Wegɔnévɔlenu 19 - Kazambale lé Sebe Sauunu 1979

¹ Nyanégyɛzan lé éé tawoo é dɔbɛ wéiin gi, azé fila vɔ é mini ’léé nyané vɔzan lé é ke ’tugyɛzan nya, a ta.

² Wedɔɔle vurule mi ma ’ka é zima lo, yé mi lé éé zén‐é we va é kele éé saan.

³ Mi lé tavowe éé mi giébɛ sɛra, yé Gakelebale ma lé a bli éé flian.

⁴ Fuablezan béénu a kiɛre, naa, nyanégyɛzan valé é béé éé kinié ékema.

⁵ Vié wenayezan ’ka dan vuru lɛ we lɛdɔle é gi ma lo, yé mi lé éé vié woo, é ’ka dan so lɛ we lee lo.

⁶ Mi kiɛre woo bɛ ma wolowolozan ze vɔa dabli dére nya, yé mi lé éé blɛ kɛla, mi faa a a béé nya.

⁷ Nyanégyɛzan za a é bwenu faa gi, naa, a béénu nii? Wo ’ka dan si lɛ a ma baa loo? Dé é we fe wo lɛ zanté vɔle nyaoo, woo fwilaan.

⁸ Mi lé a yuɛi ke é kinile abozen éé sɔa a lɛ; mi lé ’wuoatawe sɔ a lɛ éé fɛ zin yé.

⁹ Vié wenayezan ’ka dan vuru lɛ we lɛdɔle é gi ma lo; yé mi lé éé vié woo é dan zamaga wo lɛ.

¹⁰ Dé tɛrɛ la tɔnɔ blele ’ka ’tugyɛzan nyɛɛan lo ’naan, plale minwiinzannu nwiin ɛ luu nyɛɛaan?

¹¹ Wedɔɔzan bli ’ka flian é kele lo, yé a tɔbɔle lé ke a gi sanle a ’namawenu ma nya.

¹² Minwiinzan blɛn lé bliflile a bélé golizra gi gunule zo, yé alé zin a bélé fli vɔle zo lunu ta.

¹³ Dé mi be a ’tugyɛzan nya ’té we tɔntɔn kɛlɛ a ti lɛ; mi na lé lɔlublele a bélé kɔn ’bɔɔle lé é ’ka nyaan lo, a zo.

¹⁴ Mi é bɔalɛ yé é kɔn valé fuafɛnu ye é tinu zara nya, naa, ’wuoata le a Gakelebale lé blɛ nya.

¹⁵ Kun‐anwole éé mi gya yi nya, yé lɔrɔ é dan mi yowuliné gyɛ lɛ.

¹⁶ Mi lé éé tawoo bélidɔwe ta, é ébozen tabin‐é; mi lé é ’ka é yuɛ paan élé zi ta lo, é dan ga lɛ.

¹⁷ Mi lé a nyanai éé zén‐é nyanégyɛzan ta, éé drɔn paan Gakelebale lé é dan a lɛgi nɔ lɛ a kɛlɛwe yɛrama, ’bɛ ma.

¹⁸ Bléyian va lé i be éé we maan, ’i we lɛdɔ a gi, naa té i bli é fli fɔɔ yé bé gyɛ yé é ga lo.

¹⁹ Mi lé a bli éé flian é baba é dan a ma ban ye lɛ; naa, dé i bɔ a va, i dan da lɛ bɔ lɛ a va é ziin.

²⁰ ’I tɔné dɔ weplalenu lɛ yé ’i we paale i gi nyi si, i gi kinile we gi, ilé tɛrɛla yinu lé wo vo i ’lɛ bɛ, wo gi.

²¹ Mi ’wuogibɔrɔwenu a di, naa, Gakelebale zé ’wuogibɔrɔwe ɛ a lɛ sɔɔan.

²² Mi ’lɛrɛfɛ lé ke élé wezin nya; nyanégyɛzan fila vɔ é mini viéwozan ta.

²³ Kanale Gakelebale lee éé goo mi nya bélina; éé lɔrɔ sié mi ma yé éé yi gya drɔɔ, ’té wenaané do kpen ’ka kɛla a lɛ lo.

²⁴ Kun‐anwozan éé bɛ wɔraan kana gi yé é ’ka a wɔraan é ’léé é dɛrɛ lo.

²⁵ Dé i wenanazan bla, nékénénémi é dan we dɔɔ lɛ; dé i we pla ’wuoatazan lɛ é dan wedɔɔle gi ’ma lɛ.

²⁶ Mi lé é é ti lé fɛ sɛra yé é é bu bin‐é, é a be lé éé mi gya yara nya yé éé mi gi kyɛ dɔa, a nya.

²⁷ An be, dé wa we paana i gi, i yara sile ’wuoatawe ta we ma, té i tɔné dɔ wo lɛ é dɛrɛ lo.

²⁸ Dabli wenayezan éé we nanaan we tegele ma, yé weple a mi naanénu blefɔn nya.

²⁹ Woo weblele ma’lɛra wenanamimazan zé nya, yé woo fɔlɛ blian ’tugyɛzannu lala zé nya.