Wegɔnévɔlenu 17 - Kazambale lé Sebe Sauunu 1979

¹ Dé buru feené do a i lee, ’té i bli a drɔɔ, a fila vɔ éé minié kɔn lé é ke é fanle wi nya ’té zɔdɔle ana, a ta.

² Mi wuozan lé é we dɔɔ, éé plaan mi be lé éé mi gya yara nya, a nwiin, yé é dan zara ble lɛ a bwenu méléna.

³ Fɛselebɔ a gɔɔlifu zé nya, yé bɔɔnwoli ’léé a kyan zé nya, naa, mi lé éé mi blinu gi daan, Gakelebale lé.

⁴ Mi naané éé tɔné dɔa boazan dére lɛ, yé viéwozan éé migyɛzan baan é tɔné nya.

⁵ Mi lé éé we nanaan nyanégyɛzan ma, é a a Kɛlɛzan sɔnɔna, mi lé a gi éé nanaan blikyɛdɔwe ma, é ’ka dan vuru lɛ we lɛdɔle ’é gi ma lo.

⁶ Mi segelenu nénézinéné a ’wolé tɔkoro nya, yé né tinu a ’wolé nénu tɔbɔwe nya.

⁷ Dé dére zin fele ’ka ’tugyɛzan nyɛɛan lo ’naan, ’té viédérenu éé lɛamami nyɛɛan?

⁸ Blɛfɛnu a gɔlɛwezan nya munu lé woo wo yé, wo lɛ; dé wo nɔla fɛofɛana, woo fɛ yé.

⁹ Mi lé éé saanwe ta yɔɔan é a ’é sɔle munu lɛ naginina, yé mi lé éé saanwe sele dɔa mi gi éé béénu kinié ékema.

¹⁰ Weplale gikinizan lɛ éé kana vɔa a gi é mini ’tugyɛzan blale gɔnɔ yɔ soru lɛ.

¹¹ Mi naané éé nwale mi ma saa ɛ naginian, naa, wo dan blilayuyu nwunvɔzan pa lɛ zia a ma.

¹² Keele kua lé wa né sia, a nya, fila vɔ é mini keele ’tugyɛzan nya ta, ’té é élé ’tugyɛwe kɛla.

¹³ Mi lé éé wezin lɛgi paan wenaané nya, wenaané ’ka dan vuru lɛ alé kɔn ma lo.

¹⁴ Drɛwole pélisiale a bélé ’yi gɔɔn lɛ sole zo; dé drɛwole gi a gyɛna, ’i si ana faa ’lɛ, yé a gi é gyɛ.

¹⁵ Mi lé é wegyɛzan vo ébo ma, é valé mi lé éé mi tegele gya we nya, wo fiénu a bélé bo zo Gakelebale yuɛ gi.

¹⁶ Gɔɔli kɛlɛle ’tugyɛzan lee, ’bɛ ɛ mɛ kɛlaa? Éé wedɔɔle lɔa a nyaa? Naa, é ’ka we do dɔɔa lo.

¹⁷ Mi éé sɔa é béé lɛ bléyi faa ma, yé we tɔntɔn bɔyi la é ébo nagɔɔn‐an a bwe nya.

¹⁸ ’Wuosɛrɛzan ébo yerean we nya; éé kɛla é bɔluzan lé vɛɛnyuru nya.

¹⁹ Mi lé wesiale éé sɔa a lɛ, wenyané éé sɔa a lɛ; mi lé é ébo nwaan blɛn élé kɔn ’léé, é a é guru zanale a gi ginina.

²⁰ Bli lé é ’ka tegele lo é ’ka fɛ zin yé lo, yé viéwonɛnɛ é dan ézan dia lɛ wenaané gi.

²¹ Mi lé é ’tugyɛzan yaa, yara é dan a gyɛ lɛ. Sulasulagyɛzan ti gi ’ka bɔa nanale lɛ lo.

²² Ginanabli a lia zima nya, naa, nyanéblébli éé mi wɔlɛ gaan é gi.

²³ Minaané éé blɛfɛ sié kyeen gi, zi tegelenu sɛrɛle we gi.

²⁴ Wedɔɔle a gikinizan yara, naa, ’tugyɛzan yuɛ a tɛrɛ glɛ sina.

²⁵ ’Tugyɛ be éé ti gya yara nya, yé é a kɔnɔn nya é yaazan lɛ.

²⁶ Mi tegele gyɛle we nya ’ka é zima lo, yé lɛamamunu blale wo kɛlɛwe drɔle ma ’ka é zima lo é ziin.

²⁷ Mi lé éé lɔlu kunwo, a ’wuo a a ta, yé mi lé a bli ke drɔɔ é a gikinizan nya.

²⁸ ’Tugyɛzan boen, dé é tadɔ éé dɔa mi gi léé, é we dɔɔ; mi lé éé lɔlu lɛ taan é a gikinizan nya.