Wegɔnévɔlenu 18 - Kazambale lé Sebe Sauunu 1979

¹ Mi lé é ébo sié munu va, é a ébozen lé sɔlɛwe ginina; a bli éé flian wedɔɔwe faa ma.

² ’Wuoatawe ’ka sɔa ’tugyɛzan lɛ lo, abo lé gibɔrɔle nagɔɔnle ɛ sɔa a lɛ.

³ Dé mi naané da ’té lɔlu plɛnle da é ziin; yé yaragyɛwe ma lé mi tɔ sɛrɛwe éé dan.

⁴ Mi ’léé dérenu a ’yi lé a guru ke, a nya; wedɔɔle ’wuo a dooné lé éé yoroan plɛplɛ, a nya.

⁵ Dɔle mi naané zuo é leefɛ ma weblena, mi tegele gyɛle we nya we ma, é ’ka é zima lo.

⁶ ’Tugyɛzan éé lɔlu vɔa wesiawe gi, yé a dére ma lé wa blaan.

⁷ ’Tugyɛzan dére ma lé a guru éé zanaan a gi, yé a lɔlunu a abozen kunsanbale nya.

⁸ Liwozan dérenu a bélé fɛ néné blele zo, woo zunwo mi bun‐an wɔlɛ ma.

⁹ Mi lé éé kun‐anwoo élé nyanama gi, é a guruzanaagizan bɔluzan nya.

¹⁰ Gakelebale tɔ a bélé flagɔrɔ nwiin kɔn torole zo, mi tegele éé yɔɔan ana ’té a ta béli a é dɔle.

¹¹ Fuafɛnu a fuablezan lé fla plɛplɛ nya; é dɔ a gi léé, wa gɔrɔ torole nya.

¹² Mi lé é ébo kɛla blɛn, a guruzanale a gi bɔ é pu; naa, bo kiéné ɛ dan tɔbɔle nya.

¹³ Mi lé éé we zi paan ’té é ’ka tan we ’ma lɛ lo, éé ’tugyɛwe fé yé yara a gya.

¹⁴ Mi bli éé bɔa mi va élé gyɛ gi, naa, dé mi bli si we lɛ, mɛ fɛ ɛ dan bɔ lɛ a vaa?

¹⁵ ’Wuoata bli éé we dɔɔan, yé gikinimunu tɔné éé wedɔɔle ginian.

¹⁶ Mi lé blɛfɛnu alé zi laala gya, yé woo wɔrale mi segelenu va se kɛla a lɛ.

¹⁷ Mi lé é ézé we zuo fé é vinin é a bélé yee ɛzé ke néné, naa, dé a bɔluzan ’koɛ da woo wolé we daan ékema.

¹⁸ ’Munnu zunle éé zavɔle nyaan yé éé mi plɛplɛnu vaboo.

¹⁹ Bwe lé wa ’namawe kɛlɛ, a yele a tɔntɔn é mini fla plɛplɛ ta, yé alé zavɔle a bélé kɔn lɛ tan gbaklé lé é ke foliɛwɔlɛ plɛplɛ nya, a zo.

²⁰ Mi dére ma lé mi éé kaan, a lɔlu ma lé lɔrɔ éé sié a ma.

²¹ Ga valé vole é yuɛma lé plɛplɛ a mi nɛnɛ lee; miomian wefele éé sɔa a lɛ, é dan a ma tɔnɔ ble lɛ.

²² Mi lé é le si, é fɛ zin ye; é a zin do lé é a ye Gakelebale va, a nya.

²³ Nyanégyɛzan éé we fé zanté vɔle nya, yé fuablezan éé we zi paan dére plɛplɛ nya.

²⁴ Mi lé a béénu ke di, wa di a gyɛle nyané nya we ma, naa, béé do ana yé é a é yerele mi ma é mini mi bwe ta.