Wegɔnévɔlenu 15 - Kazambale lé Sebe Sauunu 1979

¹ We zi pale dére drɔɔ nya éé bliflizan bli dɔralaan, naa, dére blɛn fele éé bliflile gi gya.

² Wedɔɔzan dére ma lé wedɔɔle sɔ munu lɛ, yé ’tugyɛzannu lɔlu éé ’tugyɛwe nwɛɛn‐an.

³ Gakelebale yuɛ a fɛfaana, mi nyané valé mi zinnu naginile we ma.

⁴ Dére drɔɔ a mibélifɛ nya, naa, nɛnɛ sɛrɛle éé mi sɛra.

⁵ ’Tugyɛzan é é ti lé wepaale yé boawe nya, naa, mi lé éé weplale ’é lɛ nyi sié, éé we kɛla ’wuoatawe nya.

⁶ Fɛ kiɛre a mi tegele lé kɔn gi, naa, blikyɛdɔwe a mi nyanénu lé tɔnɔ nya.

⁷ Wedɔɔzannu lɔlu éé wedɔɔle nwɛɛn‐an, naa, ’tugyɛzannu bli ’ka tegele lo.

⁸ Mi nyanénu lé saraka a lɛrɛlɛrɛ Gakelebale yuɛ gi, naa, mi drɔlenu lé bazorole éé sɔa a lɛ.

⁹ Mi nyané giébɛ a lɛrɛlɛrɛ Gakelebale yuɛ gi, naa, mi lé éé goo we tegele zuo, ’bɛ éé sɔa a lɛ.

¹⁰ Mi lé é si zi drɔle ta, we lɛdɔle a gi plɛplɛ a a lɛbɛnna; mi lé éé weplale ’é lɛ za paan, é dan ga lɛ.

¹¹ Dé Gakelebale éé gamunu nyanana valé guru blɛn yé ’naan, ’té blaminu bli nii? É ’ka ’bɛ yé loo?

¹² É ’ka sɔ lɛ wenanazan lɛ léé, wo we pla ’é lɛ lo, é ’ka goo wedɔɔzannu va lo.

¹³ Ginanale éé mi yara bié, naa, dé mi bli kyɛ dɔ a fuu éé sié a ta.

¹⁴ Gikinizan bli éé wedɔɔle naginian, naa, ’tugyɛwe fele a ’tugyɛzan ’léé néné.

¹⁵ Blikyɛdɔzannu lé yinu faa a é naané, naa, bli drɔɔ a fɛti kɛlɛle lé a glɛ ’ka lo, a nya.

¹⁶ Dé fɛ kiéné a i lee, ’té i kanaan Gakelebale lee, ’bɛ fila vɔ é mini fɛwezannu kiɛre ta, ’té bliikyɛdɔle ke a zuo.

¹⁷ ’Nunu kana do blele ’té a zi munu sɔ ’wo ke lɛ, ’bɛ fila vɔ é mini diriwi nyɔnɔzan blele ta, ’té a zi munu za a ’wo ke gi.

¹⁸ Mi lé a wɛwɛ ke, éé mi vɔa ékema, naa, mi lé a bli ’ka flian é kele lo, éé wesiamunu kuun‐an.

¹⁹ Kun‐anwozan lé zi a bélé danan gɔrɔ zo, naa, mi drɔlenu lé zi ta a é bɔle ékema.

²⁰ Wedɔɔ be é ’é ti gi nanaan, yé ’tugyɛzan é ’é bu yé boazan nya.

²¹ Mi lé a ’wuo ke é sɛrɛle, ’tugyɛwe a alé ginanawe nya, naa, gikinizan éé goo zi drɔle ta.

²² Dé wo ’ka we bɛ paan ékema fɛana lo, ana lé ’wuoibɔrɔwe lɛ ’ka sɔɔan lo, naa, dé we bɛ pa ékemazannu a kiɛre, we lɛ éé sɔɔan.

²³ Mi lé é we zi pale dɔɔ, a gi éé nanaan, yé dére lé wa fé é febléyi nya, é a néné é baba.

²⁴ Wedɔɔzan bélizi éé goo loru, a paale we gi, zi lé éé goo gamunu nyanana lé ke guru gi, a ma.

²⁵ Gakelebale éé boblɛnzannu lé kɔn guru zanaan, yé é zanagalalomu lé tɛrɛ glɛ vo ’é vona.

²⁶ Gibɔrɔ naané a é lɛrɛlɛrɛ Gakelebale yuɛ gi, naa, dére zin gi a é bɔle a yuɛ gi.

²⁷ Mi lé a bli ke blɛn, é ébo lé kɔn gi kyɛ dɔa, naa, mi lé éé blɛnu za paan, é dan vo lɛ é yuɛma.

²⁸ Mi tegele éé bɔn‐in bɔrɔan faa yé é we zi pa, naa, mi naanénu ’léé éé we naanénu nwɛɛn‐an.

²⁹ Gakelebale éé sié mi naanénu ma baa, naa, éé tɔné dɔa mi tegelenu lé bazorole lɛ.

³⁰ Mi lé a yara ke é soile éé mi gi nanaan; we néné ’male éé fuu dɔa mi ta.

³¹ Wepladére lé éé goo mi nya bélile va, mi lé éé tɔné dɔa ’bɛ lɛ, é dan nyana lɛ wedɔɔmunu va.

³² Mi lé éé sɔn vɔa é drɔle ma, é ébozen yé boami nya, naa, mi lé éé tɔné dɔa weplale lɛ, a gi é dan kini lɛ.

³³ Kanale Gakelebale lee éé wedɔɔle no mi lɛ, yé tɔbɔle éé dan bo kɛlɛle kiéné zuo.