Wegɔnévɔlenu 2 - Kazambale lé Sebe Sauunu 1979

Wedɔɔle ma tɔnɔ

¹ An be, dé i an dére nyi si, dé i anlé weplale ’ma,

² dé i tɔné dɔ wedɔɔdére lɛ, dé i bli vo gikiniwe lɛ,

³ iin, dé i wedɔɔle laa, yé dé i dére nwa gikiniwe vazia,

⁴ dé bé gini bélé gɔɔli ginile zo, dé bé zuo kuli bélé fɛwezan zo,

⁵ naa, i dan kanale Gakelebale lee gi ’ma lɛ, yé i dan Gakelebale dɔɔ lɛ.

⁶ Naa, Gakelebale ɛ wedɔɔle no mi lɛ; a ’léé lé wedɔɔdére valé gikinidére éé sié;

⁷ éé silewegi ta dɔa mi drɔlenu zé nya; munu lé wolé tawobɛ ke wéiin, é a wo takuunzan nya.

⁸ Éé zi tegelenu ta kuun‐an; éé yuɛ paan é sɔlɛmunu lé tawobɛ va.

⁹ We tegele koo, zi nɔle mi faa lɛ koo, we drɔle koo, zinu faa lé woo goo wezin va koo, i dan wo dɔɔ lɛ.

¹⁰ Gikinile é dan wɔra lɛ i bli gi, yé wedɔɔle é dan kɛlɛ lɛ i boen ginanawe nya.

¹¹ Dé i bɔn‐in bɔrɔan we ma faa é dan i tabin lɛ; gikinile é dan yuɛ pa lɛ i va.

¹² Wo dan i si lɛ tawobɛ naané valé ’léé nyané vɔzan zuo.

¹³ Munu lé woo sɔn vɔa zi drɔlenu ma tawole gunu va zinu ta we gi,

¹⁴ ’té wenyané kɛlɛle a wo ginanawe nya, ’té we vɔnle éé sɔa wo lɛ,

¹⁵ ’té woo tawoo zi plinle ta, ’té woo wɔraan zi bilibili ’léé, wo dan i si lɛ wo faa zuo.

¹⁶ Wo dan i si lɛ bɛn le lee; bɛn le lé éé blaané dére fé,

¹⁷ ’té éé sɔn vɔa é blɛn la bwɛ ma yé a gi éé saan élé Bale lé gipawe ma, wo dan i si lɛ a lee;

¹⁸ naa, alé kɔn a é tɛnlale ga vazia, yé alé zi ’wuoplana a gamunu va;

¹⁹ munu lé woo goo a va, wo va mi do kpen ’ka nɔlaan é pa gi é ziin lo, yé wo ’ka mibélizinu yé é ziin lo.

²⁰ ’Bɛ zo lé i dan tawo lɛ mi zinnu lé tawobɛ nya, yé i dan vo lɛ mi tegelenu lé zinu ta.

²¹ Naa, mi drɔlenu é dan nyana lɛ tɛrɛ ’ko la; mi wéiinnu é dan vo lɛ ana;

²² naa, wo dan mi nyanénu si lɛ tɛrɛ ’ko la; wo dan yuɛiblanzannu nwa lɛ ana.