we kɛla é kele, nyané a gya.

⁶ Fɛwezannu lé wa yé vié nɛnɛ nya, wa boafɛnu lé wo dan san lɛ, wo nya, yé ga a wo zuo é pu.

⁷ Mi naanénu ’ka a nyi sié léé, ’wo we tegele kɛlɛ lo, amalé wolé glawe éé wo sian ana.

⁸ Wegyɛzan éé giéan zi plinlenu ta, naa, weanwiinlozan éé we drɔle kɛla.

⁹ Nyanale kɔn béli ma fila vɔ é mini nyanale kɔn gi drɛwo le va ta.

¹⁰ Mi naané bli éé bɔa wenaané ma; a béé ’ka mi zin nya a yuɛ gi lo.

¹¹ Dé wo we lɛdɔ mimawenanazan gi, nékénéné mi gi éé kinié; dé wo we paa gikinizan gi, éé ’wuoatawe dɔɔan.

¹² Bale tegele yuɛ a mi naané lé kɔn ta; Gakelebale éé we tɔntɔn bɔa mi naanénu ma.

¹³ Mi lé éé tɔné lɛ taan nyanégyɛzan siaale ma, yeebozen é dan siaa lɛ yé wo ’ka dan we lɛ a zi lo.

¹⁴ Kyeen gi fɛ nɔle éé mi bliflile ta zanaan, yé blɛ kɛlɛle kyeen gi éé bliflizan bli dɔralaan.

¹⁵ We tegele kɛlɛle a mi tegele ginanawe nya, naa, kulugale a munu lé woo wenaané kɛla, wozé nya.

¹⁶ Mi lé éé sié we dɔɔ zi ta, é dan nyana lɛ gamunu zénna ékema na.

¹⁷ Mi lé gi nanale éé sɔa a lɛ, nyané é dan a gyɛ lɛ; mi lé nwɛ valé nyɔnɔ éé sɔa a lɛ, é ’ka dan fua ble lɛ lo.

¹⁸ Mi naané a mi tegele tabofɛ nya, yé liwozan a mi drɔlenu tabofɛ nya.

¹⁹ Nyanale bwi gi fila vɔ é mini nyanale zɔdɔ le lé a bli éé flian, a va ta.

²⁰ Fɛwezannu baba valé nyɔnɔ a wedɔɔzan lé kɔn gi, naa, ’tugyɛzan éé wo sɛra.

²¹ Mi lé éé goo we tegele valé we zin zuo, bélile koo, we tegele koo, tɔbɔle koo, wa azé nya.

²² Gikinizan éé wɔraan nyanazannu lé fla, yé plɛplɛ lé é nyana zén wo gi bɛ, é ’bɛ kele.

²³ Mi lé éé yuɛ paan é ’léé valé é nɛnɛ va, é ébozen sié nyanéblele lee.

²⁴ Boblɛnzan valé mi gini é yuɛzuozan, wa laama mi ma we nanazan; éé we kɛla élé boblɛn lé é siale ana nya.

²⁵ Kun‐anwozan lé blibɔle fɛ ma ’é gya; éé sɔn vɔa nyanama pale ma, ’bɛzama;

²⁶ A bli éé bɔa fɛnu ma bladi nyanadi, naa, mi tegele éé fɛ no yé é ’ka a tadɔa lo.

²⁷ Mi naané lé saraka a bélé bo zo; yé dé é a bo é gi bɔrɔle naané nya é bli gi nii?

²⁸ Viéwenayezan é dan zamaga wo lɛ, naa, mi lé éé tɔné dɔa é dan we fe lɛ yifaama.

²⁹ Yara ’ka mi naané gya lo, naa, mi drɔle é é giébɛ dɔa gligli.

³⁰ Dé é a wedɔɔle nyaoo, dé é a gikinile nyaoo, dé é a weplale nyaoo, wo vazan do kpen ’ka bɔa dɔle lɛ Gakelebale ma lo.

³¹ Woo wisoo ma’lɛra gulidanyinu lé we ma, naa, Gakelebale ɛ guliwuo no mi lɛ.