Wegɔnévɔlenu 16 - Kazambale lé Sebe Sauunu 1979

¹ ’Wuogibɔrɔwenu a mi leewe nya, naa, we zipale a Gakelebale leewe nya.

² Mi lé tawobɛ faa a wéiin ébo yuɛ gi, naa, mi lé éé mi bligiwenu daan ékema, Gakelebale lé.

³ ’I kɛlɛwenu bɛ pa Gakelebale lee yé i ’wuogibɔrɔlenu lɛ é dan sɔɔ lɛ.

⁴ Gakelebale fɛnu faa kɛlɛ wean ma, é a dɔɔ; dé é a mi naané nyaoo, é ’bɛ kɛlɛ blikyɛdɔyi zé nya.

⁵ Boblɛn bli faa a bélé bo zo Gakelebale yuɛ gi; weboen nya, wo ’ka dan vuru lɛ we lɛdɔle wo gi ma lo.

⁶ Zin kɛlɛle valé yara pale we la éé mi lé weple ’yiboo, yé kanale Gakelebale lee ma lé woo nwun zi dɔa wenyané ta.

⁷ Dé mi giébɛ sɔ Gakelebale lɛ, dé é a a nyanézan boen nyaoo, Bale éé yee valé ’bɛ kɛla mi do.

⁸ Fɛ sɛné fila vɔ, ’té we tegele a a va, é mini fɛ kiɛre lé weple ke a va, a ta.

⁹ Mi éé gi bɔrɔan é giébɛ ma, naa, Gakelebale éé kunwo a bɛ ma yé éé zi gɔɔn‐an a lɛ.

¹⁰ Bélidɔwenu a minwiinzan ’léé; dé é a weblena, é ’ka lé weple é bɔra a ’léé lo.

¹¹ Kilo lé poa valé fɛdankilo tegele a Gakelebale lee; kilo lé poa lé wo ke bɔlɔné gi, wa Gakelebale panyanama nya.

¹² Minwiinzannu ’é kana wenaané kɛlɛle lee ma, naa, we tegele nya lé wolé plale mi nwiin éé dɔa gligli.

¹³ We tegele fezan a mi zin nya minwiinzan yuɛ gi, yé mi lé éé we fé é fena, éé sɔa a lɛ.

¹⁴ Minwiinzan lé bliflile éé gawe bɔa mi ma, yé wedɔɔzan ɛ a bli dɔralaan.

¹⁵ Minwiinzan blɛn yara drɔɔ éé mi bélié, yé alé zin a bélé lɛɛ vinin dale zo mi lɛ.

¹⁶ Kɛlɛle wedɔɔzan nya mini kyan ta, yé gikinile a é zima é mini gɔɔlifu ta.

¹⁷ Mi drɔle lé zi a paale wenaané ma nya; mi lé é ébozen tabin‐é, éé yuɛ paan é giébɛ va.

¹⁸ Kulugale éé dan bo tɔbɔle zuo; saanle éé dan bo blɛn zuo.

¹⁹ Kɛlɛle bo kiénézan nya bo kiénézannu va fila vɔ é mini gulizarafɛnu gulile ta boblɛnzannu va.

²⁰ Mi lé éé we bɔrɔan é bɔn‐in éé wezin yé, yé mi lé é ébo bɛ paan Gakelebale lee, a gi éé nanaan.

²¹ Mi lé é we dɔɔ é bli gi wa laama gikinizan, yé dére néné éé wedɔɔle gi gya.

²² Wedɔɔle a bélile ’wuo nya wedɔɔzan lɛ; woo we lɛdɔa ’tugyɛzannu gi wolé ’tugyɛle nya.

²³ Mi lé a bli we dɔɔ é élé wedɔɔle nagɔɔn‐an é dére nya, yé é élé wedɔɔle gi gyɛle bɔraan é lɔlu nya.

²⁴ Dére wezan a bélé zɔrɔyoduo zo, wa néné mibozen lɛ yé woo fuu dɔa mi kɔlɛ ta.

²⁵ Zi ke ana, é dɔ mi gi léé, é a é drɔle, naa, é voéla é a gazi nya.

²⁶ Mi lé éé nyanama paan, éé nyanama paan ébo lɛ, naa a ’léé ɛ a nyunuan.

²⁷ Mi vɔnle éé dan wenaané nya; a lɔlu a bélé kyɛ lé éé blé é baba, a zo.

²⁸ Mi vɔnle éé munu vɔa ékema yé liwozan éé béénu kinié ékema.

²⁹ ’Wiiéwelazan éé bɔluzan saan, yé éé goo a nya zi lé é ’ka é zima lo, a ta.

³⁰ Mi lé éé yuɛ lɛ taan ébo nɔle gi bɔrɔ naanénu lɛ we gi, é valé mi lé éé suiɛ dɔraan é lɔlu ta, é wenaané kɛlɛ é kwakwa.

³¹ Mi nwana a tɔkoro nya; zi tegele ta lé wa yé.

³² Mi lé a bli ’ka flian é kele lo, a fila vɔ é mini nyanazan ta, yé mi lé é ébo kunwo é mini mi lé éé flanu sié gla nya, a ta.

³³ Woo ’munnu zunwo tɛrɛ va, naa, a gyɛle a Gakelebale leewe nya.