Wegɔnévɔlenu 14 - Kazambale lé Sebe Sauunu 1979

¹ Wedɔɔ le é élé kɔn dɔa yé ’tugyɛ le é élé kɔn zanaan ébo bɛ nya.

² Mi lé éé tawoo é drɔle, éé kanaan Gakelebale lee, naa, mi lé éé zi plinlenu sian éé Bale yé boazan nya.

³ ’Tugyɛzan lé boblɛn dére a ’é blafɛ nya, naa, wedɔɔzannu lɔlunu ’éé wo tabin‐é.

⁴ Dé dirigɔnénu ’ka lo, winu lé fɛble kɛsu gi a é pla; naa, fɛ kiɛre yele éé sié dirigɔnénu lé plɛplɛ va.

⁵ Wenayezan lé éé yara paan we ta, é ’ka vié woo lo, naa, vié wenayezan éé vié woo.

⁶ Wenanazan éé wedɔɔle ginian yé é ’ka a yé lo, naa, wedɔɔle ’ka tɔntɔn gikinizan lee lo.

⁷ ’I si ’tugyɛzan ma baa, i ’ka dan wedɔɔdére ’ma lɛ a ’léé lo.

⁸ Yuɛikinizan lé wedɔɔle lé ke alé tawobɛ vabole nya; ’tugyɛzannu lé tavowe a dabli nya.

⁹ ’Tugyɛzannu éé wenyané kɛla wolé zanagyɛfɛ nya, naa, woo zin yé mi drɔlenu méléna.

¹⁰ Mi ébo bli gi kyɛdɔle dɔɔ, yé bɛn ’ka bɔa lɛ léé, é wɔra alé gi nanale gi lo.

¹¹ Wo dan mi nyanénu lé kɔnnu ’wii lɛ, naa, mi drɔlenu lé sɔkɔn é dan fan lɛ.

¹² Zi ke ana, é dɔ mi gi lé é a é drɔle, naa, é voéla é a gazi nya.

¹³ Mi bli kyɛ é bɔa dɔle lɛ yéri sile méléna, yé ginanale é bɔalɛ léé, é nyaa bli kyɛdɔle nya.

¹⁴ Mi lé abo bli a saan, abo kɛlɛwenu a ginanama, naa, mi zin giwe ’é ginanama.

¹⁵ Nékénénémi éé bli voo we faa lé wa fé, a lɛ, naa, yuɛikinizan éé ganedɔrana ginian.

¹⁶ Wedɔɔzan éé kanaan, yé éé sɔn vɔa wenaané ma, naa, ’tugyɛzan é ébo kɛla blɛn yé é a a gi léé, we ’ka kɛla ’é lɛ lo.

¹⁷ Mi lé a bli éé flian é kele éé tavowe kɛla, yé mi lé éé miblifliwe kɛla, munu a za paan.

¹⁸ Tavowe a nékénénéminu zé nya, naa, yuɛikinimunu woo wedɔɔle kɛla wobo lé tɔkoro nya.

¹⁹ Mi nyanénu woo ’wuo tuaan mi zinnu lɛ, yé wenyanékɛlɛzannu woo ’wuo tuaan mi tegelenu lé kɔn ’léé.

²⁰ Mi éé nyanégyɛzan yé boazan nya, dé é a a béé boen nyaoo, naa, fuablezan béénu a kiɛre.

²¹ Mi lé é bɔluzan yé boazan nya é wenyané kɛlɛ, naa, mi lé a nyanai éé zén‐é nyanaizéntazannu ta, ’bɛzan wezin kɛlɛ.

²² Munu lé woo gi bɔrɔan wenyané nya, wo ’ka dan saan lɛ loo? Naa, munu lé woo gi bɔrɔan wezin nya woo we kɛla bli zin valé yarapalale nya.

²³ Nyanama faa éé fɛ kiɛre yé, naa, boawe fele éé mi gya nyané nya.

²⁴ Fuafɛnu a wedɔɔzannu lé tɔkoro nya; ’tugyɛzannu lé tavowe a yifaama ’tu tanle nya.

²⁵ Wenayezan bozen éé munu sié we gi, naa, dablizan éé vié woo.

²⁶ Mi lé éé kanaan Gakelebale lee, a tɛn‐agifɛ a gligli, yé alé nénu yɔɔna a a sɔnɔ.

²⁷ Kanale Gakelebale lee a mi bélile ’wuo nya, mi sile ga lé sanbale lee we ma.

²⁸ Dé munu a kiɛre, minwiinzan tɔbɔwe lé; dé munu we dɔ, minwiinzan guru zanale a gi lé.

²⁹ Mi lé a bli ’ka flian é kele lo, a gi kini é baba, naa, mi lé éé daan ébo ma léé, a bli é fli, é élé tavole nagɔɔn‐an.

³⁰ Bli drɔɔ a mi kɔlɛ bélifɛ nya, naa, mi va maawole a bélé booboo zo mi wɔlɛ gi.

³¹ Mi lé éé nyané paan nyanégyɛzan ta, é a a Kɛlɛzan sɔnɔna; naa, mi lé a nyanai éé zén‐é tɔnanénu ta, é a a Kɛlɛzan tɔ bɔna.

³² Wenyanékɛlɛzan guru éé zanaan a gi alé wenyané pli zi, naa, dé mi tegele gaoo, éé yɔɔna yé.

³³ Wedɔɔle éé nyanaan gikinizan bli gi, naa, dé é a ’tugyɛzannu mélénaoo, é ébo nagɔɔn‐an.

³⁴ Bɛn do lé woo we tegele kɛla, ’bɛ é dan wo tɔ bɔ lɛ, naa, wenyané kɛlɛle éé migɔnɔnu gya yara nya.

³⁵ Minwiinzan wuozan lé a ’wuo ke a ta, éé zin kɛla ’bɛ lɛ, naa, mi lé ’bɛ a gya yara nya, a bli éé flian ’bɛ ma.