Wegɔnévɔlenu 20 - Kazambale lé Sebe Sauunu 1979

¹ Nwɛ a wenanazan nya yé dɔrɔ éé mi bɔ gya; dé miomian wo mini é baba é ’ka we dɔɔa lo.

² Kana lé minwiinzan blɛn a zén‐é mi gi é a bélé golizra gi gunule zo; mi lé éé a bli flian é wenyané kɛlɛ ébo lɛ.

³ Daanle zɔdɔle ma a mi tɔbɔwe nya, naa, ’tugyɛzannu faa wobo no bliflile lɛ.

⁴ Dunu lé we ma lé kun‐anwozan ’ka nyanama paan lo; fɛgyɛbléyi va é sɔ a lɛ léé, ’é fɛ gyɛ, naa, fɛ do kpen ’ka ana lo.

⁵ Mi ’wuogibɔrɔwenu a bélé ’yiguruzan zo, naa, gikinizan ɛ ana ’yi tɔle dɔɔ.

⁶ Munu kiɛre wolé wezin kɛlɛle tɔ bɔa; naa, mi kyɛn ɛ bɔa yarapawelazan yele lɛɛ?

⁷ Mi tegele éé tawoo é dɔbɛ wéiin gi; alé nénu lé woo dan a zuo, wo gi éé nanaan.

⁸ Minwiinzan blɛn lé é ke wéiin élé plale munu nwiin gi, éé wenyané faa yi gaan élé mi naginile nya.

⁹ Mi kyɛn ɛ dan a fe lɛ léé: Maa an bli gi bɔ, maa anlé wenyané fwii?

¹⁰ Kilo lé poa gɔnɔ fié valé fɛdangifɛ gɔnɔ fié, wo fiénu a é naané Gakelebale yuɛ gi.

¹¹ Dé nékénéné giébɛ é dan kɛlɛ lɛ é zima valé é drɔle, ’té wa gi dɔɔ a kɛlɛwenu ma é kwakwa.

¹² Tɔné lé éé we maan, é valé yuɛ lé éé yɛrɛ yé, Gakelebale ɛ wo fiénu kɛlɛ.

¹³ Té i bli é bɔ yigyɛle ma lo, dé nyané é da i gyɛ; ’i yuɛ fuo, i dan kan lɛ fɛ nya.

¹⁴ Fɛlɔzan a fé léé: Fɛ ’ko a lɛrɛlɛrɛ! Fɛ ’ko a lɛrɛlɛrɛ! Dé é a lɔ, ’té éé goo ébo ze vɔle nya yee fɛ ma.

¹⁵ Kyan ana, yé gɔlɛwezan pɛrɛl kiɛre ana; naa, we dɔɔ lɔlu ɛ ke fɛwezan nya.

¹⁶ Mi lé é kɛlɛ bɛn mi lé vɛɛnyuru nya, ’walé sɔ si; ’wo bɛfɛ si a lee, é dɔ bɛn lé we gi, azama.

¹⁷ Fɛblele lé mi a yé dabli nya, é a néné a ’léé, yé é voéla éé nɔlaan a ’léé sɛwɔlɛ nya.

¹⁸ ’Wuogibɔrɔwenu lɛ éé sɔɔan weplale ɛ nya; ’i guli dan yuɛgi kinile nya.

¹⁹ Mi lé éé tɔ sɛrɛwe nwɛɛn‐an éé kyeengiwe ta bɔraan; amalé té i vɔ we mlanmlannézan zuo lo.

²⁰ Dé mi bale pa é ti valé é bu ma, alé kyɛbɔ é dan diri lɛ gunuti méléna.

²¹ Zarafɛ lé wa yé é kele a pélisiana, a drɔɔ ’ka dan vo lɛ é voéla lo.

²² Té bé fe léé, ’é dan wenyané lɛgi pa lɛ lo. ’I bli vo Gakelebale lɛ, é dan i si lɛ we gi.

²³ Té fɛ do vlɛ é kɛlɛ fié lo, ’bɛ a é naané Gakelebale yuɛ gi, yé dabli kilo lé poa ’ka fɛ zin nya lo.

²⁴ Gakelebale ɛ mi gane dɔrana kɛla, ’naan, mi é bɔalɛ yé ébo giébɛ gi ’maa?

²⁵ Dé mi ’ka é bɔn‐in bɔrɔan faa yé é bale kun lo, é voéla é dan kɛlɛ lɛ a kunsan nya.

²⁶ Wedɔɔ minwiinzan blɛn éé mi naanénu fwilaan yé éé wo wiian goro gane nya.

²⁷ Mi léli a Gakelebale lé kyɛbɔ do nya; éé wɔraan fɔɔ yé é bɔ mi bun‐an wɔlɛ ma.

²⁸ Wezin kɛlɛle valé yara pale we la ɛ minwiinzan tabin‐é, yé é alé plale mi nwiin dɔa gligli weboen nya.

²⁹ Plɛplɛ a pɛniɛnu tɔbɔwe nya, yé nwana a mi segelenu ’lɛrɛfɛ nya.

³⁰ Mi naané drɔfɛ lé ke a tuona pai manɔn nya, é valé fɔlɛ lé wa duun a lɛ yé é so a wɔlɛ zi, a nya.